អ្នកស្ម័គ្រចិត្តរបស់ទីភ្នាក់ងារភីសខ័រ (Peace Corps) របស់សហរដ្ឋអាមេរិក ជួយបង្កើនការប្រើប្រាស់ភាសាអង់គ្លេស និងការអប់រំដល់ប្រជាជនតាមជនបទរាប់ម៉ឺននាក់នៅកម្ពុជាក្នុងរយៈពេល១០ឆ្នាំ។ នេះបើតាមការឲ្យដឹងពីភ្នាក់ងារភីសខ័រប្រចាំកម្ពុជា។
ថ្លែងក្នុងពិធីស្បថចូលធ្វើការរបស់ក្រុមអ្នកស្ម័គ្រចិត្តថ្មីរបស់ភីសខ័រចំនួន៦៩នាក់ នាថ្ងៃសុក្រនេះ នាយិកាភ្នាក់ងារភីសខ័រប្រចាំកម្ពុជា លោកស្រី ស៊ូសាន ដ្ធាយើ (Susan Dwyer) មានប្រសាសន៍ថា ភីសខ័របានអនុវត្តកម្មវិធីធំៗពីរគឺ ការបណ្តុះបណ្តាលគ្រូបង្រៀន និងបង្រៀនភាសាអង់គ្លេស និងការអប់រំសុខភាពសហគមន៍។
លោកស្រីបន្ថែមថា អ្នកស្ម័គ្រចិត្តភីសខ័រ បានបម្រើប្រជាជនខ្មែររាប់ម៉ឺននាក់តាមរយៈការធ្វើការយ៉ាងជិតស្និទ្ធក្នុងសហគមន៍ ដើម្បីលើកកម្ពស់ការស្វែងយល់គ្នាទៅវិញទៅមកឲ្យបានច្រើនរវាងជនជាតិខ្មែរ និងអាមេរិក តាមរយៈការនិយាយភាសាខ្មែរ សិក្សាពីវប្បធម៌ខ្មែរ និងរស់នៅប្រទេសកម្ពុជារយៈពេលពីរឆ្នាំ។
លោកស្រី Susan Dwyer បានថ្លែងប្រាប់អ្នកសារព័ត៌មានបន្ថែមយ៉ាងដូច្នេះថា៖ «យើងមានអ្នកស្ម័គ្រចិត្តជាច្រើនដែលធ្វើការអស់រយៈពេល១០ឆ្នាំនៅក្នុងថ្នាក់រៀនជាមួយសមភាគីគ្រូផ្សេងទៀត ដើម្បីពង្រឹងការបង្រៀន និងការនិយាយភាសាអង់គ្លេសនៅកម្ពុជា។ រឿងដទៃទៀតនោះគឺអ្វីដែលក្រុមអ្នកស្ម័គ្រចិត្ត Peace Corps បានធ្វើនោះគឺយើងមានអ្នកស្ម័គ្រចិត្តអប់រំការថែទាំសុខភាពនៅតាមសហគមន៍ ដូច្នេះយើងធ្វើការជាមួយសហគមន៍ដើម្បីជំរុញការអប់រំផ្នែកសុខភាពឲ្យដឹងថាអ្វីជាអនាម័យល្អ សុខភាពមាតា ឬក៏អាហារូបត្ថម្ភល្អ។ ពួកគេបានធ្វើការនៅក្នុងសហគមន៍ ដើម្បីជំរុញការអប់រំផ្នែកសុខភាព»។
នៅព្រឹកថ្ងៃសុក្រនេះ សមាជិកថ្មីនៃអ្នកស្ម័គ្រចិត្តរបស់ទីភ្នាក់ងារ Peace Corps មកពីអាមេរិកចំនួន៦៩នាក់ បានចូលស្បថបំពេញការងារតាមបណ្ដាខេត្តចំពេលនៃការប្រារព្ធខួបលើកទី១០ នៃវត្តមានរបស់ទីភ្នាក់ងារ Peace Corps នៅកម្ពុជា។
ទីភ្នាក់ងារ Peace Corps បង្កើតឡើងក្នុងឆ្នាំ ១៩៦១ ដោយលោកប្រធានាធិបតីសហរដ្ឋអាមេរិក John F. Kennedy ដើម្បីជំរុញសន្តិភាព និងមិត្តភាពក្នុងពិភពលោក។
ទីភ្នាក់ងារនេះបង្កើតឡើងក្នុងគោលបំណងកសាងសមត្ថភាពរបស់មនុស្សប្រុស ស្រី ក្នុងប្រទេសដែលមានការពាក់ព័ន្ធ និងលើកកម្ពស់ការយល់គ្នា រវាងសហរដ្ឋអាមេរិក និងប្រទេសដទៃ។
ក្នុងចំណោមយុវជនដែលជាអ្នកស្ម័គ្រចិត្តភីសខ័ររបស់សហរដ្ឋអាមេរិកចំនួន៦៩នាក់ ក៏មានយុវជនដើមកំណើតខ្មែរម្នាក់ផងដែរគឺ នាង កឹម ថាច់។ នាងមានឪពុកម្ដាយពីខេត្តបាត់ដំបង ហើយទើបតែបញ្ចប់បរិញ្ញាបត្រផ្នែកគ្រូបង្រៀននៅសហរដ្ឋអាមេរិក។
យុវតីខ្មែរ អាមេរិកាំង វ័យ២៥ឆ្នាំរូបនេះ ថ្លែងប្រាប់ VOA ថា នាងស្ម័គ្រចិត្តជាមួយភ្នាក់ងារភីសខ័រដើម្បីជួយបង្រៀនភាសាអង់គ្លេសដល់អ្នកភូមិ និងរៀនពីរបៀបទំនាក់ទំនងក្នុងខេត្តបាត់ដំបងដែលជាស្រុកកំណើតរបស់ឪពុកម្ដាយនាង ដើម្បីជួយសហគមន៍រយៈពេលពីរឆ្នាំ។
នាង កឹម ថាច់ បញ្ជាក់ថា៖ «ខ្ញុំស្ម័គ្រចិត្តធ្វើគ្រូបង្រៀនឲ្យកូនសិស្សដែលអត់មានលុយ និងខ្ញុំចង់ជួយសហគមន៍ខ្ញុំ»។
យុវជនស្ម័គ្រចិត្តម្នាក់ទៀត ឈ្មោះ Rajath Kenath សង្ឃឹមថា កម្មវិធីនេះនឹងជួយឲ្យលោកយល់ដឹងកាន់តែច្រើនពីវប្បធម៌របស់កម្ពុជា និងអភិវឌ្ឍខ្លួនបានកាន់តែប្រសើរពេលត្រឡប់ទៅអាមេរិកវិញ។
លោក Rajath Kenath ថ្លែងថា លោកចូលចិត្តរស់នៅកម្ពុជាដែលពោរពេញដោយមនុស្សរួសរាយរាក់ទាក់ និងវប្បធម៌ល្អៗ ក្រោយលោកបានស្នាក់នៅខេត្តកណ្ដាលចំនួនពីរខែដើម្បីរៀនភាសាខ្មែររួចមក។
លោកបន្ថែមថា៖ «កម្ពុជាជាប្រទេសស្អាតណាស់។ មនុស្សនៅកម្ពុជា ជាមនុស្សរួសរាយ ឧទាហរណ៍ គ្រួសារខ្ញុំនៅកណ្ដាលរួសរាយច្រើន ធ្វើម្ហូបសម្រាប់ខ្ញុំច្រើនឆ្ងាញ់ៗ និយាយជាមួយខ្ញុំ និងមនុស្សនៅកម្ពុជាជាមនុស្សឧស្សាហ៍»។
លោក គង់ ថាន់ ប្រជាពលរដ្ឋក្នុងខេត្តកំពង់ធំដែលផ្ដល់ផ្ទះឲ្យអ្នកស្ម័គ្រចិត្តភីសខ័រស្នាក់នៅចំនួន៣លើកនៅ៦ឆ្នាំចុងក្រោយនេះ បានប្រាប់អ្នកសារព័ត៌មានក្នុងពិធីនោះថា ក្រុមស្ម័គ្រចិត្តភីសខ័រ បានជួយឲ្យអ្នកភូមិរបស់លោក ចេះនិយាយភាសាអង់គ្លេស និងមានការប្រាស្រ័យទាក់ទងផ្នែកភាសាកាន់តែច្រើន។
លោកមានប្រសាសន៍ថា៖ «បានគ្រូពីបរទេសមក គ្រូស្ម័គ្រចិត្តមកអញ្ចឹង មានបានបង្ហាត់ភាសាច្រើន ចឹងស្រួលមករៀននៅភ្នំពេញគាត់បានចេះខ្លះ។ ពីជំនាន់ដែលអត់ទាន់ដាក់ កូនខ្ញុំកូនគេមករៀននៅភ្នំពេញរៀនភាសាអង់គ្លេសអត់ទាន់គេទេ ដល់មកទៅដូចកូនខ្ញុំមករៀនអត់ទាន់គេ។ បានគ្រូបង្ហាត់ចឹងគាត់បានរៀនចេះដឹងខ្លះ។ គាត់មកនេះរៀនឆាប់បានទាន់គេ»។
លោក អ៊ឹម កុច រដ្ឋលេខាធិការក្រសួងអប់រំ យុវជន និងកីឡា មានប្រសាសន៍ថា ទីភ្នាក់ងារភីសខ័រ បានជួយឲ្យមានការសហការគ្នារវាងក្រុមអ្នកស្ម័គ្រចិត្ត និងប្រជាជនក្នុងការបង្កើននូវទំនាក់ទំនង ជាពិសេសធ្វើឲ្យប្រសើរឡើងនូវភាសាអង់គ្លេសដែលជាភាសាសំខាន់ជាអន្តរជាតិ។
«បានរួមចំណែកបណ្ដុះបណ្ដាលផ្នែកខាងភាសាអង់គ្លេស ហើយនិងបណ្ដុះបណ្ដាលគំនិតឲ្យចេះគិត ចេះពិចារណា ម្យ៉ាងទៀតយុវជនជំនាន់ក្រោយក្តី សព្វថ្ងៃហ្នឹងពោរពេញដោយការយល់គ្នាក្នុងពិភពលោក ដើម្បីកសាងសុខសន្តិភាពលើពិភពលោក ឲ្យរីកចម្រើន ឲ្យមានជំនាញ អញ្ចឹងអង់គ្លេសគឺជាមូលដ្ឋានគ្រឹះនៃការសិក្សាចាប់យកជំនាញផ្សេងៗទៀត»។
ក្រសួងអប់រំកម្ពុជា បានចុះអនុស្សរណៈយោគយល់ជាមួយទីភ្នាក់ងារភីសខ័រក្នុងឆ្នាំ២០០៦។
ចាប់ពីឆ្នាំ២០០៧ រហូតមកដល់២០១៦នេះ មានអ្នកស្ម័គ្រចិត្ត Peace Corps ចំនួន៤៦៥នាក់ បានមកដល់កម្ពុជា។
អ្នកស្ម័គ្រចិត្តដែលមានអាយុចាប់ពី២១ឆ្នាំ ដល់៦៣ឆ្នាំ បានទៅរស់នៅ និងធ្វើការស្ម័គ្រចិត្តនៅសហគមន៍ តាមរាជធានី ខេត្តចំនួន១៧ទូទាំងប្រទេសកម្ពុជា។ នេះបើតាមការឲ្យដឹងពីភ្នាក់ងារភីសខ័រប្រចាំកម្ពុជា៕
