គណៈកម្មាធិការជាតិរៀបចំការបោះឆ្នោត(គ.ជ.ប) នឹងរៀបចំពិធីចាប់ឆ្នោតជាសាធារណៈ នៅថ្ងៃចន្ទ ទី៨ខែមករា វេលាម៉ោង ៨:៣០ នាទីព្រឹក នៅក្រសួងមហាផ្ទៃ ដើម្បីកំណត់លេខរៀងគណបក្សនយោបាយលើសន្លឹកឆ្នោត សម្រាប់ការបោះឆ្នោតជ្រើសតាំងសមាជិកព្រឹទ្ធសភានីតិកាលពី៤ ក្នុងឆ្នាំ២០១៨នេះ។ នេះបើយោងតាមសេចក្ដីជូនដំណឹងរបស់គ.ជ.ប ដែលបច្ចុប្បន្នមានអ្នកនាំពាក្យពីររូប ដែលបានចេញផ្សាយនៅថ្ងៃព្រហស្បតិ៍នេះ។
ការចាប់ឆ្នោតកំណត់លេខរៀងគណបក្សនយោបាយលើសន្លឹកឆ្នោតនេះ នឹងធ្វើឡើងដោយសម្ដេចសង្ឃទាំងពីរគណៈនៃព្រះរាជាណាចក្រកម្ពុជា។ នេះបើយោងតាមសេចក្ដីជូនដំណឹងរបស់គ.ជ.បដដែល។
ការបោះឆ្នោតគ្រោងនឹងធ្វើឡើងនៅថ្ងៃទី២៥ ខែកុម្ភៈឆ្នាំ២០១៨នេះ។
ការបោះឆ្នោតដែលត្រូវធ្វើឡើងរាល់៦ឆ្នាំម្ដងនេះ គឺជាការបោះឆ្នោតអសកល ដោយអ្នកបោះឆ្នោតនិងអង្គបោះឆ្នោតគឺជាតំណាងរាស្ត្រក្នុងតំណែង និងជាសមាជិកក្រុមប្រឹក្សាឃុំសង្កាត់ក្នុងតំណែងទាំងអស់។
ការបោះឆ្នោតជ្រើសតាំងសមាជិកព្រឹទ្ធសភានីតិកាលពី៤នេះ ត្រូវគេមើលឃើញថា គណបក្សប្រជាជនកម្ពុជា នឹងឈ្នះអាសនៈស្ទើរតែទាំងអស់ ដោយសារគណបក្សសង្គ្រោះជាតិ ដែលមានកម្លាំងប្រកួតប្រជែងជាមួយគណបក្សកាន់អំណាចនេះ ត្រូវបានរំលាយកាលពីពាក់កណ្ដាលខែវិច្ឆិកាកន្លងទៅ៕
