ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Netanyahu និង​លោក Trump រៀបចំ​កិច្ចពិភាក្សា​អំពី​ការ​ឈ្លានពាន​របស់​អ៊ីរ៉ង់​នៅ​ក្នុង​តំបន់​មជ្ឈិមបូព៌ា


លោក​ប្រធានាធិបតី ដូណាល់ ត្រាំ ថ្លែង​ក្នុង​កិច្ចប្រជុំ​ជាមួយ​នឹង​លោក​នាយករដ្ឋមន្ត្រី​អ៊ីស្រាអែល Benjamin Netanyahu នៅ​ក្នុង​សេតវិមាន កាលពី​ថ្ងៃទី៥ ខែមីនា ឆ្នាំ២០១៨។

នាយក​រដ្ឋមន្ត្រី​អ៊ីស្រាអែល​លោក Benjamin Netanyahu បាន​ស្ថិត​នៅ​ក្នុង​រដ្ឋធានី​វ៉ាស៊ីតោន​ដើម្បី​ជួបប្រជុំ​ជាមួយ​ប្រធានាធិបតី​សហរដ្ឋអាមេរិក​លោក Donald Trump ​ដើម្បី​ស្វែង​រក​វិធានការណ៍​នានា​ រារាំង​ការ​ជឿនលឿន​ខាង​យោធា​របស់​អ៊ីរ៉ង់​នៅក្នុង​តំបន់​មជ្ឈិមបូព៌ា។

ជំនួប​រវាង​មេដឹកនាំ​ទាំងពីរ​ធ្វើឡើង​បន្ទាប់​ពី​លោក Trumpបាន​ថ្លឹងថ្លែង​ថា​តើ​ត្រូវ​ដក​សហរដ្ឋអាមេរិក​ចេញ​ពី​កិច្ចព្រមព្រៀង​អន្តរជាតិ​ឆ្នាំ១០១៥​ ដែល​មាន​បំណង​ទប់ស្កាត់​ការ​អភិវឌ្ឍ​អាវុធ​របស់​រដ្ឋាភិបាល​ក្រុងតេហេរ៉ង់​ ជា​កិច្ចព្រមព្រៀង​មួយ​ដែល​លោក Netanyahu​ បាន​ប្រឆាំង​ជា​យូរ​មក​ហើយ​ ថា​ជា​កិច្ចព្រមព្រៀង​ដែល​គ្មាន​ន័យ​គ្រប់គ្រាន់។ ក៏​ប៉ុន្តែ​លោក Trump បាន​បរាជ័យ​ក្នុង​ការ​ទទួល​បាន​ការ​គាំទ្រ​ពី​ប្រទេស​ដែល​ជា​ហត្ថលេខី​នៃ​កិច្ចព្រមព្រៀង​ មាន​ដូចជា​ចក្រភព​អង់គ្លេស​ អាល្លឺម៉ង់​ សហភាព​អ៊ឺរ៉ុប​ ចិន​ និង​រុស្ស៊ី​ឲ្យ​ធ្វើ​ការ​ចរចា​លើ​កិច្ចព្រមព្រៀង​នោះ​ឡើង​វិញ។

មុន​នឹង​ធ្វើ​ដំណើរ​ទៅ​រដ្ឋធានីវ៉ាស៊ីតោន​ លោក Netanyahuបាន​ថ្លែង​ថា «ខ្ញុំ​មាន​បំណង​ពិភាក្សា​អំពី​បញ្ហា​នានា​ជាមួយ​នឹង​លោក Trump ជា​ពិសេស​ភាពគឃ្លើន​របស់​អ៊ីរ៉ង់​ មាន​ដូចជា​មហិច្ឆតា​ផលិតនុយក្លេអ៊ែរ ​និង​សកម្មភាព​គឃ្លើន​របស់​ពួកគេ​នៅ​ក្នុង​តំបន់​មជ្ឈិមបូព៌ា​ ក៏​ដូចជា​នៅ​តាម​ព្រំដែន​របស់​យើង​ផងដែរ»។

ការ​កើនឡើង​នៃ​វត្តមាន​កងកម្លាំង​អ៊ីរ៉ង់​នៅក្នុង​ប្រទេសស៊ីរី​ ដែល​ជួយ​គាំទ្រ​ដល់​ប្រធានាធិបតី Bashar al-Assad គឺ​ជា​ក្តី​បារម្ភ​យ៉ាង​ខ្លាំង​សម្រាប់​លោក Netanyahu។ លោក​បាន​រិះគន់​រដ្ឋាភិបាល​ទីក្រុង​តេហេរ៉ង់​ពី​ការ​ស្វែង​រក​ការបោះ​ទីតាំង​ជា​អចិន្ត្រៃយ៍​នៅ​ក្នុង​ប្រទេស​ស៊ីរី។

លោក Michael Oren អនុរដ្ឋមន្ត្រី​ទទួល​បន្ទុក​គណៈរដ្ឋមន្ត្រី​អ៊ីស្រាអែល​ និង​ជាអតីត​ឯកអគ្គរដ្ឋទូត​អ៊ីស្រាអែល​ប្រចាំ​រដ្ឋធានី​វ៉ាស៊ីតោន​ កាល​ពី​ថ្ងៃអាទិត្យ​បាន​ថ្លែង​តាម​ស្ថានីយ៍​ទូរទស្សន៍​អ៊ីស្រាអែល​ថា «យើង​ចង់​ដឹង​ ហើយ​យើង​ត្រូវ​តែដឹង​ ថា​តើសហរដ្ឋ​អាមេរិក​នឹង​មាន​ជំហរ​យ៉ាងណា​ប្រសិនបើ​យើង​សម្រេច​ចិត្ត​ថា​នឹង​ប្រឈមមុខ​ជាមួយ​នឹង​អ៊ីរ៉ង់​នោះ»>

XS
SM
MD
LG