ប្រធានាធិបតីសហរដ្ឋអាមេរិកលោកJoe Biden ជួបជាមួយនាយករដ្ឋមន្ត្រីអ៊ីស្រាអែលលោកBenjamin Netanyahu នៅបូរី New York កាលពីថ្ងៃពុធដើម្បីពិភាក្សាគ្នាអំពីការពង្រីកការតាំងលំនៅដ្ឋានរបស់អ៊ីស្រាអែលក្នុងតំបន់ West Bank ដែលអ៊ីស្រាអែលកាន់កាប់និងអំពីការប៉ុនប៉ងសើរើប្រព័ន្ធតុលាការនៃប្រទេសអ៊ីស្រាអែល ដែលពួកអ្នករិះគន់និយាយថាគំរាមកំហែងលទ្ធិប្រជាធិបតេយ្យនៃប្រទេសនេះ។
តាមធម្មតា ពួកមេដឹកនាំអ៊ីស្រាអែលត្រូវបានអញ្ជើញឲ្យមកសេតវិមានក្នុងពេលតែប៉ុន្មានសប្តាហ៍ក្រោយចូលកាន់តំណែង តែលោក Biden ទើបតែបានជួបទ្វេភាគីលើកទីមួយជាមួយលោក Netanyahu នៅពេល៩ខែក្រោយនាយករដ្ឋមន្ត្រីរូបនេះបង្កើតរដ្ឋាភិបាលស្តាំជ្រុលរបស់លោក។ ការប្រព្រឹត្តិរបស់រដ្ឋាភិបាលប្រកាន់នយោបាយតឹងរ៉ឹងរបស់លោក Netanyahu លើជនជាតិប៉ាឡេស្ទីននិងការប្រឹងប្រែងបន្ថយអំណាចតុលាការត្រូវបានយល់ឃើញថាជាហេតុផលឱ្យលោក Biden ពន្យារពេលជំនួបនេះ។
ដោយនិយាយយោងដល់ទំនាក់ទំនងបួនទសវត្សរ៍របស់លោកជាមួយលោក Biden លោក Netanyahu បានថ្លែងថា«មិត្តភាពរបស់យើងមានយូរយាមកហើយហើយអាចមានយូរតទៅទៀត»។
ឥស្សរជនទាំងពីរនាក់នេះបានពិភាក្សាគ្នាអំពីលទ្ធភាពនៃការធ្វើឱ្យទំនាក់ទំនងរវាងអ៊ីស្រាអែលនិងអារ៉ាប៊ី សាអ៊ូឌីតមានភាពធម្មតាប្រក្រតីឡើងវិញនិងអំពីការពង្រីកកិច្ចព្រមព្រៀង Abraham ឆ្នាំ២០២០នៃរដ្ឋបាលលោក Trump ដែលបានសម្រួលឱ្យមានចំណងទាក់ទងការទូតរវាងអ៊ីស្រាអែលនិងប្រទេសអារ៉ាប់ជិតខាង គឺប្រទេសបារ៉ែននិងប្រទេសអេមីរ៉ាតអារ៉ាប់រួម ហើយបន្ទាប់មកជាមួយប្រទេសម៉ារ៉ុកនិងស៊ូដង់។
ជាច្រើនខែមកហើយ រដ្ឋបាលលោក Biden បានធ្វើការចរចាដាច់ដោយឡែកពីគ្នាជាមួយពួកអារ៉ាប៊ី សាអ៊ូឌីតនិងអ៊ីស្រាអែលដើម្បីចាប់ផ្តើមការងារធ្វើឱ្យទំនាក់ទំនងគ្នាមានភាពធម្មតាប្រក្រតី។ រដ្ឋាភិបាលក្រុងវ៉ាស៊ីនតោនសង្ឃឹមថាកិច្ចព្រមព្រៀងមួយបែបនេះអាចនាំឱ្យតំបន់មជ្ឈិមបូព៌ាមានស្ថិរភាពជាងមុននិងធ្វើឱ្យអារ៉ាប៊ីសាអ៊ូឌីតមានភាពជិតស្និទ្ធជាងមុនជាមួយសហរដ្ឋអាមេរិកក្នុងការប្រកួតប្រជែងជាមួយប្រទេសចិន។
អ៊ីស្រាអែលនឹងទទួលផលល្អខាងនយោបាយនិងសេដ្ឋកិច្ចពីទំនាក់ទំនងធម្មតាប្រក្រតីជាមួយប្រទេសអារ៉ាប៊ី សាអ៊ូឌីត ដែលជាប្រទេសអារ៉ាប់សំខាន់មួយនិងជាប្រទេសមានមតិខ្លាំងក្នុងពិភពអារ៉ាប់។ កិច្ចព្រមព្រៀងនេះអាចនាំឱ្យមានការទទួលស្គាល់ពីប្រទេសឥស្លាមធំៗទៀត មានរួមប្រទេសឥណ្ឌូណេស៊ីនិងប្រទេសម៉ាឡេស៊ី-ដែលជាជ័យជំនះធំមួយរបស់លោក Netanyahu៕
