ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

វិធីព្យាបាល​ថ្មី​ដោយ​ការ​លេបថ្នាំ​មាន​ប្រសិទ្ធភាព​ចំពោះ​អ្នក​ជំងឺ​របេង​រ៉ាំរ៉ៃ


រូបឯកសារ៖ អ្នកជំងឺរបេងម្នាក់លើកថ្នាំមើលនៅមន្ទីរពេទ្យមួយក្នុងក្រុង Varanasi ប្រទេសឥណ្ឌា កាលពីថ្ងៃទី១៣ ខែមីនា ឆ្នាំ២០១៨។ 
រូបឯកសារ៖ អ្នកជំងឺរបេងម្នាក់លើកថ្នាំមើលនៅមន្ទីរពេទ្យមួយក្នុងក្រុង Varanasi ប្រទេសឥណ្ឌា កាលពីថ្ងៃទី១៣ ខែមីនា ឆ្នាំ២០១៨។ 

រដ្ឋាភិបាល​ប្រទេសអាហ្រ្វិក​ខាងត្បូង​បាន​ប្រកាស​ថា​ ខ្លួន​មាន​ផែនការ​ដាក់​ឲ្យ​ប្រើប្រាស់​វិធីព្យាបាល​ថ្មី​ដោយ​ការ​លេប​ថ្នាំ​នេះ។

អង្គការសុខភាព​ពិភពលោក WHO បាន​ចាប់ផ្តើម​ដាក់​ឲ្យ​ប្រើប្រាស់​ការព្យាបាល​ថ្មី​ដោយ​ប្រើ​ថ្នាំ​លេប​ ដែល​អាច​ព្យាបាល​អ្នកជំងឺ​របេងរ៉ាំរ៉ៃ​បាន​យ៉ាង​មាន​ប្រសិទ្ធភាព។ ថ្ងៃទី២៤​ខែមីនា​ខាងមុខ​នេះ​ គឺ​ជា​ទិវា​ជំងឺ​របេង​ពិភពលោក​ ហើយ​អង្គការ WHO បាន​អំពាវនាវ​ឲ្យ​លុប​បំបាត់​ជំងឺ​របេង​ឲ្យ​បាន​ទាំងស្រុង​ត្រឹម​ឆ្នាំ២០៣០។

ជំងឺរបេង​បាន​កើត​ញាំញី​លើ​មនុស្ស​អស់​រយៈពេល​រាប់ពាន់ឆ្នាំ​មក​ហើយ​ និង​កំពុង​បន្ត​កើតឡើង​នា​ពេល​បច្ចុប្បន្ន។ ជំងឺ​របេង​ឬ​ហៅ​កាត់​ថា ​TB គឺ​ជា​ជំងឺឆ្លង​សម្លាប់​មនុស្ស​យ៉ាង​ប្រល័យ​នៅ​ទូទាំង​ពិភពលោក។ ជំងឺ​នេះ​បាន​សម្លាប់​ជីវិត​មនុស្ស​ជិត​ ៤៥០០​នាក់​ក្នុង​មួយ​ថ្ងៃ​ ហើយ​ជា​រៀងរាល់​ឆ្នាំ​ មនុស្ស​ប្រមាណ​ជិត១០លាននាក់​បាន​ឆ្លង​ជំងឺ​នេះ។ ទោះ​ណា​ជា​ស្ថិតិ​នេះ​ជា​ព័ត៌មាន​ដ៏​ក្រៀមក្រំ​ក៏​ដោយ​ ក៏​មាន​ការ​វិវត្ត​ជាច្រើន​ត្រូវ​បាន​ធ្វើ​ឡើង​នៅក្នុង​ការ​ធ្វើ​រោគវិនិច្ឆ័យ​ ការទប់ស្កាត់​ និង​ការព្យាបាល​ជំងឺ​នេះ។

អង្គការ​សុខភាព​ពិភពលោក​ព្រមាន​អំពី​ការ​កើនឡើង​ហានិភ័យ​ ដោយ​សារ​មាន​ការ​លេចឡើង​នូវ​ជំងឺ​របេង​រ៉ាំរ៉ៃ​ដែល​ស៊ាំ​នឹង​ថ្នាំ។ ការ​ព្យាបាល​ជំងឺ​របេង​នាពេល​ថ្មីៗ​នេះ​តាមរយៈ​ការ​ចាក់ថ្នាំ​ដែល​មាន​ការ​ឈឺចាប់ ​និង​ត្រូវ​ប្រើ​រយៈពេល​ពីរឆ្នាំ​ បាន​បង្ក​ឲ្យ​មាន​ផលវិបាក​យ៉ាង​ធ្ងន់ធ្ងរ​ជាច្រើន។ អង្គការ​សុខភាព​ពិភពលោក​សង្ឃឹម​ថា​ កម្មវិធី​ព្យាបាល​ថ្មី​តាមរយៈ​ការ​លេបថ្នាំ​ ដែល​ត្រូវ​បាន​ដាក់​ឲ្យ​ប្រើប្រាស់​នេះ​នឹង​មាន​ប្រសិទ្ធភាព​កាន់​តែ​ខ្លាំង​នៅក្នុង​ការ​គ្រប់គ្រង​ការរីករាលដាល​ជំងឺ​របេង។

លោកស្រី Tereza Kasaeva នាយិកា​កម្មវិធី​ប្រយុទ្ធប្រឆាំង​ជំងឺ​របេង​សកលលោក​នៃ​អង្គការ​សុខភាព​ពិភពលោក​បាន​ប្រាប់ VOA ថា​ ការ​ព្យាបាល​ថ្មី​ដោយ​ការ​លេប​ថ្នាំ​ដែល​អង្គការ​សុខភាព​ពិភពលោក​កំពុង​ណែនាំ​ឲ្យ​ប្រើប្រាស់​នេះ​ មាន​ផល​វិបាក​តិច​តួច​បំផុត។

លោកស្រី Kasaeva បាន​ថ្លែង​ថា៖ «ពិតណាស់ ការ​ព្យាបាល​ថ្មី​នេះ​មាន​ភាពងាយស្រួល​ជាងមុន​ ហើយ​អ្នកជំងឺ​មិន​ចាំបាច់​ត្រូវ​មក​ជួបគ្រូពេទ្យ​ដើម្បី​ចាក់​ថ្នាំ​ជា​ប្រចាំ​ទេ។ តាម​រយៈ​ទិន្នន័យ​ដែល​ទទួល​បាន​ យើង​ដឹង​ច្បាស់​ថា​ ការ​ព្យាបាល​ថ្មី​ដោយ​ការ​លេប​ថ្នាំ​នេះ​នឹង​ទទួល​បាន​ប្រសិទ្ធភាព​ខ្ពស់​បំផុត»។

រដ្ឋាភិបាល​ប្រទេសអាហ្រ្វិក​ខាងត្បូង​បាន​ប្រកាស​ថា​ ខ្លួន​មាន​ផែនការ​ដាក់​ឲ្យ​ប្រើប្រាស់​វិធីព្យាបាល​ថ្មី​ដោយ​ការ​លេប​ថ្នាំ​នេះ។

លោកស្រី Kasaeva បាន​ថ្លែង​បន្ត​ថា ថ្លៃ​ព្យាបាល​តាមរយៈ​ការ​លេបថ្នាំ​នេះ​មាន​តម្លៃ​ប្រមាណ ២០០០ដុល្លារ ​ដែល​ជា​ការ​ព្យាបាល​មួយ​មាន​តម្លៃ​ថ្លៃ​សម្រាប់​អ្នកជំងឺ​រស់នៅ​តាមបណ្តា​ប្រទេស​មាន​ចំណូល​ទាប។ លោកស្រី​បាន​បន្ថែម​ថា ​ប្រទេស​អាហ្វ្រិក​ខាងត្បូង​កំពុង​ចរចា​ជាមួយ​ក្រុមហ៊ុន​ផលិត​ឱសថ​នានា​ដើម្បី​បញ្ចុះ​តម្លៃ​ព្យាបាល​ឲ្យ​នៅ​ត្រឹម៤០០ដុល្លារ។

អង្គការ​សុខភាព​ពិភពលោក​បាន​ឲ្យ​ដឹង​ទៀត​ថា ​ប្រទេស​អាហ្វ្រិក​ខាងត្បូង​គឺ​ជា​ប្រទេស​មួយ​ក្នុង​ចំណោម​ប្រទេស​ទាំង​២០​ដែល​មាន​ការ​ឆ្លង​រាលដាល​ជំងឺ​របេង​ធ្ងន់ធ្ងរ​បំផុត។ ប្រទេស​ផ្សេង​ទៀត​មាន​ដូចជា​ប្រទេសរុស្ស៊ី​ ចិន​ ឥណ្ឌា ​នីហ្សេរីយ៉ា ​ប៉ាគីស្ថាន​ និងវៀតណាម៕

ប្រែសម្រួលដោយ ស៊ូ ពេជ្រចិន្តា

XS
SM
MD
LG