ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កូរ៉េ​ខាង​ជើង​កំពុង​ពិភាក្សា​អំពី​ការ​ដោះលែង​អ្នក​ទោស​អាមេរិកាំង ៣ នាក់


ទាហាន​ម្នាក់​ដើរ​កម្មវិធី​ទូរទស្សន៍​របស់​កូរ៉េ​ខាង​ត្បូង​ដែល​បង្ហាញ​ពី​រូបភាព​របស់​លោក​ប្រធានាធិបតី​អាមេរិក ដូណាល់ ត្រាំ និង​លោក Kim Jong Un នៅ​ស្ថានីយ​រថភ្លើង​មួយ​នៅ​ក្នុង​សេអ៊ូល កាលពី​ថ្ងៃទី៩​ ខែមីនា ឆ្នាំ២០១៨។

ប្រទេស​កូរ៉េ​ខាង​ជើង​កំពុង​ពិភាក្សា​ជាមួយ​នឹង​សហរដ្ឋ​អាមេរិក និង​ប្រទេស​ស៊ុយអែត​អំពី​ការ​ដោះលែង​ពលរដ្ឋ​អាមេរិកាំង ៣ នាក់​ដែល​កំពុង​ជាប់​ឃុំ​ឃាំង ស្រប​ពេល​ដែល​សកម្មភាព​ការទូត​នានា​កំពុងតែ​បន្ត​ធ្វើ​ឡើង​នៅ​មុន​កិច្ច​ប្រជុំ​ដែល​រដ្ឋាភិបាល​ក្រុង​ព្យុងយ៉ាង​គ្រោង​នឹង​ធ្វើ​ឡើង​ជាមួយ​នឹង​រដ្ឋាភិបាល​ក្រុង​វ៉ាស៊ីនតោន និង​រដ្ឋាភិបាល​ក្រុង​សេអ៊ូល។ នេះ​បើ​តាម​ការ​បញ្ជាក់​របស់​សេចក្ដី រាយការណ៍​នានា។

ការ​ដោះលែង​ពលរដ្ឋ​អាមេរិកាំង​ដើម​កំណើត​កូរ៉េ ៣ នាក់ កំពុងតែ​ត្រូវ​បាន​ពិភាក្សា​តាម​រយៈ​បណ្ដាញ​ជា​ច្រើន​អស់​រយៈពេល​ជាង​មួយ​សប្ដាហ៍​មក​ហើយ បន្ទាប់ពី​ប្រធានាធិបតី​អាមេរិក​លោក Donald Trump បាន​យល់ព្រម​ជួប​ជាមួយ​នឹង​មេដឹកនាំ​កូរ៉េ​ខាង​ជើង​លោក Kim Jong Un។ នេះ​បើ​តាម​ការ​បញ្ជាក់​របស់​សេចក្ដី​រាយការណ៍​នានា។

ស្ថានីយ​ទូរទស្សន៍ MBC TV ដែល​មាន​មូលដ្ឋាន​នៅ​ក្នុង​ទីក្រុង​សេអ៊ូល ប្រទេស​កូរ៉េ​ខាង​ត្បូង​បាន​រាយការណ៍​កាល​ពី​ថ្ងៃ​អាទិត្យ​ម្សិលមិញ​ថា កូរ៉េ​ខាង​ជើង និង​សហរដ្ឋ​អាមេរិក​បាន «សម្រេច​បាន» នូវ​កិច្ច​ព្រមព្រៀង​ចុង​ក្រោយ​មួយ​ទាក់ទិន​នឹង​ការ​ដោះលែង​ពលរដ្ឋ​អាមេរិកាំង​លោក Kim Hak Song លោក Kim Sang Duk និង​លោក Kim Dong Chul។

ការ​ចរចា​នេះ​ត្រូវ​បាន​ធ្វើ​ឡើង​តាម​រយៈ​ស្ថាន​បេសកកម្ម​កូរ៉េ​ខាង​ជើង​ប្រចាំ​អង្គការ​សហប្រជាជាតិ និង​ក្រសួង​ការបរទេស​អាមេរិក ដែល​ជា​ផ្លូវ​ទំនាក់ទំនង​មិន​ផ្លូវការ​មួយ​ដែល​ហៅ​ថា «បណ្ដាញ New York»។ នេះ​បើ​តាម​ការ​បញ្ជាក់​របស់​មន្ត្រី​ការទូត​កូរ៉េ​ខាង​ត្បូង​មួយ​រូប។

ចំណែក​ឯ​ទីភ្នាក់ងារ​ព័ត៌មាន CNN វិញ បាន​រាយការណ៍​ថា ការ​ដោះលែង​អ្នក​ទោស​ទាំង​នេះ​ត្រូវ​បាន​ពិភាក្សា​នៅ​ក្នុង​ជំនួប​រយៈពេល ៣ ថ្ងៃ នៅ​ក្នុង​ទីក្រុង Stockholm ប្រទេស​ស៊ុយអែត រវាង​រដ្ឋមន្ត្រី​ការបរទេស​កូរ៉េ​ខាង​ជើង​លោក Ri Yong Ho និង​រដ្ឋមន្ត្រី​ការបរទេស​ស៊ុយអែត​លោកស្រី Margot Wallstrom ដែល​បាន​បញ្ចប់​កាល​ពី​ថ្ងៃ​សៅរ៍​កន្លង​ទៅ​នេះ៕

XS
SM
MD
LG