ពលរដ្ឋកូរ៉េខាងត្បូងមួយក្រុមដែលរំភើបរីករាយ បានស្វាគមន៍ប្រធានាធិបតីសហរដ្ឋអាមេរិក លោក ដូណាល់ ត្រាំ ចំពោះទស្សនកិច្ចលើកដំបូងរបស់លោកទៅកាន់ទីក្រុង សេអ៊ូល។
មនុស្សរាប់ពាន់នាក់បានឈរជាជួរនៅតាមដងវិថីដែលឆ្ពោះទៅវិមានប្រធានាធិបតីកូរ៉េខាងត្បូង Blue House។
មនុស្សមួយចំនួនបានអបអរនឹងវោហារសាស្ត្រដ៏ម៉ឺងម៉ាត់របស់លោក ត្រាំ ទៅលើការបញ្ឈប់ការគំរាមកំហែងនុយក្លេអ៊ែរនិងកាំជ្រួចមីស៊ីលរបស់កូរ៉េខាងជើង ខណៈដែលអ្នកផ្សេងទៀតបានចេញមកសម្តែងការគ្រាំទ្រទៅលើសម្ព័ន្ធភាពរវាងកូរ៉េខាងត្បូងនិង សហរដ្ឋអាមេរិក។
លោក JEONG SOON-IL ដែលជាអ្នកគាំទ្រសហរដ្ឋអាមេរិកបាននិយាយថា៖
«ខ្ញុំមកទីនេះដើម្បីស្វាគមន៍លោកប្រធានាធិបតីនៃប្រទេសដែលជាសម្ព័ន្ធមិត្តនិងជាបងប្អូនរបស់យើង ដែលបានជួយកូរ៉េខាងត្បូងក្នុងអំឡុងពេលនៃសង្គ្រាមកូរ៉េ។ ខ្ញុំត្រូវតែមកទីនេះ ដោយសារតែលោកប្រធានាធិបតី ត្រាំ កំពុងតែគាំទ្រកូរ៉េខាងត្បូងដែលរងការគំរាមកំហែងពីកូរ៉េខាងជើង»។
ក៏ប៉ុន្តែក្រុមតូចៗមួយចំនួនទៀត បានប្រឆាំងនឹងទស្សនកិច្ចរបស់លោក ត្រាំ និងវោហារសាស្ត្រធ្ងន់ៗរបស់លោកទៅលើកូរ៉េខាងជើង ហើយក៏ប្រឆាំងនឹងវត្តមានរបស់យោធាអាមេរិកផងដែរ។
អ្នកស្រី KIM JONG-HEE ដែលជាអ្នកតវ៉ាប្រឆាំងនឹងលោក ត្រាំ បាននិយាយថា៖
«បើសិនជាលោកចង់ឲ្យពិភពលោកមានសន្តិភាព ក្នុងនាមលោកជាប្រធានាធិបតីនៃប្រទេសដែលមានអំណាចបំផុតនោះ លោកគួរតែចេញមកចរចាដើម្បីជជែកដោយឥតលក្ខខណ្ឌជាមួយនឹងកូរ៉េខាងជើង។ ហើយនាងខ្ញុំ សូមឲ្យលោកបញ្ជាក់ថា នឹងមិនមានសង្គ្រាមនៅឧបទ្វីបកូរ៉េនោះឡើយ»។
ប៉ូលិសជាច្រើននាក់ បានបញ្ជូនបាតុករប្រឆាំងនឹងលោក ត្រាំ មួយចំនួនចេញពីទីលានដ៏សំខាន់មួយ មុនពេលដែលក្បួនដង្ហែរថយន្តរបស់លោកប្រធានាធិបតីសហរដ្ឋអាមេរិកឆ្លងកាត់ទីនោះ។
មនុស្សភាគច្រើនបានស្វាគមន៍មេដឹកនាំសហរដ្ឋអាមេរិក ដែលជាកម្លាំងជំរុញមួយដើម្បីជួយធានាឲ្យមានសន្តិភាពនៅក្នុងប្រទេសកូរ៉េខាងត្បូងអស់រយៈពេលរាប់ទសវត្សរ៍មកហើយ ហើយពួកគេសង្ឃឹមថា សន្តិភាពនេះនឹងបន្តមានជាច្រើនទសវត្សរ៍ទៅមុខទៀត៕
ប្រែសម្រួលដោយ លឹម ហ្គេចហៀង
