ប្រព័ន្ធផ្សព្វផ្សាយរបស់ប្រទេសកូរ៉េខាងត្បូងបានរាយការណ៍នៅថ្ងៃអាទិត្យនេះថា មន្ត្រីការទូតជាន់ខ្ពស់កូរ៉េខាងជើងមួយរូបបានធ្វើដំណើរទៅកាន់ប្រទេសហ្វាំងឡង់ដើម្បីជួបជាមួយនឹងអតីតមន្ត្រីការទូតសហរដ្ឋអាមេរិក។ រឿងនេះបានកើតឡើង បន្ទាប់ពីគណៈប្រតិភូកូរ៉េខាងជើងបានបញ្ចប់កិច្ចពិភាក្សារយៈពេល ៣ ថ្ងៃរបស់ខ្លួនជាមួយនឹងមន្ត្រីការទូតស៊ុយអែត ដែលការពិភាក្សានេះអាចឈានទៅដល់ការមានជំនួបរវាងប្រធានាធិបតីសហរដ្ឋអាមេរិកលោក Donald Trump និងមេដឹកនាំកូរ៉េខាងជើងលោក Kim Jong Un។
ទីភ្នាក់ងារព័ត៌មាន Yonhap បានរាយការណ៍ថា លោក Choe Kang Il អគ្គនាយករងទទួលបន្ទុកកិច្ចការរវាងកូរ៉េខាងជើង និងសហរដ្ឋអាមេរិកនៃប្រទេសកូរ៉េខាងជើង ត្រូវបានគេឃើញនៅឯអាកាសយានដ្ឋានអន្តរជាតិប្រចាំរដ្ឋធានីប៉េកាំង ប្រទេសចិន មុនពេលលោកឡើងជិះយន្តហោះឆ្ពោះទៅកាន់ប្រទេសហ្វាំងឡង់។
ប្រភពព័ត៌មានពីអ្នកការទូតនានាបានឲ្យដឹងថា អគ្គរដ្ឋទូតសហរដ្ឋអាមេរិកប្រចាំប្រទេសកូរ៉េខាងត្បូងលោកស្រី Kathleen Stephens គឺជាមនុស្សម្នាក់ស្ថិតក្នុងចំណោមអតីតមន្ត្រីការទូតសហរដ្ឋអាមេរិក ដែលនឹងជួបជាមួយនឹងលោក Choe Kang Il។ លោក Choe Kang Il ក៏ត្រូវគេរំពឹងថានឹងជួបពិភាក្សាជាមួយនឹងអ្នកជំនាញផ្នែកសន្តិសុខនានាមកពីប្រទេសកូរ៉េខាងត្បូងផងដែរ។
ទីភ្នាក់ងារព័ត៌មាន Yonhap បានបញ្ជាក់ថា មន្ត្រីការទូតដែលជួបពិភាក្សាគ្នានៅក្នុងប្រទេសហ្វាំងឡង់នេះ នឹង «ផ្លាស់ប្ដូរទស្សនៈទៅវិញទៅមកអំពីភាពគ្មានអាវុធនុយក្លេអ៊ែរនៅលើឧបទ្វីបកូរ៉េ អំពីកិច្ចប្រជុំរវាងកូរ៉េទាំងពីរដែលគ្រោងនឹងធ្វើឡើងនៅចុងខែមេសាខាងមុខនេះ និងអំពីកិច្ចប្រជុំរវាងសហរដ្ឋអាមេរិក និងកូរ៉េខាងជើងដែលគ្រោងនឹងធ្វើឡើងនៅខែឧសភាខាងមុខនេះ»៕
