ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

របាយការណ៍​ថ្មី​​មួយ​​បង្ហាញ​រូបភាព​សោះកក្រោះ​​នៃកិច្ច​ខិតខំប្រឹងប្រែង​របស់​ស.រ.អា.​នៅ​ប៉ាគីស្ថាន


ទាហាន​ម៉ារីន​អាមេរិក​ម្នាក់​ចូលរួម​ក្នុង​ការ​ហ្វឹកហាត់​សម្រាប់​កង​កម្លាំង​កុម្ម៉ង់ដូ​អាហ្វហ្គានីស្ថាន នៅ​ក្នុង​ជំរំ​យោធា Shorab នៅ​ក្នុង​ខេត្តHelmand ប្រទេស​អាហ្វហ្គានីស្ថាន កាលពី​ថ្ងៃទី២៧ ខែសីហា ឆ្នាំ២០១៧។

របាយការណ៍​ថ្មីមួយ​បានបង្ហាញ​រូបភាព​សោះកក្រោះនៃកិច្ច​ខិតខំប្រឹងប្រែង​របស់​ស.រ.អា.​ក្នុង​ការ​ធ្វើ​ឱ្យ​ប្រទេស​អាហ្វហ្គានីស្ថាន​មាន​សន្តិសុខ ក្នុង​រយៈពេល​ជាង១៦​ឆ្នាំក្រោយ​ពីស.រ.អា.​បាន​ចូល​លុកលុយប្រទេស​ជាតិនេះ​ក្នុង​ទ្វីបអាស៊ី​ខាង​ត្បូងនៅ​ក្រោយ​ការ​វាយ​ប្រហារ​ភេរវកម្មកាល​ពី​ថ្ងៃ​ទី​១១ខែ​កញ្ញាឆ្នាំ២០០១។

នៅ​ពេល​នេះ​ការ​ទាក់ទិន​របស់​ស.រ.អា.​ក្នុង​ប្រទេស​អាហ្វហ្គានីស្ថាន​ជា​សង្គ្រាមយូរបំផុត​ក្នុង​ប្រវត្តិសាស្ត្រ​ស.រ.អា. ក៏ប៉ុន្តែអគ្គាធិការ​ពិសេសស​ម្រាប់​ការ​កសាង​ប្រទេស​អាហ្វហ្គានីស្ថាន​ជា​ថ្មី​ហៅ​កាត់​ថា​ SIGAR និយាយ​ថា​ការ​វាយ​ប្រហារ​យោធា​ដោយ​ស.រ.អា.​កាល​ពី​ពេល​ថ្មីៗ​នេះ​មិន​បាន​ធ្វើ​ឱ្យ​មាន​កំណើន​នៃ​ការ​ត្រួតត្រា​របស់​រដ្ឋាភិបាល​អាហ្វហ្គានីស្ថាន​លើ​ប្រជារាស្ត្រ​នៃ​ប្រទេស​នេះ​ទេ។​SIGAR បាននិយាយថា​ក្នុង​ខែ​តុលាតែ​មួយ​គត់ ស.រ.អា.​ដែល​មានទាហាន​១ម៉ឺន១ពាន់​នាក់​ក្នុង​ប្រទេស​អាហ្វហ្គានីស្ថាន​បាន​ទម្លាក់​គ្រាប់បែក

៦៥៣​គ្រាប់លើពួក​យុទ្ធជន​សត្រូវ ដែល​ជា​ចំនួន​ច្រើន​បំផុត​ចាប់តាំង​ពី​ឆ្នាំ២០១២មក​ហើយ​ជា​ចំនួន​បី​ដង​នៃ​ចំនួនកាល​ពី​ខែ​តុលាឆ្នាំ២០១៦។​

សេចក្តី​រាយការណ៍​នេះ​ក៏​ចែង​ដែរ​ថា​ចំនួន​ទាហានអាមេរិកាំង​ស្លាប់​ក៏​បានកើន​ច្រើន​ជាងមុនដែរដោយមាន​ទាហានអាមេរិកាំង​ស្លាប់១១នាក់​ក្នុង​១១ខែ​ដំបូង​នៃ​ឆ្នាំ​ទៅ​មិញ​ដែល​ជា​ចំនួនពីរ​ដង​នៃ​ចំនួន​ទាហាន​អាមេរិកាំង​បាត់បង់ជីវិត​ក្នុង​រយៈពេល​ដូចគ្នាកាល​ពី​ឆ្នាំ២០១៥​និង​ឆ្នាំ២០១៦។​

នៅ​ក្នុង​របាយការណ៍​ប្រចាំ​ត្រីមាសរបស់ខ្លួន​នៅ​ថ្ងៃ​អង្គារនេះ​ដាក់ជូនសភា​ស.រ.អា. និង​ក្រសួងការពារប្រទេសព្រម​ទាំង​ក្រសួង​ការបរទេស SIGAR បាននិយាយ​ថា​ទោះណាជា​មាន​ជំនួយ​ស.រ.អា.​ចំនួន​៨ពាន់៧រយលាន​ដុល្លារ​សម្រាប់កិច្ច​ខិតខំប្រឹងប្រែង​ប្រឆាំងនឹង​គ្រឿង​ញៀន​ក៏​ដោយ​ក៏​ការ​ផលិត​អាភៀន​បាន​កើន​ឡើង​៨៧ភាគរយ​កាល​ពីឆ្នាំទៅ​មិញ​ក្នុង​ប្រទេស​អាហ្វហ្គានីស្ថាន​ហើយ​ផ្ទៃដី​សម្រាប់ដាំ​អាភៀន​ក៏​បាន​កើនឡើង៦៣ភាគរយ​ដែរដែល​ជាចំនួនច្រើន​ជាង​ពេល​ណាៗ​ទាំងអស់៕

XS
SM
MD
LG