តាមការគ្រោងទុក លោក ហ៊ុន ម៉ាណែត ដែលជាប្រធានយុវជនថ្នាក់កណ្តាល និងជាសមាជិកអចិន្ត្រៃយ៍នៃគណៈកម្មាធិការកណ្តាលរបស់គណបក្សប្រជាជនកម្ពុជា នឹងទៅប្រទេសចិនដើម្បីចូលរួមនៅក្នុងពិព័រណ៍ចិន-អាស៊ាន លើកទី២០ ឆ្នាំ២០២៣ ដែលនឹងប្រព្រឹត្តទៅនៅទីក្រុងណាននីង ខេត្តក្វាងស៊ី ប្រទេសចិន នាពាក់កណ្តាលខែកញ្ញា ឆ្នាំ២០២៣ ខាងមុខ។
គម្រោងទស្សនកិច្ចរបស់លោក ហ៊ុន ម៉ាណែត ទៅកាន់ប្រទេសចិនកើតមានឡើង បន្ទាប់ពីលោក វ៉ាង យី បានបិទបញ្ចប់ទស្សនកិច្ចរបស់លោកនៅកម្ពុជាកាលពីថ្ងៃអាទិត្យ។ ប្រមុខការទូតចិនរូបនេះបានជួបប្រាស្រ័យទាក់ទងជាមួយក្រុមមន្ត្រីកម្ពុជា និងប្រមុខរដ្ឋាភិបាលចាំផ្ទះកម្ពុជា គឺលោក ហ៊ុន សែន។
រដ្ឋមន្ត្រីការបរទេសចិន ជួបជាមួយលោក ហ៊ុន ម៉ាណែត និងថ្នាក់ដឹកនាំកម្ពុជា
អ្នកជំនាញកិច្ចការអន្តរជាតិ និងអ្នកវិភាគនយោបាយមានមតិចម្រុះជុំវិញទស្សនកិច្ចរបស់លោក វ៉ាង យី នៅកម្ពុជា និងសមត្ថភាពរបស់មេដឹកនាំថ្មីកម្ពុជា ក្នុងការទាញយកប្រយោជន៍ពីទំនាក់ទំនងកម្ពុជា និងចិន ដែលបានបង្កើតទំនាក់ទំនងដែកថែបជាមួយកម្ពុជា ហើយកំពុងស្ថិតក្នុងការប្រជែងយកឥទ្ធិពលភូមិសាស្ត្រនយោបាយជាមួយសហរដ្ឋអាមេរិក។
អ្នកស្រាវជ្រាវរបស់មជ្ឈមណ្ឌលសិក្សាអាស៊ីអាគ្នេយ៍នៃសាកលវិទ្យាល័យភូមិន្ទភ្នំពេញ លោក លឹម ឆាយ បានប្រាប់វីអូអេថា នៅពេលដែលប្រទេសទាំងពីរមានទំនាក់ទំនងល្អជាមួយគ្នា ថ្នាក់ដឹកនាំប្រទេសទាំងពីរនឹងផ្តល់ការគាំទ្រគ្នាទៅវិញទៅមកលើរបៀបវារៈជាក់លាក់ក្នុងវិស័យនយោបាយនិងការទូត។
ទោះជាយ៉ាងណា លោកព្រមានថា កម្ពុជាមិនត្រូវគិតតែដើរតាមដានជើងរបស់ចិននោះទេ ពីព្រោះវាអាចធ្វើឱ្យប៉ះពាល់ជាអវិជ្ជមានលើអធិបតេយ្យភាពនិងឯករាជ្យភាពនៃគោលនយោបាយការបរទេសនិយមកណ្តាលរបស់កម្ពុជា។
នៅពេលសួរពាក់ព័ន្ធនឹងទំនាក់ទំនងកម្ពុជានិងអាមេរិក លោក លឹម ឆាយ លើកឡើងថា កម្ពុជាមិនមានចេតនាក្នុងការស្តារលទ្ធិប្រជាធិបតេយ្យដូចអ្វីដែលអាមេរិកចង់បាននោះឡើយ។ លោកជំរុញឱ្យមានការជជែកគ្នាបន្ថែមរវាងភាគីទាំងពីរដើម្បីសហការគ្នាលើវិស័យដែលអាចសហការគ្នាបាន ជាជាងត្រឹមតែមនោគមន៍វិជ្ជា។
លោកប្រាប់វីអូអេថា៖ «វាច្បាស់ណាស់ថា កម្ពុជាគាំទ្រគោលនយោបាយចិនតែមួយហើយកម្ពុជាចាត់ទុកករណីនៅ Xinjiang ហុងកុង និងតៃវ៉ាន់ជាកិច្ចការផ្ទៃក្នុងរបស់ចិន ដោយមិនជ្រៀតជ្រែក។ ត្រឡប់មកវិញ ចិនគាំទ្រការអភិវឌ្ឍរបស់កម្ពុជា បើទោះបីជាកម្ពុជានៅក្រោមរបបលោក ហ៊ុន សែន រងការរិះគន់ពីលោកខាងលិចពាក់ព័ន្ធនឹងការរំលោភសិទ្ធិមនុស្សក៏ដោយ»។
អ្នកវិភាគនយោបាយ លោក សេង សារី ប្រាប់វីអូអេថា ការប្រកួតប្រជែងគ្នារវាងចិននិងអាមេរិកគឺកំពុងតែកើនកម្តៅនៅក្នុងតំបន់អាស៊ីអាគ្នេយ៍។
អ្នកវិភាគរូបនេះចោទសួរពីភាពវ័យឆ្លាតនៅក្នុងការរក្សាជំហររបស់កម្ពុជានៅក្នុងដំណាក់កាលដែលប្រទេសនេះមាននាយករដ្ឋមន្ត្រីថ្មី ហើយពិភពលោកកំពុងឃើញការប្រកួតប្រជែងខាងភូមិសាស្ត្រនយោបាយយ៉ាងស្រួចស្រាល់រវាងចិន និងសហរដ្ឋអាមេរិក។
លោកថ្លែងថា៖ «ថាតើកម្ពុជាហ្នឹង position (ជំហរ) ដាក់ទីតាំង កំណត់ទីតាំងរបស់ខ្លួននៅក្នុងការប្រកួតប្រជែងភូមិសាស្ត្រនយោបាយបច្ចុប្បន្ននេះដោយរបៀបណាដើម្បីធ្វើម៉េចអាចទាញផលប្រយោជន៍ឱ្យច្រើនបំផុតពីការប្រកួតប្រជែងឥទ្ធិពលរបស់មហាអំណាចទាំងពីរហ្នឹង»។
នៅក្នុងដំណើរទស្សនកិច្ចរយៈពីរថ្ងៃមកកាន់ប្រទេសកម្ពុជា លោក វ៉ាង យី បានជួបជាមួយមេដឹកនាំកម្ពុជាមួយចំនួនដូចជានាយករដ្ឋមន្ត្រីចាំផ្ទះលោក ហ៊ុន សែន លោក ហ៊ុន ម៉ាណែត នាយករដ្ឋមន្ត្រីដែលទើបតែងតាំងថ្មី លោក ប្រាក់ សុខុន រដ្ឋមន្ត្រីក្រសួងការបរទេសដែលនឹងចាកចេញពីតំណែងក្នុងពេលឆាប់ៗនេះ និងលោក សុខ ចិន្តាសោភា ដែលនឹងក្លាយជារដ្ឋមន្ត្រីការបរទេសថ្មីរបស់កម្ពុជា។
ក្រោយជួបលោក វ៉ាង យី លោក ហ៊ុន ម៉ាណែត បានបង្ហោះសារនៅលើទំព័រហ្វេសប៊ុករបស់លោកថា ភាគីទាំងពីរប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត។ ភាគីចិនក៏ត្រៀមទទួលស្វាគមន៍ដំណើរទស្សនកិច្ចផ្លូវការរបស់លោក ហ៊ុន ម៉ាណែត ទៅកាន់ប្រទេសចិននាពេលខាងមុខផងដែរ។
លោក ហ៊ុន ម៉ាណែត បានបញ្ជាក់ថា កម្ពុជានៅតែរក្សាគោល«ជំហរឥតប្រែប្រួល» របស់រដ្ឋាភិបាលថ្មីចំពោះគោលនយោបាយចិនតែមួយ និងការមិនជ្រៀតជ្រែកកិច្ចការផ្ទៃក្នុងរបស់ចិន។
លោក ហ៊ុន ម៉ាណែត បានបន្ថែមថា ភាគីទាំងពីរបានប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរឱ្យកាន់តែជិតស្និទ្ធតាមរយៈការថែរក្សាសមិទ្ធផលដែលមានកន្លងមក ក៏ដូចជាការពង្រីកទិសដៅកិច្ចសហប្រតិបត្តិការលើវិស័យថ្មីៗបន្ថែមទៀត ដូចជាវិស័យអគ្គិសនី ជាពិសេសវារីអគ្គិសនី ហេដ្ឋារចនាសម្ព័ន្ធ កសិកម្ម និងពាណិជ្ជកម្មជាដើម។
លោកបញ្ជាក់ដូច្នេះថា៖ «លើសពីនេះ ភាគីទាំងពីរក៏ឯកភាពនឹងបន្តកិច្ចសហប្រតិបត្តិការ និងផ្តល់ការគាំទ្រដល់គ្នាទៅវិញទៅមកផងដែរនៅក្នុងក្របខ័ណ្ឌតំបន់និងលើឆាកអន្តរជាតិ»។
បើតាមការបង្ហោះសារនៅទំព័រហ្វេសប៊ុករបស់ស្ថានទូតចិន នៅក្នុងជំនួបដាច់ដោយឡែកជាមួយរដ្ឋមន្ត្រីការបរទេសចិន លោក សុខ ចិន្តាសោភា បានលើកឡើងដោយរំពឹងថា ប្រទេសទាំងពីរនឹងបន្តលើកកម្ពស់លក្ខណៈយុទ្ធសាស្ត្រនៃទំនាក់ទំនងរវាងកម្ពុជានិងចិន ត្រួសត្រាយវិស័យសហប្រតិបត្តិការដើម្បីបង្កើតគំរូនៃការរួមគ្នាកសាង«ក្រវាត់ផ្លូវពាណិជ្ជកម្មចិន»ប្រកបដោយគុណភាពខ្ពស់។
បើតាមស្ថានទូតចិនដដែល ភាគីចិនរីករាយចូលរួមសហការជាមួយភាគីកម្ពុជាក្នុងការពង្រឹងសាមគ្គីភាពនិងកិច្ចសម្របសម្រួល ពង្រឹងក្របខ័ណ្ឌកិច្ចសហប្រតិបត្តិការ «ត្បូងពេជ្រ»រវាងចិន និងកម្ពុជា ដើម្បីធ្វើឱ្យទំនាក់ទំនងមិត្តភាពរវាងចិន និងកម្ពុជាមិនអាចបំផ្លាញបាន ភ្លឺចែងចាំង និងយូរអង្វែងដូចពេជ្រ។
អ្នកនាំពាក្យក្រសួងការបរទេសកម្ពុជា លោក អាន សុខខឿន មិនទាន់អាចផ្តល់ការអត្ថាធិប្បាយលម្អិតលើរបៀបវារៈពាក់ព័ន្ធជាមួយដំណើរទស្សនកិច្ចរបស់លោក ហ៊ុន ម៉ាណែត នៅឡើយទេ ដោយថា ក្រសួងកំពុងតែធ្វើការលើរឿងនេះ។
ដំណើរទស្សនកិច្ចរបស់រដ្ឋមន្ត្រីការបរទេសចិនលោក វ៉ាង យី មកកម្ពុជា និងគម្រោងទស្សនកិច្ចរបស់លោក ហ៊ុន ម៉ាណែត ទៅកាន់ប្រទេសចិនកើតមានឡើង ស្របពេលមានការប្រារព្ធខួបអនុស្សាវរីយ៍លើកទី៦៥ ឆ្នាំនៃទំនាក់ទំនងការទូតរវាងកម្ពុជា និងចិន។
លោក វ៉ាង យី បានក្លាយជាអ្នកការទូតបរទេសជាន់ខ្ពស់ដំបូងគេបង្អស់ដែលបានជួបលោក ហ៊ុន ម៉ាណែត បន្ទាប់ពីលោក ហ៊ុន ម៉ាណែត ត្រូវបានតែងតាំងជានាយករដ្ឋមន្រ្តីកម្ពុជា ហើយកូនប្រុសច្បងរបស់លោក ហ៊ុន សែន រូបនេះត្រូវគេរំពឹងថានឹងចូលកាន់អំណាចចាប់ពីថ្ងៃទី២២ ខែសីហា ឆ្នាំ២០២៣ នេះ៕
