នាយករដ្ឋមន្ត្រីជប៉ុនដែលកំពុងឈរនៅក្បែរលោកប្រធានាធិបតីសហរដ្ឋអាមេរិកនៅវិមាន Akasaka ក្នុងប្រទេសជប៉ុនមានប្រសាសន៍ថា «គ្មានអ្វីដែលត្រូវលើកយកមកពិភាក្សាដើម្បីគ្រាន់តែពិភាក្សាជាមួយកូរ៉េខាងជើងទេ» ហើយពេលវេលាដែលត្រូវដាក់សម្ពាធឲ្យដល់ចំណុចអតិបរមាទៅលើរដ្ឋាភិបាលក្រុងព្យុងយ៉ាងបានមកដល់ហើយ។
នាយករដ្ឋមន្ត្រីជប៉ុនលោក Shinzo Abe ថ្លែងក្នុងភាសាជប៉ុនថា៖ «ដោយសហការជាមួយនឹងប្រធានាធិបតីលោក ត្រាំ យើងអះអាងថាយើងឈរនៅក្នុងគោលជំហរដូចគ្នា១០០ភាគរយចំពោះបញ្ហាស្ថានភាពប្រទេសកូរ៉េខាងជើង។ ជប៉ុន និង សហរដ្ឋ អាមេរិកនឹងសហការរួមគ្នាដើម្បីទាក់ទងទៅប្រទេសដែលពាក់ព័ន្ធ ដូចជាប្រទេសចិន និង រុស្ស៊ី ដើម្បីបង្កើនសម្ពាធពីសហគមន៍អន្តរជាតិប្រឆាំងនឹងកូរ៉េខាងជើង»។
លោកត្រាំបានចាត់ទុកការសាកល្បងនុយក្លេអ៊ែរនិងការបាញ់កាំជ្រួចផ្លោងរបស់កូរ៉េខាងជើងទៅលើទឹកដីប្រទេសជប៉ុនជាការគំរាមកំហែងទៅលើសន្តិភាព និង ស្ថរិភាពអន្តរជាតិ។
ប្រធានាធិបតីសហរដ្ឋអាមេរិកលោក ដូណាល់ ត្រាំបានមានប្រសាសន៍ថា៖ «យើងមិនគាំទ្រទង្វើបែបនេះជាដាច់ខាត។ សម័យដែលប្រើយុទ្ធសាស្ត្រដោយអំណត់បានបញ្ចប់ហើយ។ មនុស្សមួយចំនួនបាននិយាយថា វោហាសាស្ត្រខ្ញុំគឺធ្ងន់ធ្ងរណាស់ ក៏ប៉ុន្តែ សូមងាកមើលលើអ្វីដែលបានកើតឡើងដោយសារតែវោហាសាស្ត្រដែលទន់ខ្សោយអស់រយៈពេលជាង២៥ឆ្នាំកន្លងទៅនេះ»។
សម្រាប់ប្រជាពលរដ្ឋកូរ៉េខាងជើងវិញ ប្រធានាធិបតីសហរដ្ឋអាមេរិកបានបង្ហាញពីក្តីសង្ឃឹមរបស់លោកដើម្បីឲ្យមានដំណោះស្រាយដល់ភាពតានតឹងនេះ។
ប្រធានាធិបតីលោក ដូណាល់ ត្រាំបានបន្តមានប្រសាសន៍ថា៖ «ពួកគេនៅក្រោមរបបគាបសង្កត់ណាស់ ហើយខ្ញុំពិតជាគិតថា នៅចុងបញ្ចប់ ខ្ញុំអាចប្រាប់អ្នកបានថា ខ្ញុំសង្ឃឹមថាអ្វីៗនឹងអាចដោះស្រាយ។ វានឹងប្រសើរឡើងសម្រាប់អ្នកទាំងអស់គ្នា»។
លោក ត្រាំ ក៏បានគូសបង្ហាញពីកងទ័ពសហរដ្ឋអាមេរិករាប់ពាន់នាក់ដែលឈរជើងនៅប្រទេសជប៉ុន ហើយបានថ្លែងថា លោករំពឹងទុកថា រដ្ឋាភិបាលលោក Abe នឹងទិញសភាវុធក្នុងចំនួនច្រើនពីអាមេរិក ដែលអាចជួយដល់ការការពារប្រឆាំងនឹងមីស៊ីលពីកូរ៉េខាងជើង៕
ប្រែសម្រួលដោយ លឹម ហ្គេចហៀង
