នៅពេលដែលអង្គជំនុំជម្រះវិសាមញ្ញក្នុងតុលាការកម្ពុជា ហៅកាត់ថា អ.វ.ត.ក. ឬត្រូវបានស្គាល់ថាជាសាលាក្តីខ្មែរក្រហម បានបិទបញ្ចប់នីតិវិធីជម្រះក្តីនោះ មជ្ឈមណ្ឌលឯកសារកម្ពុជា ហៅកាត់ថា (DC-CAM) ដែលចងក្រងទុកឯកសារពាក់ព័ន្ធនឹងរបបកម្ពុជាប្រជាធិបតេយ្យ ឬរបបខ្មែរក្រហម បញ្ជាក់ថា ការអប់រំគឺជាជំហានបន្ទាប់សម្រាប់ការទប់ស្កាត់ឧក្រិដ្ឋកម្មឃោរឃៅនៅប្រទេសកម្ពុជា និងនៅក្នុងតំបន់។
កាលពីថ្ងៃទី ២២ ខែកញ្ញា ឆ្នាំ ២០២២ នេះ អង្គជំនុំជម្រះនៃតុលាការកំពូលសាលាក្តីខ្មែរក្រហម បានប្រកាសរក្សាសាលក្រមរបស់សាលាដំបូង ដោយផ្ដន្ទាទោសដាក់ពន្ធនាគារអស់មួយជីវិតលើអតីតប្រមុខរដ្ឋក្នុងរបបកម្ពុជាប្រជាធិបតេយ្យ លោក ខៀវ សំផន។ នេះជាសេចក្តីសម្រេចចុងក្រោយលើអតីតមេដឹកនាំខ្មែរក្រហមតែម្នាក់គត់ ដែលនៅរស់រានមានជីវិត និងជាការឈានទៅបិទបញ្ចប់នៃដំណើរការកាត់ទោសមេដឹកនាំខ្មែរក្រហមជាន់ខ្ពស់ ដែលបានដំណើរការប្រមាណ ១៦ ឆ្នាំមកហើយ។
នាយកមជ្ឈមណ្ឌលឯកសារកម្ពុជា លោក ឆាំង យុ បានផ្តល់ការអត្ថាធិប្បាយក្នុងសេចក្តីប្រកាសមួយ ក្រោយការសម្រេចខាងលើថា សេចក្តីសម្រេចនេះគឺជាការបិទបញ្ចប់ប្រកបដោយប្រសិទ្ធភាពលើការងាររបស់តុលាការកូនកាត់មួយនេះ។
លោកលើកឡើងថា៖ «ខណៈពេលដែលសាលាក្តីខ្មែរក្រហមឈានមកដល់ទីបញ្ចប់ នៅក្នុងកាលៈទេសៈជាច្រើន ការបង្កើតជាកម្មវិធីអប់រំពីឧក្រិដ្ឋកម្មឃោរឃៅ គឺជាសក្ខីភាពនៃការវិវឌ្ឍទៅមុខដ៏សមស្រប ឆ្លើយតបនិងលើកឡើងអំពីឧក្រិដ្ឋកម្មឃោរឃៅ តាមរយៈកិច្ចខិតខំប្រឹងប្រែងនានាក្នុងគោលដៅទប់ស្កាត់ឧក្រិដ្ឋកម្មទាំងនេះពីការកើតមានឡើងវិញ»។
ការលើកឡើងរបស់លោក ឆាំង យុ អតីតអ្នករស់រានមានជីវិតមួយរូបពីរបបខ្មែរក្រហមបានធ្វើឡើង បន្ទាប់ពីសិក្ខាសាលាមួយ ដែលមានរយៈពេលបីថ្ងៃ ត្រូវបានរៀបចំឡើង ដើម្បីផ្តល់ការបណ្តុះបណ្តាលជំនាញវិជ្ជាជីវៈ ស្តីអំពីការទប់ស្កាត់ឧក្រិដ្ឋកម្មឃោរឃៅនៅក្នុងតំបន់អាស៊ីអាគ្នេយ៍។
លោកបញ្ជាក់បន្ថែមថា ការក្រេបយកចំណេះដឹងពីមេរៀនក្នុងរបបខ្មែរក្រហមនិងការដាក់បញ្ចូលចំណេះដឹងទាំងនេះ ទៅក្នុងកម្មវិធីសិក្សាទូលំទូលាយជាងមុន ស្តីពីឧក្រិដ្ឋកម្មឃោរឃៅនៅក្នុងប្រវត្តិសាស្ត្រ ជាការសបញ្ជាក់អំពីជំហានឆ្ពោះទៅមុខរបស់សហគមន៍អន្តរជាតិ ក្នុងការទប់ស្កាត់ឧក្រិដ្ឋកម្មឃោរឃៅទាំងនេះពីការកកើតឡើងវិញ។
ដោយឡែក អ្នកនាំពាក្យក្រសួងកិច្ចការអឺរ៉ុប និងការបរទេសបារាំងប្រចាំប្រទេសកម្ពុជាបានលើកឡើងក្នុងសេចក្តីថ្លែងការណ៍មួយថា សេចក្តីសម្រេចធ្វើឡើងកាលពីថ្ងៃព្រហស្បតិ៍ ដែលជាការបិទបញ្ចប់នូវដំណើរការកាត់ក្តីរបស់តុលាការខ្មែរក្រហម គឺជាដំណាក់កាលដ៏សំខាន់មួយ។ តាមរយៈការថែរក្សា និងលើកស្ទួយតម្លៃនៃបណ្ណសាររបស់តុលាការ អាជ្ញាធរកម្ពុជានឹងអាចជួយបញ្រ្ជាបការចងចាំពីអំពើប្រល័យពូជសាសន៍ដល់ប្រជាពលរដ្ឋកម្ពុជាគ្រប់ជំនាន់។
អ្នកនាំពាក្យដដែលបានបញ្ជាក់បន្ថែមថា ប្រទេសបារាំងត្រៀមខ្លួនជាស្រេចដើម្បីជួយគាំទ្រដល់គោលដៅទាំងនេះ ហើយសូមបញ្ជាក់សារជាថ្មីពីការប្តេជ្ញាចិត្តខ្ពស់របស់ខ្លួន ចំពោះការលើកស្ទួយយុត្តិធម៌ និងការផ្សះផ្សា។
គួរបញ្ជាក់ផងដែរថា ចាប់តាំងពី អ.វ.ត.ក. បានបង្កើតឡើងនៅឆ្នាំ ២០០៦ មក អ.វ.ត.ក. បានទទួលភ័ស្តុតាងពីជនរងគ្រោះជាង ១០.៣០០នាក់ បានចេញសេចក្តីសម្រេចជាង ១.៣៤៥ និងបានបង្កើតកំណត់ហេតុតាមផ្លូវតុលាការ និងប្រវត្តិសាស្ត្រសម្រាប់កម្ពុជាចំនួន ៣ លានទំព័រ។
ភាគីរដ្ឋាភិបាលកម្ពុជា និងអង្គការសហប្រជាជាតិ ក៏បានឯកភាពគ្នាបន្តបំពេញមុខងារសំខាន់នានានៃមុខងារសេសសល់របស់សាលាក្តីខ្មែរក្រហមនៅឆ្នាំ ២០២៣ ផងដែរ ដើម្បីថែរក្សាកេរដំណែលអង្គជំនុំជម្រះវិសាមញ្ញក្នុងតុលាការកម្ពុជា រួមទាំងតាមរយៈការអនុញ្ញាតឱ្យសាធារណជនអាចចូលពិនិត្យមើលព័ត៌មាននៅក្នុងបណ្ណសាររបស់ អ.វ.ត.ក. ឱ្យបានទូលំទូលាយ និងផ្សព្វផ្សាយព័ត៌មានអំពីការងាររបស់ អ.វ.ត.ក.៕
ជំហានបន្ទាប់ក្រោយសាលាក្តីខ្មែរក្រហមបញ្ចប់ការជំនុំជម្រះ៖ ការអប់រំដើម្បីទប់ស្កាត់អំពើឃោរឃៅ
