ការសិក្សាថ្មីមួយរបស់ក្រុមអ្នកស្រាវជ្រាវសហរដ្ឋអាមេរិកបានបង្ហាញថា វីរុសកូរ៉ូណាដែលបង្កឲ្យកើតជំងឺកូវីដ១៩ ដែលគេបានរកឃើញដំបូងនៅក្នុងទីក្រុង Wuhan ប្រទេសចិន ប្រហែលជាបានចាប់ផ្ដើមឆ្លងរាលដាលរួចមកហើយ មុនពេលការផ្ទុះឡើងនេះត្រូវបានផ្សព្វផ្សាយដល់ពិភពលោក។
អ្នកវិទ្យាសាស្ត្រនៃមជ្ឈមណ្ឌលវេជ្ជសាស្ត្រ Harvard សាកលវិទ្យាល័យសុខភាពសាធារណៈ Boston និងមន្ទីរពេទ្យកុមារ Boston បានបញ្ជាក់ថា រូបភាពផ្កាយរណបនៃកន្លែងចតរថយន្តរបស់មន្ទីរពេទ្យនានានៅក្នុងទីក្រុង Wuhan បានបង្ហាញឲ្យឃើញនូវ «ការកើនឡើងខ្លាំង» នូវចរាចរ ចាប់តាំងពីខែសីហាឆ្នាំមុនមកម្ល៉េះ និងកើនឡើងខ្លាំងបំផុតនៅខែធ្នូ ដែលជាពេលដែលរដ្ឋាភិបាលចិនបានប្រាប់អង្គការសុខភាពពិភពលោកអំពីជំងឺថ្មីដែលគេដាក់ឈ្មោះថាកូវីដ១៩ នេះ។
រូបភាពផ្កាយរណបមួយបង្ហាញថា មន្ទីរពេទ្យ Tianyou ដែលស្ថិតក្នុងការសិក្សាស្រាវជ្រាវនេះ មានរថយន្តចំនួន ២៨៥ គ្រឿង នៅកន្លែងចតរថយន្តកាលពីខែតុលា ឆ្នាំ ២០១៩ ដែលជាការកើនឡើងចំនួន ៦៧ គ្រឿង បើប្រៀបធៀបទៅនឹងមួយឆ្នាំមុន ដែលមានចំនួន ១៧១ គ្រឿង។
ការសិក្សាស្រាវជ្រាវនេះក៏បានបង្ហាញផងដែរថា ការកើនឡើងនៃចរាចរចេញចូលនៅតាមមន្ទីរពេទ្យនេះ កើតឡើងស្របគ្នានឹងពេលដែលមានការស្វែងរកព័ត៌មានតាមប្រព័ន្ធ Baidu របស់ចិន លើអ៊ីនធឺណិតនូវពាក្យ «ក្អក» និង «រាគរូស»។
សេចក្ដីសង្ខេបនៃការសិក្សាស្រាវជ្រាវនេះ ដែលកំពុងស្ថិតក្រោមការត្រួតពិនិត្យ ត្រូវបានផ្សព្វផ្សាយកាលពីថ្ងៃចន្ទលើកន្លែងផ្ទុកព័ត៌មានអនឡាយសម្រាប់ការស្រាវជ្រាវនៃសាកលវិទ្យាល័យ Harvard៕
