ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេ​បញ្ជាការ​ថ្មី​នៃ​កង​នាវា​ស.រ.អា.នៅ​មហា​សមុទ្រ​ប៉ាស៊ីហ្វិក​ទទួល​ស្គាល់​អំពី​ក្តី​បារម្ភ‍​របស់​ក្រុម​សម្ព័ន្ធមិត្ត


លោក​នាយ​ឧត្តម​នាវី​ជើង​ទឹក Scott Swift ដែល​ជា​មេ​បញ្ជាការ​ថ្មី​​​នៃ​កង​នាវា​​កងទ័ព​ជើង​ទឹក​របស់​សហរដ្ឋ​អាមេរិក​ប្រចាំ​នៅ​មហា​សមុទ្រ​ប៉ាស៊ីហ្វិក​ថ្លែង​នៅ​ក្នុង​បទសម្ភាសន៍​ជាមួយ​អ្នក​សារព័ត៌មាន​កាលពី​ថ្ងៃទី១៧ ខែកក្កដា ឆ្នាំ២០១៥ នៅ​ក្នុង​ម៉ានីល ប្រទេស​ហ្វីលីពីន។
លោក​នាយ​ឧត្តម​នាវី​ជើង​ទឹក Scott Swift ដែល​ជា​មេ​បញ្ជាការ​ថ្មី​​​នៃ​កង​នាវា​​កងទ័ព​ជើង​ទឹក​របស់​សហរដ្ឋ​អាមេរិក​ប្រចាំ​នៅ​មហា​សមុទ្រ​ប៉ាស៊ីហ្វិក​ថ្លែង​នៅ​ក្នុង​បទសម្ភាសន៍​ជាមួយ​អ្នក​សារព័ត៌មាន​កាលពី​ថ្ងៃទី១៧ ខែកក្កដា ឆ្នាំ២០១៥ នៅ​ក្នុង​ម៉ានីល ប្រទេស​ហ្វីលីពីន។

មេ​បញ្ជាការ​ថ្មី​នៃ​កង​នាវាកងទ័ព​ជើង​ទឹក​របស់​សហរដ្ឋ​អាមេរិក​ប្រចាំ​នៅ​មហា​សមុទ្រ​ប៉ាស៊ីហ្វិក​កំពុង​ព្យាយាម​ស្តារ​ជា​ថ្មី​នូវ​ការ​ជឿ​ទុក​ចិត្ត​ពី​សំណាក់សម្ព័ន្ធមិត្ត​ក្នុង​តំបន់​ទ្វីប​អាស៊ី​ថា​ កងកម្លាំង​យោធា​សហរដ្ឋ​អាមេរិក​នឹង​បន្ត​ធ្វើ​នយោបាយ​រក្សា​តុល្យភាព​អំណាច​នៅ​អាស៊ី​ខណៈ​ពេល​មាន​ក្តី​បារម្ភ​ជុំវិញ​ការ​ពង្រីក​កង​ទ័ព​ជើង​ទឹក​របស់​ចិន​នៅ​ក្នុង​ដែន​សមុទ្រ។​

ចាប់​តាំង​ពី​លោក​នាយ​ឧត្តម​នាវី​ Scott Swift ចូល​កាន់​តំណែង​កាល​ពី​៣ខែ​មុន​ជា​មេ​បញ្ជាការ​នៅ​ឯ​កង​នាវា​ប្រចាំ​នៅ​តំបន់​ប៉ាស៊ីហ្វិក​ លោក​បាន​ធ្វើ​ដំណើរ​ទៅ​កាន់​ ប្រទេស​ហ្វីលីពីន​ កូរ៉េ​ខាងត្បូង​ ជប៉ុន​ អូស្ត្រាលី នូវែលសេឡង់​ និង​ម៉ាឡេស៊ី ដើម្បី​ជួប​ជាមួយ​សមភាគី​កង​ទ័ព​ជើង​ទឹក​របស់​ប្រទេស​ទាំង​នោះ។

មុន​នឹង​លោក​ធ្វើ​ដំណើរ​ទៅ​កាន់​ប្រទេស​សិង្ហបុរី​ លោក​នាយ​ឧត្តម​នាវី​បាន​និយាយ​ជាមួយ​នឹង​ក្រុម​អ្នក​យក​ព័ត៌មាន​តាម​រយៈ​ទូរស័ព្ទ​ នៅ​ពេល​លោក​កំពុង​ស្ថិត​នៅ​ក្នុង​ទីក្រុង​គូឡាឡាំពួ ប្រទេស​ម៉ាឡេស៊ី។

លោក​នាយ​ឧត្តម​នាវី​រូប​នេះ​បាន​ទទួល​ស្គាល់​ថា​ រាល់​កន្លែង​ដែល​លោក​បាន​ធ្វើ​ដំណើរ​ទៅ​ដល់នោះ​ សុទ្ធ​តែ​មាន​ការ​ភ័យបារម្ភ​ខ្លាំង​អំពី​ទំហំ​និង​វិសាលភាព​នៃសកម្មភាព​ចាក់​ដី​ពង្រីក​និង​ស្ថាបនា​កោះ​សិប្បនិម្មិត​របស់រដ្ឋាភិបាល​ចិន​នៅ​ក្នុង​ដែន សមុទ្រ​ចិន​ខាង​ត្បូង។​

«ពួកគេ​ទាំង​អស់​បាន​បង្ហាញ​ពី​ការ​ព្រួយ​បារម្ភ​និង​ភាព​មិន​ប្រាកដ​ប្រជា​អំពី​អ្វី​ដែល​នឹង​កើត​មាន​ឡើង​នា​ពេល​អនាគត។​ ប៉ុន្តែ​ខ្ញុំ​គិត​ថា​ អ្វី​ដែល​សំខាន់​បំផុត​នោះ​គឺ​ ការ​រួប​រួម​គ្នា​ជា​ពហុភាគី​ និង​រក​វិធី​ក្នុង​ការ​ផ្សះផ្សា​ការ​ខ្វែង​គំនិត​គ្នា​នៅ​ក្នុង​តំបន់ ​ក្នុង​ការ​ទាមទារ​ដោយ​លក្ខណៈ​វិជ្ជមាន​ និង​មិន​អនុញ្ញាត​ឲ្យមាន​ការ​ប្រើ​ការ​បង្ខិត​បង្ខំ​ ឬ​កម្លាំង​យោធា​ ជា​ឈ្នាន់​ក្នុង​ការ​ដោះស្រាយ​ជម្លោះ​ដើម្បីឲ្យ​មាន​ប្រយោជន៍​ដល់​ភាគី​ណា​មួយ​នោះ​ទេ»។

VOA បាន​សាកសួរ​លោក​នាយ​ឧត្តម​នាវី​ Swift អំពី​មន្ទិល​របស់​សម្ព័ន្ធមិត្ត​ចំពោះ​ការ​ប្តេជ្ញា​របស់​យោធាសហរដ្ឋអាមេរិក​ ក្នុង​ការ​រក្សា​គោលនយោបាយ​ធ្វើ​ឲ្យ​មាន​តុល្យភាព​អំណាច​និង​វត្តមាន​នៅ​ក្នុង​តំបន់​ប៉ាស៊ីហ្វិក ឬ​ហៅ​ថា Pacific Pivot ដែល​ខ្លួន​បាន​ផ្សព្វផ្សាយ​យ៉ាង​ច្រើន​នោះ។​

«(ការ​ភ័យ​បារម្ភ​របស់​សម្ព័ន្ធមិត្ត​នេះ)​ មិនឆ្លុះ​បញ្ចាំង​ឲ្យ​ឃើញ​ពី​សមត្ថភាព​របស់​សហរដ្ឋ​អាមេរិក​ប៉ុន្មាន​ទេ​ក្នុង​ការ​គាំទ្រ​ការ​ផ្តោត​ជា​ថ្មី​នេះ។ សំខាន់​ជាង​នេះ វា​ហាក់​ដូច​ជា​ការ​ឆ្លុះ​បញ្ចាំង​ឲ្យ​ឃើញ​ពី​ការ​ព្រួយ​បារម្ភ​ជុំវិញ​បញ្ហា​នេះ​ច្រើន​ជាង​ ដូច​ដែល​លោក​បាន​ដឹង​ហើយ​ថា​ ប្រទេស​ជា​ច្រើន​កំពុង​តែ​ព្រួយ​បារម្ភ​ថា​ តើ​នឹង​មាន​អ្វី​កើត​ឡើង​នា​ពេល​អនាគត។​ ហើយ​ប្រទេស​ទាំង​នេះ​ជា​ច្រើន​បាន​ងាក​មក​រក​សហរដ្ឋអាមេរិក​ ដែល​ជា​ប្រទេស​ដែលអាច​ធានា​បាន​នូវ​ស្ថិរភាព​ដែល​ពួកគេ​ធ្លាប់​មាននៅ​ក្នុង​តំបន់​ ក្នុង​រយៈ​ពេល​៧០​ឆ្នាំ​កន្លង​មក​នេះ»។​

ផែនការយុទ្ធសាស្ត្រ​មេ​ទាក់ទង​នឹង​សន្តិសុខ​សមុទ្រ​របស់​ក្រសួង​ការពារ​ប្រទេស​អាមេរិក​ ចេញ​ផ្សាយ​កាល​ពី​សប្តាហ៍​មុន​ បាន​បង្ហាញ​ថា​ ៦០ភាគរយ​នៃ​គ្រឿង​សព្វាវុធ​របស់​កង​ទ័ព​ជើង​ទឹក និង​កងទ័ព​អាកាស​នឹង​ត្រូវ​ដឹក​ទៅ​ដល់តំបន់​អាស៊ី​ប៉ាស៊ីហ្វិក​ត្រឹម​ឆ្នាំ២០២០។​ ប្រទេស​ជប៉ុន​នឹង​ជា​មូលដ្ឋាន​ដ៏​សំខាន់​ជាមួយ​ ហើយ​កោះ​ Guam​ ដែល​ជា​មណ្ឌល​យុទ្ធសាស្ត្រ​ដ៏​សំខាន់​មួយ ហើយ​នឹង​មាន​ការ​ធ្វើ​ជា​ដៃ​គូ​ជាមួយ​នឹង​ប្រទេស​វៀតណាម​ និង​ឥណ្ឌា​ ដែល​ប្រទេស​ទាំង​ពីរជារបស់​គូ​ប្រជែង​ជាមួយ​នឹង​ប្រទេស​ចិន។​ ហើយ​ប្រតិបត្តិការ​យោធា​រួម​នឹង​ត្រូវ​បាន​ពង្រីក​ជាមួយ​ប្រទេស​ ឥណ្ឌូណេស៊ី​ ជប៉ុន​ និង​ម៉ាឡេស៊ី។

លោក​នាយ​ឧត្តម​នាវី​ថ្លែង​ថា​ ផែនការ​នោះ​នឹង​អាច​ធានា​បាន​ឡើង​វិញ​នូវ​ការ​ប្តេជ្ញា​ចិត្តរបស់​កង​ទ័ព​ជើង​ទឹក​របស់​សហរដ្ឋ​អាមេរិក​នៅ​ក្នុង​តំបន់​នោះ។

«មាន​ឧទាហរណ៍​ជា​ច្រើន​ដែល​មិន​មែន​តែ​អំពី​សមត្ថភាព​ក្នុង​ពង្រាយ​ទ័ព​ជួរ​មុខ​ប៉ុណ្ណោះ​ទេ​ ប៉ុន្តែ​អំពី​ប្រសិទ្ធភាព​ផង​ដែរ»។​

លោក​នាយ​ឧត្តម​នាវី​ជើង​ទឹក Swift​ ថ្លែង​ថា​ លោក​មាន​បំណង​ចង់​ធានា​ថា​ កង​នាវា​នៅ​តំបន់​មហា​សមុទ្រ​ប៉ាស៊ីហ្វិក​គឺ​ជា «កង​កម្លាំង​ដែល​មាន​ជម្រើស​ទី​១​ក្នុង​ការ​ឆ្លើយ​តប​ទៅ​ឧបទ្ទវហេតុ​ដែល​អាច​នឹង​កើត​ឡើង​នៅ​ក្នុង​តំបន់​នោះ‍»។

លោក​នាយ​ឧត្តម​នាវីដែល​កាលពី​មុន​ លោក​កាន់​កាប់​នៅ​កង​នាវា​ទី៧ ដែល​ជា​មូលដ្ឋាន​ទ័ព​នៅ​ជប៉ុន​និង​កូរ៉េ​ខាង​ត្បូង ក៏​កំពុង​បង្ហាញ​អំពី​ក្តី​សង្ឃឹម​ក្នុង​ការពង្រីក​ទំនាក់ទំនង​ជាមួយ​កង​នាវា​របស់​ចិន និង​ឆ្មាំ​សមុទ្រ ដើម្បី​ព្យាយាម​ «កាត់​បន្ថយ​កត្តា​ដែល​បង្ក​អស្ថិរភាព​នៅ​ក្នុង​តំបន់‍»៕

ប្រែសម្រួល​ដោយ ស្រេង​ លក្ខិណា​

XS
SM
MD
LG