ភ្ជាប់​ទៅ​គេហទំព័រ​ទាក់ទង

ការ​ស៊ើបអង្កេត​ថ្មី​មួយ​រក​ឃើញ​ទឹកប្រាក់​ចំនួន២០០​លាន​ដុល្លារ​របស់​ក្រុមគ្រួសារ​លោក ហ៊ុន សែន


លោក​នាយករដ្ឋ​មន្រ្តី​ហ៊ុន សែន​ ចុច​ទូរស័ព្ទ​​កំឡុង​ពេល​ការ​រំលឹក​ខួបទី​៦៥​នៃ​ថ្ងៃ​បង្កើត​គណបក្ស​ប្រជាជន​កម្ពុជា​នៅ​ទីស្នាក់​ការ​កណ្ដាល​គណបក្ស​នៅ​ថ្ងៃ​ទី​២៨​ខែ​មិថុនា​ឆ្នាំ​២០១៦​ នា​រាជធានី​ភ្នំពេញ។គណបក្ស​ប្រជាជន​កម្ពុជា​មាន​ឈ្មោះ​ដើម​ហៅ​ថា​គណបក្ស​បដិវត្តន៍​ប្រជាជន​ខ្មែរ​ត្រូវបាន​បង្កើត​ឡើង​នៅ​ថ្ងៃ​ទី​២៨ ​ខែ​មិថុនា​ឆ្នាំ​១៩៥១។(ឡេង ឡែន​/VOA )

ការ​ស៊ើបអង្កេត​មួយ​ដោយ​អង្គការ Global Witness ដែល​មាន​ទីតាំង​នៅ​ទីក្រុង​ឡុងដ៏ បាន​រក​ឃើញ​បណ្តាញ​ដ៏​ស្មុគស្មាញ​មួយ​នៃ​បណ្តា​ក្រុមហ៊ុន​នៅ​កម្ពុជា ដែល​បាន​ដាក់​បង្ហាញ​ទឹក​ប្រាក់​ប្រហែល​២០០​លាន​ដុល្លារ ហើយ​ដែល​សុទ្ធ​តែ​ជាប់ពាក់ព័ន្ធ​ជាមួយ​នឹង​ក្រុមគ្រួសារ​របស់​លោក​នាយក​រដ្ឋ​មន្ត្រី ហ៊ុន សែន ដែល​ជា​មេដឹកនាំ​ផ្តាច់ការ​នៅ​ក្នុង​ប្រទេស។ ​

របាយការណ៍​ដែល​មាន​ចំណងជើង​ថា «Hostile Takeover» បាន​សរសេរ​ថា «ការ​រក​ឃើញ​នេះ​ប្រហែល​ជា ​គ្រាន់​តែ​ជា​ផ្នែក​មួយ​តែ​ប៉ុណ្ណោះ»។

របាយការណ៍​នោះ​មិន​បាន​រួម​បញ្ចូល​អចលនទ្រព្យ​របស់​ក្រុមគ្រួសារ​នេះ ដែល​មាន​ច្រើន​សន្ធឹកសន្ធាប់​នោះ​ទេ ប៉ុន្តែ​របាយការណ៍​នោះ​បាន​ដកស្រង់​សម្តី​របស់​អ្នក​ជំនាញការ​នានា​ដែល​ថា ទ្រព្យសម្បត្តិ​របស់​ក្រុមគ្រួសារ​នេះ​អាច​មាន​តម្លៃ​ពី ៥០០លាន​ដុល្លារ ទៅ​១​ពាន់​លាន​ដុល្លារ។ ​

នេះ​គឺ​ជា​ទឹកប្រាក់​ដ៏​ច្រើន​សន្ធឹកសន្ធាប់ បើ​ក្រឡេក​មើល​ទៅ​លើ​ការ​ទទូច​របស់​លោក ហ៊ុន សែន ដែល​ថា លោក​រក​ចំណូល​បាន​ត្រឹមតែ​ប្រមាណ​១៣៨០០​ដុល្លារ​តែ​ប៉ុណ្ណោះ ក្នុង​មួយ​ឆ្នាំ ក្នុង​នាម​លោក​ជា​នាយក​រដ្ឋ​មន្ត្រី និង​ជា​ប្រធាន​គណបក្ស​ប្រជាជន​កម្ពុជា​នោះ។ ​
ប្រជាជន​កម្ពុជា​ប្រហែល​៤០​ភាគរយ​រស់នៅ​ក្បែរ​ឬ​ស្ថិត​ក្នុង​ស្ថានភាព​ក្រីក្រ កុមារ​៤០​ភាគរយ​កង្វះ​អាហារូបត្ថម្ភ ហើយ​ការ​បែងចែក​រវាង​អ្នក​មាន​និង​អ្នកក្រ កំពុង​តែ​លេច​ឡើង​ជា​បញ្ហា​សង្គម​ដ៏​ធំ​មួយ។ ​
របាយការណ៍​នោះ​បង្ហាញ​ពី​ខ្សែ​បណ្តាញ​ដ៏​ធំ​សម្បើម​មួយ​នៃ​ការ​ធ្វើ​ជំនួញ​ដោយ​សម្ងាត់​និង​អំពើ​ពុករលួយ ដែល​ចង្អុល​បង្ហាញ​ពី​ការ​ដឹកនាំ​បែបផ្តាច់ការ​ដោយ​សម្លាប់ ធ្វើ​ទារុណកម្ម និង​ចាប់​អ្នក​ដែល​ប្រឆាំង​នយោបាយ​ដាក់​ពន្ធនាគារ។

របាយការណ៍​នោះក៏​បាន​រក​ឃើញ​ថា ក្រុម​គ្រួសារ​របស់​លោក ហ៊ុន សែន ទទួល​បាន​ផល​ប្រយោជន៍​ពីក្រុមហ៊ុន​ចំនួន ១១៤ ​នៅ​ក្នុង​ស្ទើរ​គ្រប់​វិស័យ​ក្នុង​ប្រទេស​កម្ពុជា ដែល​មាន​ចាប់​ពី វិស័យ​ជីករ៉ែ វិស័យ​កសិកម្ម អគ្គិសនី រហូត​ដល់​ប្រព័ន្ធ​ផ្សព្វផ្សាយ វិស័យ​កាត់ដេរ ព្រៃឈើ និង​វិស័យ​ដឹកជញ្ជូន​ជាដើម។

ក្នុង​ចំណោម​ក្រុមហ៊ុន​ទាំង ១១៤ ក្រុមហ៊ុន​ចំនួន​១០៣ ​មាន​សមាជិក​គ្រួសារ​ម្នាក់​របស់​លោក ហ៊ុន សែន ​ជា​ប្រធាន ខណៈ​ដែល​ក្រុមហ៊ុន​ចំនួន​៤៤ មានភាគហ៊ុន​សំខាន់​របស់​សមាជិកគ្រួសារ​លោក ជាមួយ​នឹង​ភាគហ៊ុនយ៉ាង​ហោច​ណាស់ ៥​ភាគរយ ហើយ​ក្រុមហ៊ុន​ចំនួន ៣៣ មាន​ដាក់​ឈ្មោះ​របស់​សមាជិក​គ្រួសារ​ម្នាក់​របស់​លោក ជា​ម្ចាស់​ផ្តាច់មុខ​តែ​ម្តង។ ​

របាយការណ៍​នោះ​បាន​ឲ្យ​ដឹង​ទៀត​ថា ក្រុមហ៊ុន​ទាំង​នោះ មាន​ជាប់ពាក់ព័ន្ធ​ជាមួយ​នឹង​សាខា​ក្រុមហ៊ុន​អន្តរជាតិ​ជាច្រើន ដូចជា ក្រុមហ៊ុន Apple ក្រុមហ៊ុន Visa ក្រុមហ៊ុន Procter & Gamble ក្រុមហ៊ុន Tommy Hilfiger និង​ក្រុមហ៊ុន Polo Ralph Lauren ជាដើម ហើយ​ទិន្នន័យ​ជាច្រើន​ដែលទទួល​បាន​លើ​ប្រព័ន្ធ​អ៊ីនធឺណែត​គឺ​បាន​ពី​បញ្ជី​រាយ​នាមក្រុមហ៊ុនរបស់​រដ្ឋាភិបាល​តែ​ម្តង។ ក៏​ប៉ុន្តែ ឥឡូវ​នេះ ការ​ទៅ​ចូល​មើល​ព័ត៌មានទាំង​នោះ​ត្រូវ​បាន​ដាក់​កម្រិត៕

XS
SM
MD
LG