នៅព្រឹកថ្ងៃអង្គារនេះ ប្រទេសកូរ៉េខាងជើងបានបាញ់សាកល្បងមីស៊ីល ដែលហោះពីលើប្រទេសជប៉ុន ដែលការបាញ់លើកនេះត្រូវបានអ្នកវិភាគនានានិយាយថា ស្រដៀងទៅនឹងគម្រោងដែលត្រូវបានពន្យារពេលនាពេលថ្មីៗនេះរបស់រដ្ឋាភិបាលក្រុងព្យុងយ៉ាងដែលចង់បាញ់មីស៊ីលទៅជិតកោះ Guam របស់សហរដ្ឋអាមេរិក។ ការបាញ់មីស៊ីលលើកនេះក៏ជំរុញឲ្យមានប្រតិកម្មពីសំណាក់មេដឹកនាំប្រទេសជប៉ុន និងមេដឹកនាំបណ្ដាប្រទេសផ្សេងទៀតផងដែរ។
ការបាញ់មីស៊ីលរបស់កូរ៉េខាងជើងលើកនេះត្រូវបានគេជឿថា ជាការសាកល្បងដ៏ជោគជ័យលើកទីពីរនៃគ្រាប់ផ្លោងមីស៊ីល Hwasong 12 ដែលអាចហោះបានចម្ងាយមធ្យមរវាងពី ៣ ពាន់គីឡូម៉ែត្រ ទៅ ៥ ពាន់គីឡូម៉ែត្រ។ នេះបើយោងតាមការបញ្ជាក់របស់អ្នកជំនាញខាងគ្រាប់ផ្លោងមីស៊ីលលោក Jeffrey Lewis ដែលជាប្រធានកម្មវិធីរារាំងអាវុធនុយក្លេអ៊ែរនៅតំបន់អាស៊ីបូព៌ា នៃវិទ្យាស្ថានសិក្សាកិច្ចការអន្តរជាតិ Middlebury ក្នុងរដ្ឋ California សហរដ្ឋអាមេរិក។ ការសាកល្បងគ្រាប់ផ្លោងមីស៊ីល Hwasong 12 ដែលទទួលបានជោគជ័យលើកដំបូងរបស់កូរ៉េខាងជើង បានធ្វើឡើងកាលពីខែឧសភាកន្លងទៅនេះ។
គ្រាប់ផ្លោងមីស៊ីលនេះបានហោះខ្ពស់រំលងពីលើប្រទេសជប៉ុន ក្នុងរយៈពេលប្រហែល ១០ នាទីក្រោយមក បន្ទាប់ពីបានបាញ់ចេញពីកូរ៉េខាងជើង ហើយវាបានបំបែកចេញជា ៣ ចំណែក និងធ្លាក់ចូលទៅក្នុងមហាសមុទ្រប៉ាស៊ីហ្វិក ស្ថិតនៅភាគខាងកើតនៃកោះ Hokkaido របស់ជប៉ុន។ នេះបើយោងតាមការបញ្ជាក់របស់រដ្ឋាភិបាលជប៉ុន។
គ្រាប់ផ្លោងមីស៊ីលដែលបាញ់ចេញពីមូលដ្ឋានចល័តក្នុងសង្កាត់ Sunan ជិតប្រលានយន្តហោះអន្តរជាតិព្យុងយ៉ាងនេះ ហោះបានចម្ងាយជាង ២ ពាន់ ៧ រយគីឡូម៉ែត្រ ក្នុងរយៈកម្ពស់អតិបរមាប្រហែល ៥៥០ គីឡូម៉ែត្រ។ នេះបើតាមការបញ្ជាក់របស់អគ្គសេនាធិការចម្រុះកូរ៉េខាងត្បូង៕
