នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅថ្ងៃអាទិត្យនេះ រដ្ឋមន្ត្រីការបរទេសចិនលោក Wang Yi ដែលមកបំពេញទស្សនកិច្ចនៅកម្ពុជា បានបង្ហាញក្តីសង្ឃឹមថា នៅក្រោមការដឹកនាំរបស់លោក ហ៊ុន ម៉ាណែត ដែលនឹងឡើងកាន់អំណាចនៅថ្ងៃទី ២២ ខែសីហាខាងមុខ កម្ពុជានឹងកាន់តែរីកចម្រើន។ ភាគីចិនបានប្រកាសថានឹងបន្តគាំទ្រកម្ពុជា។
សារដែលបានបង្ហោះនៅលើទំព័រហ្វេសប៊ុក (Facebook) របស់លោកនាយករដ្ឋមន្ត្រី ហ៊ុន សែន នៅថ្ងៃទី ១៣ ខែសីហានេះ បានលើកឡើងថា៖ «ឯកឧត្តម វ៉ាង យី [Wang Yi] បានសម្ដែងនូវការអបអរសាទរជូនចំពោះសម្ដេចតេជោ ដោយបានបញ្ជាក់ថា ដំណើរទស្សនកិច្ចរបស់ឯកឧត្តមមកកាន់កម្ពុជានាពេលនេះគឺដើម្បីបញ្ជាក់ជាថ្មីម្តងទៀតថាចិនគាំទ្រកម្ពុជា ហើយមានជំនឿថាក្រោមការដឹកនាំរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត កិច្ចសហប្រតិបត្តិការរវាងកម្ពុជានិងចិននឹងរីកចម្រើនឡើងកាន់តែធំធាត់ ហើយជាពិសេសកម្ពុជានឹងកាន់តែមានភាពរុងរឿងឡើងថែមទៀត»។
ក្រោយជួបលោក Wang Yi លោក ហ៊ុន ម៉ាណែត បានបង្ហោះសារនៅលើទំព័រហ្វេសប៊ុករបស់លោកថា ភាគីទាំងពីរប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរឱ្យកាន់តែជិតស្និទ្ធបន្ថែមទៀត។ ភាគីចិនក៏ត្រៀមទទួលស្វាគមន៍ដំណើរទស្សនកិច្ចផ្លូវការរបស់លោក ហ៊ុន ម៉ាណែត ទៅកាន់ប្រទេសចិននាពេលខាងមុខផងដែរ។
លោក ហ៊ុន ម៉ាណែត បានបញ្ជាក់ថា កម្ពុជានៅតែរក្សាគោល «ជំហរឥតប្រួលប្រែ» របស់រដ្ឋាភិបាលថ្មីចំពោះគោលនយោបាយចិនតែមួយនិងការមិនជ្រៀតជ្រែកលើកិច្ចការផ្ទៃក្នុងរបស់ចិន។
លោក ហ៊ុន ម៉ាណែត បានបន្ថែមថា ភាគីទាំងពីរបានប្តេជ្ញាបន្តលើកកម្ពស់កិច្ចសហប្រតិបត្តិការរវាងប្រទេសទាំងពីរឱ្យកាន់តែជិតស្និទ្ធតាមរយៈការថែរក្សាសមិទ្ធផលដែលមានកន្លងមក ក៏ដូចជាការពង្រីកទិសដៅកិច្ចសហប្រតិបត្តិការលើវិស័យថ្មីៗបន្ថែមទៀត ដូចជាវិស័យអគ្គិសនីជាពិសេសវារីអគ្គិសនី ហេដ្ឋារចនាសម្ព័ន្ធ កសិកម្ម និងពាណិជ្ជកម្មជាដើម។
លោកបញ្ជាក់ដូច្នេះថា៖ «លើសពីនេះ ភាគីទាំងពីរក៏ឯកភាពនឹងបន្តកិច្ចសហប្រតិបត្តិការ និងផ្តល់ការគាំទ្រដល់គ្នាទៅវិញទៅមកផងដែរនៅក្នុងក្របខ័ណ្ឌតំបន់និងលើឆាកអន្តរជាតិ»។
លោក Wang Yi បានធ្វើដំណើរទស្សនកិច្ចមកកម្ពុជា បន្ទាប់ពីលោកបានបំពេញទស្សនកិច្ចនៅប្រទេសសិង្ហបុរីនិងម៉ាឡេស៊ី។ ដំណើរទស្សនកិច្ចមកកម្ពុជារបស់លោកត្រូវបានមើលឃើញថាដើម្បីពង្រឹងទំនាក់ទំនងរវាងប្រទេសកម្ពុជានិងចិន។
ដំណើរទស្សនកិច្ចរបស់រដ្ឋមន្ត្រីការបរទេសចិនរូបនេះបានធ្វើឡើង ស្របពេលមានការប្រារព្ធខួបអនុស្សាវរីយ៍លើកទី ៦៥ ឆ្នាំនៃទំនាក់ទំនងការទូតរវាងកម្ពុជានិងចិន។
លោក Wang Yi បានក្លាយជាអ្នកការទូតជាន់ខ្ពស់បរទេសដំបូងគេបង្អស់ដែលបានជួបលោក ហ៊ុន ម៉ាណែត បន្ទាប់ពីលោក ហ៊ុន ម៉ាណែត ត្រូវបានចាត់តាំងជានាយករដ្ឋមន្រ្តីកម្ពុជាដោយនឹងកាន់អំណាចចាប់ពីថ្ងៃទី ២២ ខែសីហា។
នៅក្នុងដំណើរទស្សនកិច្ចមកកាន់កម្ពុជានេះ លោក Wang Yi មិនបានទទួលឆ្លើយសំណួរណាមួយពីអ្នកកាសែតនោះទេ។
គួរបញ្ជាក់ថាក្នុងគ្រាដែលរដ្ឋមន្រ្តីការបរទេសចិនមកបំពេញទស្សនកិច្ចនៅកម្ពុជា ប្រធានាធិបតីអាមេរិកលោក Joe Biden បានថ្លែងនៅក្នុងពិធីមួយនៅរដ្ឋ Utah កាលពីថ្ងៃសុក្រ ដោយលើកឡើងថាវៀតណាមនិងកម្ពុជាចង់ក្លាយជាផ្នែកមួយនៃទំនាក់ទំនងជាមួយអាមេរិក ហើយពួកគេចង់ប្រាប់ទៅប្រទេសចិនថាពួកគេមិននៅម្នាក់ឯងនោះទេ៕
