ប្រទេសកូរ៉េខាងជើងបានធ្វើការសាកល្បងគ្រាប់ផ្លោងមីស៊ីលរយៈចម្ងាយខ្លីកាលពីព្រឹកថ្ងៃព្រហស្បតិ៍នេះ។
កូរ៉េខាងជើងបានបាញ់គ្រាប់ផ្លោងមីស៊ីលពីរគ្រាប់ធ្លាក់នៅខាងក្រៅដែនទឹកប្រទេសជប៉ុន។ នេះបើតាមការបញ្ជាក់របស់នាយករដ្ឋមន្ត្រីជប៉ុនលោក Yoshihide Suga។
ក្រសួងការពារជាតិកូរ៉េខាងត្បូងបានបញ្ជាក់ថា មីស៊ីលទាំងពីរគ្រាប់នេះត្រូវបានបាញ់ចេញពីខេត្ត South Hamgyong និងហោះបានចម្ងាយ ៤៥០ គីឡូម៉ែត្រ ក្នុងរយៈកម្ពស់ ៦០ គីឡូម៉ែត្រ។
លោកអនុសេនីយ៍ឯក Mike Kafka មន្ត្រីកិច្ចការសាធារណៈនៃទីបញ្ជាការតំបន់ឥណ្ឌូប៉ាស៊ីហ្វិករបស់សហរដ្ឋអាមេរិក បានបញ្ជាក់ក្នុងសេចក្តីថ្លែងការណ៍មួយថា មន្ត្រីសហរដ្ឋអាមេរិកបានដឹងអំពីការបាញ់សាកល្បងនេះ ហើយបានឃ្លាំមើលស្ថានការណ៍នេះ។
សេចក្តីថ្លែងការណ៍នោះបានបញ្ជាក់ថា៖ «សកម្មភាពនេះបង្ហាញអំពីការគំរាមកំហែងដែលបង្កឡើងដោយកម្មវិធីអាវុធខុសច្បាប់របស់កូរ៉េខាងជើងចំពោះប្រទេសជិតខាងនិងសហគមន៍អន្តរជាតិ។ ការតាំងចិត្តរបស់សហរដ្ឋអាមេរិកនៅក្នុងការការពារប្រទេសកូរ៉េខាងត្បូងនិងជប៉ុននៅតែរឹងមាំដដែល»។
នេះគឺជាការសាកល្បងគ្រាប់ផ្លោងមីស៊ីលលើកដំបូងរបស់កូរ៉េខាងជើងក្នុងរយៈពេលប្រហែលមួយឆ្នាំចុងក្រោយនេះ បើទោះបីជាប្រទេសនេះបានបាញ់គ្រាប់មីស៊ីលតូចៗជាងនេះកាលពីពេលថ្មីៗនេះក៏ដោយ។
ការបាញ់សាកល្បងរបស់កូរ៉េខាងជើងលើកនេះបានធ្វើឡើង នៅស្របពេលដែលរដ្ឋបាលរបស់ប្រធានាធិបតីសហរដ្ឋអាមេរិកលោក Joe Biden កំពុងស្ថិតនៅក្នុងដំណាក់កាលចុងក្រោយនៃការពិនិត្យឡើងវិញនូវគោលនយោបាយរបស់សហរដ្ឋអាមេរិកចំពោះប្រទេសកូរ៉េខាងជើង៕
