ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធាន​គ.ជ.ប​ថ្មី​ថា​លោក​នឹង​អនុវត្ត​តាម​ច្បាប់​ក្រោយ​រដ្ឋសភា​យល់​ព្រម​ឲ្យ​ធ្វើ​ជា​ប្រធាន​ស្ថាប័ន​រៀបចំ​ការ​​បោះឆ្នោត


រូប​ឯកសារ៖ លោក ប្រាជ្ញ ចន្ទ តំណាងរាស្រ្ត​ខេត្ត​ត្បូង​ឃ្មុំ និង​ជា​អតីត​អភិបាល​ខេត្ត​ត្បូង​ឃ្មុំ ត្រូវ​បាន​រដ្ឋសភា​បោះឆ្នោត​ផ្តល់​សេចក្តី​ទុក​ចិត្ត​​ធ្វើ​ជា​​ប្រធាន​​គណៈកម្មាធិការ​ជាតិ​រៀបចំ​ការ​បោះ​ឆ្នោត​(គ.ជ.ប)។ (រូបថត​ពី​ Facebook/Prach Chann)
រូប​ឯកសារ៖ លោក ប្រាជ្ញ ចន្ទ តំណាងរាស្រ្ត​ខេត្ត​ត្បូង​ឃ្មុំ និង​ជា​អតីត​អភិបាល​ខេត្ត​ត្បូង​ឃ្មុំ ត្រូវ​បាន​រដ្ឋសភា​បោះឆ្នោត​ផ្តល់​សេចក្តី​ទុក​ចិត្ត​​ធ្វើ​ជា​​ប្រធាន​​គណៈកម្មាធិការ​ជាតិ​រៀបចំ​ការ​បោះ​ឆ្នោត​(គ.ជ.ប)។ (រូបថត​ពី​ Facebook/Prach Chann)

ក្រោយ​មាន​ការ​បោះឆ្នោត​ផ្តល់​សេចក្តី​ទុក​ចិត្ត​កាល​ពី​ព្រឹក​ថ្ងៃ​ព្រហស្បតិ៍​ឲ្យធ្វើ​ជា​ប្រធាន​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) អតីត​តំណាងរាស្រ្ត​ខេត្ត​ត្បូង​ឃ្មុំ លោក ប្រាជ្ញ ចន្ទ បាន​ថ្លែង​ថា​លោក​នឹង​អនុវត្ត​ទៅ​តាម​ច្បាប់​ដែល​មាន​ជា​ធរមាន ដើម្បី​ធានា​អព្យាក្រឹតភាព​របស់​ស្ថាប័ន​មួយ​នេះ។

នេះ​ជា​ការ​ឆ្លើយ​តប​របស់​លោក ប្រាជ្ញ ចន្ទ ដែល​មាន​បទ​ពិសោធន៍​ជា​អភិបាល​ខេត្ត​បាត់ដំបង និង​ត្បូងឃ្មុំ​ផង​នោះ ទៅ​នឹង​ការ​រិះគន់​ថា​ស្ថាប័ន​រៀបចំ​ការ​បោះ​ឆ្នោត មិន​ទាន់​អាច​ទុក​ចិត្ត​បាន​ទេ ដោយ​សារ​សមាជិក​ស្ទើរ​តែ​ទាំង​អស់​មាន​អតីត​ភាព​ជាមួយ​គណបក្ស​ប្រជាជន​កម្ពុជា ក្រោយ​សមាជិក​មក​ពី​គណបក្ស​សង្គ្រោះ​ជាតិ​បាន​លា​ឈប់ ក្រោយ​បក្ស​នេះ​ត្រូវ​បាន​រំលាយ​កាល​ពី​ចុង​ឆ្នាំ​២០១៧។

កាល​ពី​ព្រឹក​ថ្ងៃ​ព្រហស្បតិ៍ តំណាងរាស្រ្ត​រដ្ឋសភា​ដែល​បាន​ចូលរួម​កិច្ច​ប្រជុំសរុប​ចំនួន​៨២​រូប​របស់​គណបក្ស​ប្រជាជន​កម្ពុជា​បាន​បោះ​ឆ្នោត​ផ្តល់​សេចក្តី​ទុក​ចិត្ត គឺ​«ព្រម»​ឲ្យ​លោក ប្រាជ្ញ ចន្ទ អតីត​ប្រធាន​គណៈ​កម្មការ​សិទ្ធិ​មនុស្ស ទទួល​ពាក្យ​បណ្ដឹង អង្កេត និង​ទំនាក់​ទំនង​រដ្ឋសភា ព្រឹទ្ធ​សភា ធ្វើ​ជា​ប្រធាន​ស្ថាប័ន​រៀបចំ​ការ​បោះឆ្នោត គ.ជ.ប ជំនួស​លោក ស៊ិក ប៊ុនហុក ដែល​បាន​ដាក់​ពាក្យ​លា​ឈប់ ដោយ​សារ​បញ្ហា​ជំងឺ​ប្រចាំកាយ។

ប៉ុន្តែ​ការ​ជ្រើស​រើស​នេះ ត្រូវ​បាន​រិះគន់​ដោយ​គណបក្ស​ប្រឆាំងនិង​អ្នក​តាម​ដាន​មួយ​ចំនួន​ថា​ស្ថាប័ន​មួយ​នេះ​មិន​អាច​ជា​ស្ថាប័នគួរ​ជា​ឲ្យ​ទុក​ចិត្ត​បាន​សម្រាប់​រៀបចំ​ការ​បោះ​ឆ្នោត​នោះ​ទេ។

ទោះ​ជា​យ៉ាងណា លោក​ ប្រាជ្ញ​ ចន្ទ ប្រាប់​ VOA ​នៅ​រសៀល​ថ្ងៃ​ព្រហស្បតិ៍​ថា​លោក​នឹង​អនុវត្ត​តាម​ច្បាប់ និង​បទ​បញ្ជាផ្ទៃ​ក្នុង​ដែល​មាន​តែ​ប៉ុណ្ណោះ ហើយ​ថា​នេះ​ជា​សិទ្ធិ​របស់​អ្នក​រិះគន់​តែ​ប៉ុណ្ណោះ ទាក់ទង​នឹង​បញ្ហា​អព្យាក្រឹត និង​តម្លាភាព។

លោក​ថ្លែង​ថា​៖ «គ.ជ.ប​យើង​ធ្វើ​ការ​តាម​ច្បាប់ និង​នីតិវិធី បទ​បញ្ជា​ផ្ទៃ​ក្នុង។ យើ​ង​មិន​មាន​ធ្វើ​អ្វី​ខុស​ពី​ហ្នឹង​ទេ។ អញ្ចឹង​យើង​ធ្វើ​ឲ្យ​បាន​ត្រឹម​ត្រូវ​តាម​ហ្នឹង​ទៅ​វា​ត្រូវ​ហើយ។ យើង​មិន​អាច​ធ្វើ​ឲ្យ​ខុស​ច្បាប់​បាន​ទេ។ អ្នក​ថា​ចេះ​តែ​ថា​ទៅ​ប៉ុន្តែ​យើង​ធ្វើ​ឲ្យ​តែ​ត្រឹម​ត្រូវ​តាម​ច្បាប់។ បើ​ធ្វើ​ខុស​ច្បាប់​ម៉េច​បាន? បើ​ផ្លូវ​ដើរ វាដើរ​តាម​ច្បាប់​ហ្នឹង ហើយ​ផ្លូវ​វា​កំណត់​ឲ្យ​យើង​ដើរ ហើយ​មាន​បទ​បញ្ជា​ផ្ទៃ​ក្នុង នីតិ​វិធី លិខិត​បទដ្ឋាន...យើង​មិន​អាច​ធ្វើ​ខុស​ហ្នឹង​បាន​ទេ»។

រូប​ឯកសារ៖ លោក អេង ឆៃអ៊ាង អនុ​ប្រធាន​គណបក្ស​សង្គ្រោះជាតិ​ដែល​ត្រូវបាន​រំលាយ ចូលរួម​ស្តាប់​សវនាការ​ស្តី​ពីការ​ពិនិត្យ​មើល​ស្ថានភាព​សិទ្ធិ​មនុស្ស​និង​សិទ្ធិ​ពលកម្ម​នៅ​កម្ពុជា នៅ​រដ្ឋធានី​វ៉ាស៊ីនតោន កាលពី​ថ្ងៃទី១១ ខែកញ្ញា ឆ្នាំ​២០១៩។ (ទែន សុខស្រីនិត/VOA)
រូប​ឯកសារ៖ លោក អេង ឆៃអ៊ាង អនុ​ប្រធាន​គណបក្ស​សង្គ្រោះជាតិ​ដែល​ត្រូវបាន​រំលាយ ចូលរួម​ស្តាប់​សវនាការ​ស្តី​ពីការ​ពិនិត្យ​មើល​ស្ថានភាព​សិទ្ធិ​មនុស្ស​និង​សិទ្ធិ​ពលកម្ម​នៅ​កម្ពុជា នៅ​រដ្ឋធានី​វ៉ាស៊ីនតោន កាលពី​ថ្ងៃទី១១ ខែកញ្ញា ឆ្នាំ​២០១៩។ (ទែន សុខស្រីនិត/VOA)

លោក អេង ឆៃអ៊ាង អនុ​ប្រធាន​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ ដែល​កំពុង​និរ​ទេស​ខ្លួន​នៅ​ក្រៅ​ប្រទេស ថ្លែងប្រាប់ ​VOA ​ថា ​ស្ថាប័ន​បោះ​ឆ្នោត​ដែល​ជា​អាជ្ញា​កណ្តាល មិន​អាច​ទុក​ចិត្ត​បាន​នោះ​ទេ ដោយសារ​ពួកគេ​មាន​និន្នាការ​ជាមួយ​គណបក្ស​ប្រជា​ជន​កម្ពុជា។

លោក​បន្ត​ថា​ការ​បោះ​ឆ្នោត​ទទួល​យក​បាន ទាល់​តែ​ស្ថាប័ន​បោះ​ឆ្នោត​អាច​ទុក​ចិត្ត​បាន​និង​បរិយាកាស​នយោបាយ​អំណោយ​ផល។

លោក​បញ្ជាក់​ថា៖ «វា​ច្បាស់​ហើយ បើ​ការ​ប្រកួត​ប្រជែង​មួយ ដែល​អាច​ប្រព្រឹត្ត​ទៅ​ដោយសេរី​ត្រឹម​ត្រូវ​និង​មាន​យុត្តិធម៌​ពិត​ប្រាកដ​វា​មាន​កត្តា​ធំៗ​ពីរ​មក​ជាមួយ​គ្នា។ ទីមួយ​គឺអាជ្ញា​កណ្តាល​នៃ​ការ​បោះ​ឆ្នោត​នៅ​ប្រទេស​កម្ពុជា គឺ​គណៈ​កម្មាធិការ​ជាតិ​រៀប​ចំ​ការ​បោះ​ឆ្នោត។ ទី​ពីរ​បរិយាកាស​នយោបាយ។​បើ​សិន​ជា​អាជ្ញា​កណ្តាល​ឯករាជ្យ​ធ្វើ​ការ​ដោយ​ឯករាជ្យ​ប៉ុន្តែ​បរិយាកាស​នយោបាយ​ពោរ​ពេញ​ទៅ​ដោយ​ការ​ចាប់​ចង ទៅ​ដោយ​ការ​ចោទ​ប្រកាន់ បិទ​សិទ្ធិ​សេរីភាព​លម្ហសេរីភាព គឺ​តូច​ចង្អៀត ដូច​ភាគី​ម្ខាង​ធ្វើ​អ្វី​បាន​តាម​ចិត្ត ឯ​គូ​បដិបក្ខ​និយាយ​អ្វី​មិន​បាន។ គ្រាន់​តែ​និយាយ​ផ្ទុយ​ពី​គោល​ជំហរ​ខ្លួន​ឯង​[គណបក្ស​កាន់អំណាច] ចោទ និងចាប់ សុទ្ធ​តែ​វឹក​វរ​សង្គម​បែប​នេះ គឺ​ការ​បោះ​ឆ្នោត​ហ្នឹង​វា​មិន​អាច​ថា​សេរី​ថា​ត្រឹម​ត្រូវ​បា​នទេ»។

លោក​អេង ឆៃអ៊ាង​បញ្ជាក់​ថា​ជំហរ​របស់​គណ​បក្ស​សង្រ្គោះ​ជាតិ គឺ​តាម​សហគមន៍​អន្តរ​ជាតិ ដែល​លោក​ថា​ចង់​ឲ្យ​ដាក់​ដំណើរការ​គណបក្ស​សង្រ្គោះ​ជាតិ​ឡើង​វិញ។ ដូច្នេះ​លោក​ថា​ប្រសិន​បើ​រដ្ឋាភិបាល​កម្ពុជា​មិន​កែ​ប្រែ​នោះ​ទេ កម្ពុជា​នឹង​ក្លាយ​ជា​ប្រទេស​ឯកា​មួយ។

លោក​បន្ថែម​ថា​៖ «យើង​គាំទ្រ​ជំហរ​របស់​សហ​គមន៍​អន្តរជាតិ​យើង​ដឹង​ហើយ​ដូចជំហរ​សហភាព​អឺរ៉ុប គេ​បាន​បញ្ជាក់​ច្បាស់​ហើយ​អំពី​គោល​នយោ​បាយ​របស់​គេ​គឺ​ដើម្បី​ឲ្យ​គេ​ទទួល​យក​បាន​ទាល់​តែ​ឲ្យ​គណបក្ស​សង្គោះ​ជាតិ​ដំណើរ​ការ​ឡើង​វិញ។ បែប​ហ្នឹង​បាន​ជា​ជំហរ​របស់​សហគមន៍​អឺ​រ៉ុប ក៏​ដូច​ជា​សហរដ្ឋ​អាមេរិក​ដែរ ប៉ុន្តែ​លោក​ហ៊ុន សែន មិន​រវី​រវល់​នឹង​សំណើ​របស់​គេ​ទេ ក៏​គេ​មិន​បន្ធូរ​ដៃ​ដែរ។ ទណ្ឌកម្ម​ផ្សេង​ទៀត ក៏​គេ​មិន​អាច​ដក​ថយ​បាន​ទេ។ ពេល​ហ្នឹង​លោក​ ហ៊ុន ​សែន​គាត់​ឯកោ​ខ្លួន​គាត់​ហើយ។ គាត់​មាន​តែ​ចិន​ មាន​តែ​យួន​មាន​តែ​លាវ អី​ហ្នឹង ដែល​ជា​អ្នក​ចាប់​ដៃ​គាត់ ប៉ុន្តែ​ប្រទេស​លោក​ខាង​លិច គេ​មិន​ទៅ​ចាប់​ដៃ​ជាមួយ​គាត់​ទេ​បាទ»។

ចំណែក​លោក គង់ ម៉ូនីកា ប្រធាន​គណបក្ស​ឆន្ទៈ​ខ្មែរ ថ្លែង​ប្រាប់ ​VOA​ តាម​រយៈ​ប្រព័ន្ធTelegram​ថា​គ.ជ.ប ស្ថិត​នៅ​ក្រោម​ឥទ្ធិពល​គណ​បក្ស​កាន់​អំណាច ព្រោះ​ទាំង​រដ្ឋសភា ទាំង​គ.ជ.ប សុទ្ធ​តែ​ជា​មនុស្ស​របស់​គណ​បក្ស​ប្រជាជ​នកម្ពុជា។

លោក​បញ្ជាក់​ថា៖ «ទាំង​អស់​នេះ​បង្ហាញ​ថា​ទីលាន​នយោ​បាយ​នៅ​កម្ពុជា​ពុំ​មាន​ភាព​ស្មើ​គ្នា​នោះ​ទេ​សម្រាប់​គណបក្ស​នយោបាយ ដោយ​សារ​ថា​គ.ជ.ប​ស្ថិត​ក្រោម​ឥទ្ធិពល​គណបក្ស​កាន់​អំណាច។ គណ​បក្ស​ឆន្ទៈ​ខ្មែរ​ចង់​ឃើញ​គ.ជ.ប មួយ​ដែល​មាន​ភាព​ឯក​រាជ្យ មិន​លម្អៀង​និង​គួរ​ឲ្យជឿ​ជាក់​បាន»។

លោក ពេជ្រ​ ស្រស់ ប្រធាន​គណបក្ស​យុវជន​កម្ពុជា យល់​ឃើញ​ស្រដៀង​គ្នា​នឹង​ប្រធាន​គណបក្ស​ឆន្ទៈ​ខ្មែរ​ថា​លោក​មិន​មាន​ជំនឿ​លើ​គ.ជ.ប​នោះ​ទេ ដោយ​សារ​តែ​ស្ថាប័ន​នេះ​កើត​ចេញ​មកពី​គណបក្ស​កាន់​អំណាច។

រូប​ឯកសារ៖ លោក ពេជ្រ ស្រស់​ ប្រធាន​គណបក្ស​យុវជន​កម្ពុជា​ ផ្តល់​បទសម្ភាសន៍​ជាមួយ​ VOA Khmer នៅក្នុង​បន្ទប់​ផ្សាយ​ ក្នុង​រាជធានី​ភ្នំពេញ​ នៅថ្ងៃទី​២៣ ខែ​ឧសភា​ ឆ្នាំ​២០១៧។ (ហ៊ាន សុជាតា/VOA)
រូប​ឯកសារ៖ លោក ពេជ្រ ស្រស់​ ប្រធាន​គណបក្ស​យុវជន​កម្ពុជា​ ផ្តល់​បទសម្ភាសន៍​ជាមួយ​ VOA Khmer នៅក្នុង​បន្ទប់​ផ្សាយ​ ក្នុង​រាជធានី​ភ្នំពេញ​ នៅថ្ងៃទី​២៣ ខែ​ឧសភា​ ឆ្នាំ​២០១៧។ (ហ៊ាន សុជាតា/VOA)

លោក​ថ្លែង​ថា៖ «សម្រាប់​ខ្ញុំ មិន​មាន​ជំនឿ​ចិត្ត​ទេ ព្រោះ​ប្រធាន​គ.ជ.ប​មួយ​ទាំង​មូល​ចេញ​ពី​កូតា​គណ​បក្ស​នយោបាយ។ អា​ហ្នឹង​ចង់ [ឬ]​មិន​ចង់​គាត់​នឹង​លម្អៀង ឬ​សម្រប​សម្រួល​ការងារ​ដល់​គណបក្ស​នយោបាយ​ដែល​ខ្លួន​មាន​និន្នា​ការ​ហ្នឹង​ហើយ។ បើ​ឆន្ទៈ​ខ្ញុំ ខ្ញុំ​ចង់​ឲ្យ​ប្រធាន​គ.ជ.ប ហ្នឹង​ជា​មនុស្ស​ដែល​មិន​ពាក់​ព័ន្ធ​ជា​មួយគណ​បក្ស​នយោបាយ​ណា​ទេ»។

ចំណែក​លោក​ម៉ម សូ​ណង់​ដូ ប្រធាន​គណបក្ស​សំបុក​ឃ្មុំ​សង្គម​ប្រជាធិប​តេយ្យ អះអាង​ថា​ច្បាប់​គ.ជ.ប មាន​រួច​មក​ហើយ​ដែល​បង្កើត​ដោយ​គណបក្ស​ប្រជា​ជន​កម្ពុជា និង​អតីត​គណបក្ស​សង្គ្រោះ​ជាតិ។ ដូច្នេះ​លោក​ថា​ការ​អនុវត្ត​ច្បាប់​ដែល​មាន​ជា​រឿង​សំខាន់ បើ​ទោះ​មាន​ការ​ផ្លាស់​ប្តូរ​សមាជិក​គ.ជ.ប ក៏​ដោយ។

លោក​ថ្លែង​ថា៖ «ច្បាប់មាន​ហើយគឺ​ដោយ​សារ​គណបក្ស​ពីរ គណបក្ស​ប្រជាជន​និង​គណ​បក្ស​សង្គ្រោះ​ជាតិ​បាន​សហការ​គ្នា​បង្កើត​ច្បាប់​គ.ជ.ប​ហ្នឹង ហើយ​បើ​យើង​ផ្លាស់​តែ​មនុស្ស​ហើយ​មនុស្ស​មក​ហ្នឹង​គឺ​យក​ច្បាប់​ទៅ​អនុវត្ត​ទោះ​ជា​អ្នក​ណា​ក៏​ដោយ ក៏​យើង​គោរព​រដ្ឋ​ធម្មនុញ្ញ​ហើយ​យើង​យក​ច្បាប់ទៅ​អនុវត្ត​ដូចៗ​គ្នា​ហ្នឹង។ ដូច្នេះ​រឿង​គ.ជ.ប​វា​រឹត​តែ​រួម​បញ្ចូល​គ្នា​កាន់​តែ​តូច​ទៅៗ ហើយ​ដូច្នេះ​ការ​អនុវត្ត​អ្វី​មួយ​គឺ​ទៅ​តាម​ច្បាប់។ ដូច្នេះ​ការ​ផ្លាស់​ប្រធាន​គ.ជ.ប អ្នក​ណា​មួយៗ ក៏​ដូច​តែ​គ្នា​ដែរ ពី​ព្រោះ​យើង​យក​ទៅ​អនុវត្ត​ច្បាប់​មិន​មែន​យក​ទៅ​ធ្វើ​អ្វី​តាម​ចិត្ត​របស់​ខ្លួន វា​អត់​កើត»។

គណ​បក្ស​ប្រជាធិបតេយ្យ​មូល​ដ្ឋាន​កាល​ពី​ថ្ងៃ​ទី​១១ ខែ​មិថុនា បាន​ចេញ​សេចក្តី​ថ្លែង​ការណ៍​មួយ ដោយ​ស្នើ​សុំ​រដ្ឋ​សភា​ធ្វើ​វិសោធន​កម្ម​រដ្ឋ​ធម្មនុញ្ញ​ស្តីពី​សមាស​ភាព​ស្ថាប័ន​គ.ជ.ប ដែល​ចែង​ពី​ដើម​ឡើយ​ថា​សមាសភាព​៤​រូប ត្រូវ​ជ្រើស​រើស​ដោយ​គណបក្ស​ដឹក​នាំ​រដ្ឋា​ភិបាល ៤​រូប​ទៀត​ត្រូវ​ជ្រើស​រើស​ដោយ​គណ​បក្ស​មាន​អាសនៈ​ក្នុង​រដ្ឋសភា​ដែល​មិន​ចូល​រួម​ក្នុង​រដ្ឋាភិបាល និង​មួយ​រូប​ទៀត​ជ្រើស​រើស​ដោយ​មាន​ការ​ព្រម​ព្រៀង​គ្នា​រវាង​គណ​បក្ស​ទាំង​អស់​ដែល​មាន​អាសនៈ​ក្នុង​រដ្ឋ​សភា។ គណបក្ស​ប្រជា​ធិប​តេយ្យ​មូលដ្ឋាន​ស្នើ​ថា​ក្នុង​ករណី​ដែល​មាន​តែ​គណ​បក្ស​នយោ​បាយមួយ​ដែល​មាន​អាសនៈ​ក្នុង​រដ្ឋ​សភា សមាស​ភាព​គ.ជ.ប ចំនួន​៤​រូប ត្រូវ​ជ្រើស​រើស​ដោយ​គណបក្ស​ដឹកនាំ​រដ្ឋាភិបាល និង​៥​រូប​ទៀត ត្រូវ​ជ្រើស​រើស​ដោយ​បើក​ចំហ និង​តម្លាភាព។

លោក កន សាវាង្ស អ្នក​សម្របសម្រួល​ផ្នែក​អង្កេត​និង​តស៊ូ​មតិ​នៃ​អង្គការ​ឃ្លាំមើល​ការ​បោះឆ្នោត​ហៅ​កាត់​ថា​ខុម​ហ្វ្រែល ថ្លែង​ថា​ការ​ជ្រើ​សរើស​ប្រធាន​គ.ជ.ប​នេះ មាន​ភាព​ចន្លោះ​ប្រហោង​និង​មិន​ទាន់​មាន​ភាព​ឯក​រាជ្យ​នោះ​ទេ ដោយសារ​វា​ជា​ការ​ជ្រើ​សរើស​ដោយ​ឯក​បក្ស​តែ​ប៉ុណ្ណោះ។

លោក​បញ្ជាក់​ថា៖ «អញ្ចឹង​យើង​ឃើញ​ថា​នីតិវិធី​ក្នុង​ការ​ជ្រើ​សរើស​នេះ នៅ​មាន​ការ​កំណត់​មួយ​ដែល​មិន​ទាន់​ឆ្លើយ​ថា​ជា​នីតិវិធី​ដែ​លមាន​ការ​ជ្រើស​រើស​បេក្ខជន​ដែល​ឯករាជ្យ​នេះ​គឺ​វា​នៅ​មាន​ចន្លោះ​ប្រហោង មិន​ទាន់​បាន​ពេញ​លក្ខណៈ​នោះ​ទេ»។

លោក​បន្ថែម​ថា​ទាល់​តែ​មាន​គណបក្ស​ប្រឆាំង​មួយ​ក្នុង​រដ្ឋ​សភា​ដែល​ចូលរួម​ការ​ជ្រើស​រើស​នេះ ទើ​ប​អាច​ធានា​បាន​ឯករាជ្យ​ភាព​នៃ​ស្ថាប័ន​រៀបចំ​ការ​បោះ​ឆ្នោត គ.ជ.ប៕

អត្ថបទ​ទាក់ទង

XS
SM
MD
LG