ភ្ជាប់​ទៅ​គេហទំព័រ​ទាក់ទង

អ្នក​ឃ្លាំ​មើល​ថា ក្រសួង​អប់រំ​មាន​ចេតនា​បង្កើត​វិញ្ញាសា​ស្រួល​សម្រាប់​ការ​ប្រឡង​ថ្នាក់​ទី១២

  • នៅ វណ្ណារិន
  • VOA Khmer

នគរបាល​កំពុង​ឈរ​យាម​ដើម្បី​រក្សា​សន្តិសុខ​នៅ​មុខ​មណ្ឌល​ប្រលង​សាលា​បឋម​សិក្សា​ចតុមុខ កាល​ពី​ថ្ងៃ​ទី​២៤​ ខែ​សីហា​ ឆ្នាំ​២០១៥។​ នេះ​ជា​ឆ្នាំ​ទី​២​ហើយ​ ដែល​ការប្រលង​មធ្យម​សិក្សា​ទុតិយ​ភូមិ ​​ដែល​ក្រសួង​អប់រំ​បាន​រឹតបន្តឹង​លើ​ការប្រលង។ (ស៊ូ​ ពិសែន/VOA)

ក្រសួង​អប់រំ​នឹង​ប្រកាស​លទ្ធផល​ការ​ប្រឡង​សញ្ញាបត្រ​មធ្យម​សិក្សា​ទុតិយភូមិ​ថ្នាក់ទី​១២​ទូទាំង​ប្រ​ទេស​ នា​ចុង​សប្តាហ៏​នេះបន្ទាប់​ពី​បញ្ចប់​ការ​កែវិញ្ញាសា សរុបពិន្ទុ​បេក្ខជន​ដែល​ចូលរួម​ប្រឡង​ជាង​៨០,០០០​នាក់។ អ្នក​ឃ្លាំ​មើល​ការ​ប្រឡង​បាន​អះ​អាង​ថា យ៉ាង​ហោច​ណាស់ បេក្ខជន​ជាង​៧០ភាគរយ​នឹង​អាច​ជាប់​ក្នុង​ការ​ប្រឡង​នេះ ដោយ​សារ​តែ​ចេតនា​របស់​ក្រសួងអប់រំ។

​ក្នុង​សេចក្តី​ប្រកាស​ព័ត៌មាន​ដែល​ចេញ​ផ្សាយ​កាល​ពី​ព្រឹក​ថ្ងៃ​សុក្រ​នេះ​បា​ន​ឲ្យដឹង​ថា​ក្រសួង​អប់រំ​គ្រោង​នឹង​ផ្សព្វផ្សាយ​លទ្ធផល​ប្រឡង​ជា​ផ្លូវ​ការ​នា​រសៀលថ្ងៃ​សៅរ៍​សម្រាប់​មណ្ឌល​ប្រឡង​ក្នុង​រាជធានី​ភ្នំពេញ និង​ខេត្ត​កណ្តា​ល។ ហើយ​នៅព្រឹក​ថ្ងៃ​អាទិត្យ​គឺ​សម្រាប់​មណ្ឌល​ប្រឡង​តាម​បណ្តា​ខេត្ត​នានា។

សេចក្តី​ប្រកាស​ព័ត៌មាន​ដដែល​បាន​ឲ្យ​ដឹង​ផង​ដែរ​ថា លទ្ធល​ប្រឡង​នេះ​គឺ​ចេញ​៣ថ្ងៃ​មុន​ពេល​កំណត់ ដោយ​សារ​តែ​ការ​កែ​វិញ្ញាសា និងបូក​ពិន្ទុ​តាម​ប្រព័ន្ធ​កុំព្យូទ័រ «បាន​ប្រព្រឹត្ត​ទៅ​ប្រកប​ដោយ​ភាព​រលូន​ល្អ​ ដោយ​គ្មាន​បាតុភាព​មិន​ប្រក្រតី​ណាមួយ​កើត​ឡើង​គួរ​ឲ្យ​កត់​សម្គាល់​ឡើយ»។

ការ​ប្រឡង​សញ្ញាបត្រ​មធ្យម​សិក្សា​ទុតិយភូមិ​ទូទាំង​ប្រទេស​ប្រាន​ប្រព្រឹត្ត​ទៅ​នា​ថ្ងៃ​ទី២៤ ខែ​សីហា​កន្លង​ទៅ​ក្នុង​មណ្ឌល​ប្រឡង​ចំនួន​១៥០មណ្ឌល ហើយ​មាន​បេក្ខជន​ដែល​មាន​ឈ្មោះ​ប្រឡង​ចំនួន​ជាង​៨០,០០០​នាក់។ អ្នកឃ្លាំមើល​ការ​ប្រឡង​ដែល​មាន​រយៈពេល​ពីរថ្ងៃ​នេះ​ត្រូវ​បាន​ទទួលស្គាល់អំ​ពី​ការរឹត​បណ្តឹង​ទាំង​សន្តិសុខ និង​អំពី​ការ​លួច​ចម្លង​គ្នា។

កាល​ពី​ឆ្នាំ​កន្លង​ទៅ​ក្រសួង​អប់​រំ យុវជន​ និង​កីឡា​ បាន​ធ្វើ​កំណែ​ទម្រង់​ប្រព័ន្ធ​អប់រំ​នៅ​កម្ពុជា ជា​ពិសេស​ទៅ​លើ​ការ​ប្រឡង​សញ្ញាបត្រ​មធ្យម​សិក្សា​ទុតិយ​ភូមិ ដោយ​សហការ​ជាមួយ​នឹង​អង្គភាព​ប្រ​ឆាំង​អំពើ​ពុក​រលួយ ដើម្បី​លុប​បំបាត់​ការ​ស៊ី​សំណូក​សូក​ប៉ាន់​ក្នុង​បន្ទប់​ប្រឡង​រវាង​ អនុរក្ស ​និង​បេក្ខជន​ ក៏​ដូច​ជា​ការ​លួច​ប្រើ​គ្រឿង​អេឡិច​ត្រូនិក​ និង​ការ​យក​សំណៅ​ឯកសារ​ចូល​បន្ទប់​ប្រឡង​ជា​ដើម។ ការណ៍​នេះ​បាន​ធ្វើ​ឱ្យ​អត្រា​ជាប់​របស់​បេក្ខជន​មាន​ត្រឹម​តែ​៤០,៦៧​ភាគរយ រួមទាំង​ការ​ប្រឡង​ចំនួន​ពីរ​លើក​នោះ។

ទោះ​ជា​មាន​ការ​រឹតត្បិត​ក្នុង​ប្រឡង​ក៏​ដោយ តែ​អ្នក​ឃ្លាំ​មើល​ការប្រឡង​នឹង​ការ​ធ្វើ​កំណែ​វិញ្ញាសា​ប្រឡង​បាន​បញ្ជាក់​ថា លទ្ធផល​ប្រឡង​ឆ្នាំ​នេះ​នឹងអាច​ឲ្យ​បេក្ខ​ជនជាប់​ពី​៦០​ទៅ​៧០​ភាគរយ​ ដោយ​ក្រសួង​អប់រំ​មាន​ចេតនា​បន្ធូរបន្ថយ វិញ្ញាសា និង​បន្ថយ​ពិន្ទុ​អប្បបរមា​ក្នុង​ការ​ជាប់​នោះ។

លោក​ កៅ ពឿន ជា​នាយក​ប្រតិបត្តិ​នៃ​វិទ្យាស្ថាន​ខ្មែរ​សម្រាប់​អភិវឌ្ឍ​ជាតិ ហៅ​កាត់​ថា​KIND ​ដែល​បាន​ចូលរួម​អង្កេត​ការណ៍​ការ​ប្រឡង​ពេល​កន្លង​ទៅ​បាន​ប្រាប់ VOA ថា​ក្រសួង​មាន​ចេតនា​ក្នុង​ការ​បន្ធូរបន្ថយ ដើម្បី​ឲ្យ​បេក្ខជន​ជាប់​ក្នុង​ការ​ប្រឡង​ឆ្នាំ​នេះ​ឲ្យ​បាន​ច្រើន​ជាជាង​គិត​ពី​គុណភាព​របស់​សិស្ស។

លោក​បាន​បញ្ជាក់​ពី​ក្តី​បារម្ភ​អំ​ពី​គុណភាព​នៃ​ធនធាន​មនុស្ស​របស់​កម្ពុជា​ក្នុង​ប្រកូត​ប្រជែង​ទីផ្សា​រការងារ​ជាមួយ​ប្រទេស​អាស៊ាន​ផ្សេងៗ ដែល​នឹង​ធ្វើ​សមាហរណ​កម្មនា​ចុង​ឆ្នាំ​២០១៥​នេះ។

«យើង​មាន​ការ​ព្រួយ​បារម្ភ​ដែរ​បញ្ហា​ការ​ប្រឡង​ហ្នឹង គឺ​ក្រសួង​មាន​ការ​បន្ថយ​ពិន្ទុ​ក្នុង​ការ​ប្រឡង ដើម្បី​ឲ្យ​ជាប់​នឹងវា​បាន​ច្រើន។ ហើយ​ខ្ញុំ​គិតថា វា​ជា​សេច​ក្តី​ត្រូវ​ការ​នៃ​សាលា​ឯកជន​ផ្សេងៗ ដែល​វា​មិន​ស្រប​ទៅ​នឹង​សេចក្តី​ត្រូវ​ការ​នៃ​កម្លាំង ឬ​ក៏​ឧស្សាហកម្ម​ពិត​ប្រាកដ​នៅ​ក្នុង​ប្រទេស​កម្ពុជា»។

លោក​ កៅ ពឿន បាន​បន្ត​ទៀត​ថា៖ «បើ​យើង​មាន​ស្តង់​ដា​(បទដ្ឋាន)ទាប​ពេក​ គឺ​យើង​ឃើញ​ថា​ជាប់​មែន តែ​វាមិន​ស្រប​តាម​ក្របខ័ណ្ឌ​របស់​អាស៊ាន។ អញ្ចឹង​ធម្មតា​ម្នាក់ៗ​ពេល​ដែល​ជាប់​យល់​ថា ខ្លួន​ឯង​មាន​សមត្ថភាព​ហើយ។ ​ក៏ប៉ុន្តែ​ជា​ការពិត​គឺ​អត់​មាន​សមត្ថភាព​ស្រប​ទៅ​តាម​ស្តង់ដា​របស់​អាស៊ាន ដែល​យើង​អាច​ដំណើរការ​ អាច​ទៅ​ធ្វើ​ការ​នៅ​ឯណា​ក៏​បាន‍»។

លោក​ស្រី អ៊ុក ឆាយ៉ាវី ជា​ប្រធាន​ស្តី​ទី​នៃ​សមាគម​គ្រូ​បង្រៀន​ឯករាជ្យ ដែល​មាន​សមាជិក​ចំនួន​ជាង​១០,០០០​នាក់​ទូទាំង​ប្រទេស​បាន​បញ្ជាក់​ថា តាម​ការ​ឲ្យ​ដឹង​ពី​អ្នកគ្រូ​លោក​គ្រូ​ដែល​កែវិញ្ញាសា​កន្លង​ទៅ​បាន​ឲ្យ​ដឹង​ថា ក្រសួង​អប់រំ​មាន​ចេតនា​ធ្វើ​ឲ្យ​ខុស​វិញ្ញាសា​មួយ​ក្នុង​មុខវិជ្ជា​គីមីវិទ្យា​ និង​ការ​ចេញ​វិញ្ញាសា​មិន​មាន​ក្នុង​មេរៀន​ដូច​ជា​ឲ្យបេក្ខជន​បរិយាយ​អំពី​វប្បធម៌​សន្ទនា​រវា​ងគណបក្ស​នយោបាយ​ធំៗ​ជាដើម។

«តាម​ពិតទៅ​អ្វី​ដែល​ខ្ញុំ​ទំនាក់​ទំនង​ជាមួយ​គ្រូៗ ដែល​កែវិញ្ញាសា​ហ្នឹង​ឃើញ​ថា មាន​ជាប់​បាន​ច្រើន​ជាង​ឆ្នាំ​ទៅ។ ក៏ប៉ុន្តែ​ការ​ច្រើន​ហ្នឹង​គឺ​មិនមែន​ដោយ​ចំណេះ​ដឹង​ពិត​ប្រាកដ​របស់​សិស្ស​ទាំង​អស់​នោះ​ទេ គឺ​ដោយ​សារ​តែ​ការ​ឆកល្វែង​របស់​ក្រសួង​អប់រំ​ក្នុង​ការ​ចេញ​វិញ្ញាសា​ហ្នឹង​ឲ្យ​វា​ខុស។ អញ្ចឹង​ហើយ​ទាល់​តែ​ ទៅ​កែ​ទៅ​គឺ​សិស្ស​បាន​ពិន្ទុ​ពេញ​១០០​ភាគរយ»។

លោក​ស្រី អ៊ុក ឆាយ៉ាវី ​បាន​បញ្ជាក់​ថា៖ «តាម​ពិត​ទៅ​នៅ​ក្នុង​ការ​ប្រឡង​ហ្នឹង ឃើញ​ខុស​មួយ​នេះ​ ហើយ​នឹង​វប្បធម៌​ទូទៅ​ដែល​ខ្ញុំ​និយាយ​ថា វប្បធម៌​សន្ទនា​គឺ​នៅ​ក្រៅ​មេរៀន។ អញ្ចឹង​តាម​ច្បាប់​គេ​អត់​យក​មក​ដាក់​ក្នុង​វិញ្ញាសា​ប្រឡង​ទេ​ ដែល​គេ​និយាយ​ថា​កែ​ទម្រង់​ហ្នឹង»។

VOA មិន​អាច​សុំ​ការ​អត្ថា​ធិប្បាយ​ពី​មន្ត្រី​ក្រសួង​អប់រំ​ហើយ​នឹង​លោក​រដ្ឋមន្ត្រី ហង្ស ជួនណារ៉ុន បាន​ទេ ទាក់ទិន​នឹង​លទ្ធផល​នៃ​ការ​ប្រឡង​ទូទាំង​ប្រទេស​ដែល​នឹង​ប្រកាស​ឲ្យ​ដឹង​នា​ថ្ងៃ​សៅរ៍ និង​ថ្ងៃ​អាទិត្យ​នេះ៕

XS
SM
MD
LG