កូរ៉េខាងជើងបានបាញ់កាំជ្រួចបាល្លីស្ទិកវង់ប្រតិបត្តិការខ្លី២គ្រាប់ចូលក្នុងសមុទ្រភាគខាងកើតរបស់ខ្លួន។ នេះបើតាមការបញ្ជាក់របស់យោធាកូរ៉េខាងត្បូងនៅថ្ងៃអង្គារនេះដែលជាការបន្ថែមដល់ការសាកល្បងអាវុធជាបន្តបន្ទាប់កាលពីពេលថ្មីៗនេះដែលទំនងជាការតវ៉ាប្រឆាំងនឹងសហរដ្ឋអាមេរិកដែលបានបញ្ជូននាវាដ៏សំខាន់ៗទៅកាន់ប្រទេសកូរ៉េខាងត្បូងនៅក្នុងការបង្ហាញកម្លាំង។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
នៅក្នុងការបាញ់បង្ហោះជុំទី៣របស់ខ្លួនចាប់តាំងពីសប្តាហ៍មុនមក កូរ៉េខាងជើងបានបាញ់មីស៊ីលមុនពាក់កណ្តាលយប់ចេញពីតំបន់មួយនៅជិតរដ្ឋធានីព្យុងយ៉ាងរបស់ខ្លួន។ នេះបើតាមនាយអគ្គសេនាធិការកងទ័ពចម្រុះរបស់កូរ៉េខាងត្បូង។ នាយអគ្គសេនាធិការកូរ៉េខាងត្បូងបាននិយាយទៀតថាមីស៊ីលទាំង២នេះបានហោះប្រហែល៤ រយគីឡូម៉ែត្រមុនពេលធ្លាក់ចូលក្នុងទឹកទល់មុខឆ្នេរសមុទ្រភាគខាងកើតឧបទ្វីបកូរ៉េ។
ក្នុងសេចក្តីថ្លែងការណ៍របស់ខ្លួនដែលបានហៅការបាញ់បង្ហោះមីស៊ីលរបស់កូរ៉េខាងជើងថាជា«ការបង្ករហេតុដ៏ធ្ងន់ធ្ងរមួយ»ដែលគំរាមកំហែងសន្តិភាពនិងស្ថិរភាពក្នុងតំបន់។ នាយករដ្ឋមន្ត្រីជប៉ុនលោក Fumio Kishidaបាននិយាយថារដ្ឋាភិបាលរបស់លោកបានដាក់ពាក្យតវ៉ាប្រឆាំងដល់កូរ៉េខាងជើងអំពីការបាញ់បង្ហោះមីស៊ីលដែលជាធម្មតាធ្វើតាមរយៈស្ថានទូតរបស់ជប៉ុននៅក្នុងរដ្ឋធានីប៉េកាំង។ លោកបាននិយាយទៀតថារដ្ឋាភិបាលក្រុងតូក្យូបានខិតខំអស់ពីសមត្ថភាពដើម្បីតាមដានខណៈដែលបង្កើនកិច្ចសហប្រតិបត្តិការសន្តិសុខត្រីភាគីជាមួយរដ្ឋាភិបាលក្រុងវ៉ាស៊ីនតោននិងរដ្ឋាភិបាលក្រុងសេអ៊ូល។ មិនមានការខូចខាតត្រូវបានរាយការណ៍ដែលទាក់ទិននឹងការបាញ់បង្ហោះមីស៊ីលដែលបានធ្លាក់ចូលក្នុងតំបន់សេដ្ឋកិច្ចផ្តាច់មុខរបស់ប្រទេសនេះទេ។ នេះបើតាមក្រសួងការពារជាតិជប៉ុន។
ការបាញ់បង្ហោះមីស៊ីលនេះបានកើតមានឡើងប៉ុន្មានម៉ោងបន្ទាប់ពីកងទ័ពជើងទឹករបស់កូរ៉េខាងត្បូងបាននិយាយថានាវាមុជទឹកប្រើដោយថាមពលនុយក្លែអ៊ែររបស់សហរដ្ឋអាមេរិកឈ្មោះ USS Annapolisបានទៅដល់កំពង់ផែមួយនៅកោះ Jeju។ ការណ៍នេះបានបញ្ជាក់ពីការខំប្រឹងប្រែងរបស់សម្ព័ន្ធមិត្តដើម្បីបង្កើននាវាយុទ្ធសាស្ត្ររបស់សហរដ្ឋអាមេរិកនៅក្នុងតំបន់ដើម្បីបំភិទបំភ័យកូរ៉េខាងជើង៕
