ភ្ជាប់​ទៅ​គេហទំព័រ​ទាក់ទង

សង្គម​ស៊ីវិល​ឃ្លាំមើល​ការ​បោះ​ឆ្នោត​រិះ​គន់​កិច្ចព្រម​​ព្រៀង​វិសោធនកម្ម​ច្បាប់​​បោះ​ឆ្នោត

  • ហេង រស្មី

លោកសម រង្ស៊ី​ ប្រធាន​​គណបក្ស​​​សង្គ្រោះជាតិ​ ​និង​​លោក​​ស ខេង​ ​តំណាង​គណបក្ស​​ប្រជាជន​​កម្ពុជា​​ធ្វើ​សន្និសីទ​​កាសែត​រួមគ្នា​កាល​ពី​ថ្ងៃ​សៅរ៍​ទី​២៨ ខែ​កុម្ភៈ​ឆ្នាំ​២០១៥​។​​​

អង្គការ​សង្គម​ស៊ីវិល​ ដែល​តាម​ឃ្លាំមើល​កិច្ច​ការ​បោះ​ឆ្នោត​នៅ​ក្នុង​ប្រទេស​កម្ពុជា​ បាន​ធ្វើ​ការ​បរិហារ​រិះ​គន់​ថា ​វិសោធនកម្មសេចក្តី​ព្រាង​ច្បាប់ស្តីពី​«ការ​បោះ​ឆ្នោត​ជ្រើស​តាំង​តំណាងរាស្ត្រ»​ដែល​គណបក្ស​ប្រជាជន​កម្ពុជា​និង​គណបក្ស​សង្គ្រោះជាតិ​ទើប​តែ​បាន​ពិភាក្សា​បញ្ចប់​កាល​ពី​សប្តាហ៍មុន​នេះ​មិន​មាន​តម្លាភាព​ និង​មិន​អាច​ដោះ​ស្រាយ​ភាព​មិន​ប្រក្រតី​នៅ​ពេល​បោះ​ឆ្នោត​លើក​ក្រោយៗ​ទៀត​បាន​ទេ។​

កាល​ពី​ថ្ងៃ​សៅរ៍​កន្លង​ទៅ​នេះ ​ក្រុម​ការងារ​ខាង​គណបក្ស​ប្រជាជន​កម្ពុជា​ដឹក​នាំ​ដោយ​លោក​ស ខេង​ និង​ក្រុម​ការងារ​ខាង​គណបក្ស​សង្គ្រោះ​ជាតិ​ដឹក​នាំ​ដោយ​លោក​សម រង្ស៊ី​បាន​ជួប​ពិភាក្សា​គ្នា​ដើម្បី​ដោះ​ស្រាយ​បញ្ចប់​បញ្ហា​ដែល​នៅ​សេស​សល់​ទាំង​អស់​នៃ​សេចក្តី​ព្រៀង​ច្បាប់​ស្តី​ពី​«វិសោធន​កម្ម​ច្បាប់បោះ​ឆ្នោត​ជ្រើស​តាំង​តំណាង​រាស្ត្រ»។​

ថ្នាក់​ដឹក​នាំ​នៃ​គណបក្ស​ទាំង​ពីរ​បាន​ឯកភាព​គ្នា​ថា ​នឹង​រៀប​ចំ​សិក្ខាសាលា​ពិគ្រោះ​យោបល់​លើ​សេចក្តី​ព្រៀង​ច្បាប់​នេះ​នា​ពេល​ដ៏​ខ្លី​ខាង​មុខ​នេះ។​

ដោយ​ឡែក​ពាក់​ព័ន្ធ​ទៅ​នឹង​ការ​ធានា​និរន្តរភាព​ និង​ប្រក្រតី​ភាព​នៃ​ស្ថាប័ន​ជាតិ​ដើម្បី​បង្ការ​ភាព​ជាប់​គាំង​ បន្ទាប់​ពី​បោះ​ឆ្នោត​ ថ្នាក់​ដឹកនាំ​ទាំង​ពីរ​បាន​ឯក​ភាព​ជា​គោល​ការណ៍ដើម្បី​សិក្សា​លើ​បញ្ហា​នេះ។​

នៅ​ក្នុង​សេចក្តី​ព្រាង​បោះ​ឆ្នោត​ថ្មី​នេះ ​គណបក្ស​ទាំង​ពីរ​ក៏​បាន​ឯក​ភាព​គ្នា​បន្ថែម​ពីរ​អាសនៈទៀត​គឺ​នៅ​ក្នុង​ខេត្ត​កំពង់​សោម​ពី​១​អាសនៈមក​៣​អាសនៈវិញ។​ ​ដូច្នេះ​ចំនួន​អាសនៈសរុប​គឺ​បាន​កើន​ឡើង​ពី១២៣​ អាសនៈ​ទៅ​១២៥​អាសនៈ​វិញ។

ចំណែក​ឯ​យុទ្ធនាការ​ឃោសនា​បោះ​ឆ្នោត​តម្រូវ​ឲ្យធ្វើ​រយៈ​ពេល​តែ​២១​ថ្ងៃ​ប៉ុណ្ណោះ​ មិន​ដូច​ច្បាប់​បោះ​ឆ្នោត​លើក​មុន​ ដែល​មាន​រយៈ​ពេល​១​ខែ​នោះ​ទេ។​ ​ក៏ប៉ុន្តែ​សេចក្តី​ព្រៀង​ច្បាប់​ថ្មី​នេះ​កំណត់​ឲ្យថ្ងៃ​ធ្វើ​ការហែ​យុទ្ធនាការ​បោះ​ឆ្នោត​តែ​៤​ថ្ងៃ​ប៉ុណ្ណោះ។​

លោក​កែម ឡី​ អ្នក​ស្រាវជ្រាវ​ការ​អភិវឌ្ឍ​សង្គម​មាន​ប្រសាសន៍​ថា​ ការ​ព្រមព្រៀង​រវាង​គណបក្ស​ទាំង​ពីរ​លើ​សេចក្តី​ព្រៀង​ច្បាប់​នេះ​គឺ​ជា​ប្រវត្តិ​សាស្ត្រ​ដ៏​អាក្រក់​មួយ​ ដោយ​សារ​តែ​កំណែ​ទម្រង់​នេះ​មិន​មាន​ស្តង់ដារ​បើក​សេរីភាព​ឲ្យទូលំទូលាយ​ដើម្បី​ដោះ​ស្រាយ​បញ្ហា​នា​ពេល​ខាង​មុខ​ទេ។​ ក៏​ប៉ុន្តែ​វា​ជា​កំណែ​ទម្រង់​មួយ​ដែល​បង្ក​នូវ​បញ្ហា​ទៅ​វិញ។​

លោក​និយាយ​ថា៖ ​«ខ្ញុំ​មើល​ទៅ​គណបក្ស​ប្រជាជន​កម្ពុជា​ចំណេញ​ច្រើន​ ហើយ​គាត់​គាប​គ្រប់​ជ្រុង។​ ​គាត់​ធ្វើ​ឲ្យអាក្រក់​ជាង​មុន​ ហើយ​ចំណេញ​ដល់​គាត់​ជាងមុន។​ ហើយ​ក្នុង​កាលៈទេសៈ​ហ្នឹង​ គណបក្ស​សង្គ្រោះ​ជាតិ​អត់​ហ៊ាន​ថា​ អាក្រក់​ទៅ​ទៀត​ ​ជួយ​ការ​ពារ​អំពើ​អាក្រក់​ហ្នឹង»។​

លោក​គុល បញ្ហា​ នាយក​ប្រតិបត្តិ​អង្គការ​ឃ្លាំ​មើល​ការ​បោះ​ឆ្នោត​មួយ​ឈ្មោះ​ខុមហ្វ្រែល​ មាន​ប្រសាសន៍​ថា​ ទាក់​ទិន​នឹង​អព្យាក្រិត្យ​ឥត​លម្អៀង​របស់​អង្គការ​មិន​មែន​រដ្ឋាភិបាល​មិន​ត្រូវ​ដាក់​ទេ ​ដោយ​សារ​ច្បាប់​បច្ចុប្បន្ន​អត់​បាន​ចែង​រឿង​ហ្នឹង​ទេ។​ លោក​មាន​ប្រសាសន៍​ថា​ កង​កម្លាំងប្រដាប់​អាវុធ​ និង​មន្ត្រី​យោធា​ត្រូវ​ហាម​ដាច់​ខាត​មិន​ត្រូវ​ឲ្យធ្វើ​សកម្ម​ភាព​ ឬ​ឥទ្ធិពល​របស់​ខ្លួន​ពេល​ឃោសនា​បោះ​ឆ្នោត​ទេ។​

លោក​និយាយ​ថា៖​ «គាត់​អាច​ទៅ​ស្តាប់​ គាត់​អាច​ទៅ​ចូល​រួម​ការ​ពន្យល់​នានា​ ប៉ុន្តែ​គាត់​មិន​ត្រូវ​ទៅពន្យល់​ ទៅ​ឃោសនា​ឲ្យគណបក្ស​មួយ​ទេ។​ពីព្រោះ​ គាត់​មិន​ពាក់​ខោអាវ​ឯកសណ្ឋាន​មែន​ ប៉ុន្តែ​ប្រជា​ពលរដ្ឋ​គេ​ដឹង​ថា​គាត់​ជា​មេ​បញ្ជាការ​ មេ​ទាហ៊ាន។​ មាត្រា​អស់​ទាំង​នេះ​ត្រូវ​ចែង​ឲ្យច្បាស់»។​

លោក​ហូ វ៉ាន់​ អ្នក​តំណាងរាស្រ្ត​គណបក្ស​សង្គ្រោះ​ជាតិ​ មាន​ប្រសាសន៍​ថា​ គណបក្ស​សង្គ្រោះ​ជាតិ​បាន​ទាម​ទារ​ឲ្យលុប​មាត្រ​មួយ​ចំនួន​ចោល​ដែរ ​ក៏​ប៉ុន្តែ​យើង​ដឹង​ហើយ​ថា ​ការ​ចរចា​មាន​តាន​តឹង ​និង​មាន​ធូរ។ ​លោក​បាន​បញ្ជាក់​ថា ​ខ្លឹម​សារ​នៃ​សេចក្តី​ព្រៀង​ច្បាប់​នេះ​នឹង​មាន​ការ​បក​ស្រាយ​បន្ថែម​ទៀត​នៅ​ក្នុង​សិក្ខា​សាលា​ថ្នាក់​ជាតិ​ ដែល​គណបក្ស​ទាំង​ពីរ​គ្រោង​នឹង​រៀប​ចំ​ធ្វើ​ឡើង​នា​ពេល​ឆាប់​ខាង​មុខ​នេះ។​

លោក​និយាយ​ថា៖​ «បន្តិច​ទៀត​នេះ​នឹង​មាន​ការ​ធ្វើ​សិក្ខា​សាលា។​ ពេល​ហ្នឹង​ យើង​នឹង​មាន​ឯក​សារ​ច្បាស់​លាស់​ ពិត​ប្រាកដ​ថា​ តើ​មាត្រា​នេះ​ហ្នឹង​ប៉ះពាល់​សង្គម​ស៊ីវិល​កម្រិត​ណា​ ហើយ​មិន​ប៉ះ​ពាល់​កម្រិត​ណា។​ សូម​រង់​ចាំ​បន្តិច»។​

ទោះ​ជា​យ៉ាង​ណា​ក៏​ដោយ​ ក៏​លោក​នាយក​រដ្ឋមន្ត្រី​ហ៊ុន សែន​បាន​អបអរ​សារទរ​ចំពោះ​សេចក្តី​ព្រៀង​ច្បាប់​បោះ​ឆ្នោត​ថ្មី​នេះ ​ដែល​គណបក្ស​ទាំង​ពីរ​ទើប​នឹង​ពិភាក្សា​បញ្ចប់​កាល​ពី​ថ្ងៃ​សៅរ៍។​

លោក​និយាយ​ថា៖​ «អ្នក​ដែល​មិន​ចូល​ស្បថ​យក​សុពលភាព​ អ្នក​ដែល​មិន​ចូល​ប្រជុំ​ស្អីៗ​ហ្នឹង​ អាហ្នឹង​ត្រូវ​បាត់​បង់​អាសនៈ​ស្អីយ៉ាង​ម៉េចៗ​នោះ​ បាន​ឯកភាព​គ្នា​ហើយ​ តែមិន​ទាន់​បាន​សរសេរ។​ ​ថ្ងៃ​នេះ​គេ​សរសេរ​ហើយ​ ដល់​សរសេរ​រួច​ហើយ​ គេ​ធ្វើ​សិក្ខាសាលា​ ដល់​ធ្វើ​សិក្ខាសាលា​រួច​ហើយ​ គេ​ចាប់​ផ្តើម​បញ្ជូន​ទៅ​សភា​អនុម័ត​ហើយ»។

ក្រុម​ការងារ​នៃ​គណបក្ស​ប្រជាជន​កម្ពុជា ​និង​គណបក្ស​សង្គ្រោះជាតិ​នៅ​ថ្ងៃ​ច័ន្ទ​នេះ​បាន​បន្ត​ពិភាក្សា​គ្នា​លើ​ទោស​បញ្ញាត្តិ​ និង​អន្តរ​បញ្ញត្តិ​បន្ថែម​លើ​សេចក្តី​ព្រៀងច្បាប់​ស្តីពី​ការ​បោះ​ឆ្នោត​ជ្រើស​តាំង​តំណាងរាស្ត្រ៕

XS
SM
MD
LG