ការស្ទង់មតិថ្មីមួយនៃឆាកនយោបាយស.រ.អា.បង្ហាញថា លោក Donald Trump មហាសេដ្ឋីអចលនទ្រព្យមានប្រាក់រាប់ពាន់លានដុល្លារនាំមុខគេនៅក្នុងការប្រកួតប្រជែង ដើម្បីឱ្យបានទទួលការតែងតាំងជាបេក្ខជនប្រធានាធិបតីស.រ.អា.ខាងគណបក្សសាធារណរដ្ឋ ហើយលោកស្រី Hillary Clinton អតីតរដ្ឋមន្ត្រីការបរទេសស.រ.អា.មានការគាំទ្រច្រើននៅក្នុងការប្រកួតប្រជែងខាងគណបក្សប្រជាធិបតេយ្យ។
ការស្ទង់មតិរបស់ CNN និង ORC បង្ហាញថា ៤៩ភាគរយនៃសមាជិកគណបក្សសាធារណរដ្ឋគាំទ្រលោក Trump គឺច្រើនជាងការគាំទ្រដល់សមាជិកបួននាក់រួមគ្នា។ គូប្រជែងកៀកបំផុតរបស់លោក គឺលោក Marco Rubio សមាជិកព្រឹទ្ធសភាស.រ.អា.ប្រចាំរដ្ឋ Florida ដែលមានការគាំទ្រ១៦ភាគរយហើយបន្ទាប់មកលោក Ted Cruz ដែលជាសមាជិកព្រឹទ្ធសភាអាមេរិកាំងប្រចាំរដ្ឋ Texas មានការគាំទ្រ១៥ភាគរយ។
នៅក្នុងការប្រកួតប្រជែងខាងគណបក្សប្រជាធិបតេយ្យ ការស្ទង់មតិនេះបានបង្ហាញថា លោកស្រី Clinton ដែលជាអ្នកការទូតកំពូលរបស់ប្រទេសអាមេរិកពីឆ្នាំ២០០៩ដល់ឆ្នាំ២០១៣មានការគាំទ្រច្រើនលើសលោក Bernie Sanders សមាជិកព្រឹទ្ធសភាស.រ.អា.ប្រចាំរដ្ឋ Vermont ដែលជាអ្នកសង្គមនិយមប្រជាធិបតេយ្យ៥៥ភាគរយទល់នឹង៣៨ភាគរយ។
ទាំងក្រុមសាធារណរដ្ឋ ទាំងក្រុមប្រជាធិបតេយ្យប្រុងប្រៀបស្រេចហើយសម្រាប់ការប្រកួតប្រជែងនៅថ្ងៃអង្គារនេះនៅក្នុងរដ្ឋ១១ដែលជាថ្ងៃបោះឆ្នោតធំបំផុតរហូតមកដល់ពេលនេះនៅក្នុងយុទ្ធនាការឃោសនាបោះឆ្នោតច្រើនខែមកហើយ។
លោក Trumpមានការគាំទ្រច្រើននៅក្នុងរដ្ឋ១០ក្នុងបណ្តារដ្ឋទាំងនេះ នៅថ្ងៃដែលហៅថាថ្ងៃបោះឆ្នោតបឋមរួមថ្ងៃអង្គារនៅជាង១០រដ្ឋ ដែលហៅជាភាសាអង់គ្លេសថា «Super Tuesday» លើកលែងតែនៅក្នុងរដ្ឋ Texas ក្នុងប៉ែកនិរតីនៃប្រទេសអាមេរិកដែលនៅទីនោះលោក Cruz សង្ឃឹមថានឹងឈ្នះនៅក្នុងទឹកដីរបស់លោក។
លោកស្រី Clinton រំពឹងថានឹងឈ្នះឆ្នោតមានការគាំទ្រច្រើន នៅពេលលោកស្រីប្រឈមមុខនឹងលោក Sanders ដែលបានធ្វើការឃោសនាបោះឆ្នោតប្រឆាំងនឹងភាពមិនស្មើគ្នាដែលមានច្រើនឡើងៗនៃប្រាក់ចំណូលនៅក្នុងប្រទេសនិងជំទាស់នឹងឥទ្ធិពលនៃក្រុមហ៊ុនហិរញ្ញវត្ថុធំៗនៅ Wall Street៕
