ភ្ជាប់​ទៅ​គេហទំព័រ​ទាក់ទង

លោក កឹម សុខា ​បានអំពាវនាវ​ឲ្យ​មាន​ការ​បោះឆ្នោត​សេរី និង​យុត្តិធម៌​ក្នុង​សារ​សម្រាប់​ឆ្នាំ​ថ្មី​របស់​លោក


ក្រុម​សមាជិក​នៃ​សហភាព​អន្តរ​សភា ​IPU​ ឬ Inter-Parliamentary Union  ​ដែល​មាន​សមាជិក​ជា​តំណាង​រាស្ត្រ​ជាង​៨០០​ ​នាក់ពី​ ​១៥៥​ ​ប្រទេស​ទូទាំង​ពិភាព​លោក​ ​បាន​លើក​ឡើង​អំពី​​បញ្ហា​កម្ពុជា ​និង​ទាមទារ​ឱ្យ​មាន​ការ​ដោះ​លែង​លោក​ ​កឹម ​សុខា​ ​គណបក្ស​សង្គ្រោះជាតិ​ ​ដែល​ស្ថិតក្នុងការ​ឃុំ​​ខ្លួន​ពី​បទ​ក្បត់​ជាតិ នៅក្នុងសមាជនៃសហភាពអន្តរសភាលើកទី១៣៧ កាលពីថ្ងៃទី១៨ ខែតុលា ឆ្នាំ២០១៧។ (រូបថតដោយ IPU)

ក្នុង​សារ​បុណ្យ​ចូលឆ្នាំថ្មី ​កាលពី​ថ្ងៃចន្ទ លោកកឹម សុខា​មេដឹកនាំ​គណបក្ស​ប្រឆាំង​ដែល​កំពុង​ជាប់​ពន្ធនាគារ​បាន​អំពាវនាវ​ឲ្យ​មានការ​បោះឆ្នោត​សេរី និង​យុត្តិធម៌​នៅ​ប្រទេស​កម្ពុជា។​

លោកកឹម សុខា​ប្រធាន​គណបក្ស​សង្គ្រោះជាតិ​ដែលជា​គណបក្ស​ប្រឆាំង​ដែល​ត្រូវរំលាយ​ត្រូវបាន​ចាប់ខ្លួន​កាលពីខែ​កញ្ញា​នៅពេល​រំលង​អធ្រាត្រ។​ លោក​ត្រូវ​ចោទ​ប្រកាន់​អំពី​បទ​ព្យាយាម​រំលំរដ្ឋាភិបាល​របស់លោក​នាយករដ្ឋ​មន្ត្រី​ហ៊ុន សែន ​ដោយ​ចោទថាមាន​ការ​ជួយ​ជ្រោមជ្រែង​អាមេរិកាំង ​និង​បទ​ចារកម្ម។ ទោះ​ជា​យ៉ាង​ណាក្តី​លោក​បាន​បដិសេធ​ការ​ចោទ​ប្រកាន់នេះ​ ដោយ​និយាយ​ថា ការ​ចោទ​នេះ​មាន​គំនិត​នយោបាយ។

លិខិត​របស់​លោក​ប្រវែងពីរ​ទំព័រ ដែល​នាង​កឹម មនោវិទ្យា ​កូនស្រី​របស់​លោក​អាន​ ហើយ​បង្ហោះ​នៅតាម​បណ្តាញ​សង្គម ​ Facebook កាលពី​ថ្ងៃចន្ទ​ សរសេរ​ថា​ ប្រទេស​កម្ពុជា​ប្រឈម​នឹងការ​បាត់បង់​ជំនួយ និង​ទីផ្សារនាំ​ចេញ​ទៅក្រៅ​ប្រទេស​ ព្រមទាំង​ប្រឈមនឹង​ការ​ថ្កោលទោស​ពី​សហគមន៍​អន្តរជាតិ​ ក្រោយ​ពី​ការ​រំលាយ​គណបក្ស​សង្គ្រោះ​ជាតិ។​ លោក​កឹម សុខា​សរសេរ​ថា​ សូម​ទុក​ឱកាស​ឲ្យ​ប្រជា​ពលរដ្ឋ​កម្ពុជា​ជ្រើសរើស​មេដឹកនាំ​តាមរយៈ​ការបោះឆ្នោត​សេរី​និង​យុត្តិធម៌។ ​

លោក​អំពាវនាវ​ឲ្យមាន​ការឯក​ភាពជាតិ និងដោះ​ស្រាយ​វិបត្តិ​នយោបាយដោយ​គ្មាន​អំពើ​ហិង្សា។​សារ​របស់​លោក​ធ្វើឡើង​នៅ​ពេល​មាន​ការ​បង្ក្រាប​ជា​បន្តបន្ទាប់​ដោយ​រដ្ឋាភិបាល​កម្ពុជា​ប្រឆាំង​អ្នក​រិះគន់​ប្រឆាំង​អង្គការ​សង្គម​ស៊ីវិល និង​ប្រព័ន្ធ​ផ្សព្វផ្សាយ​ឯករាជ្យដែល​ក្រុម​សិទ្ធិ​មនុស្សនិយាយ​ថា ​ជាការ​បំផ្លាញ​លទ្ធិប្រជា​ធិបតេយ្យ។ ​គណបក្ស​សង្គ្រោះជាតិ​របស់​លោកកឹម សុខា​ត្រូវ​រំលាយដោយ​តុលាការកំពូល​កាលពី​ខែ​វិច្ឆិកា​ឆ្នាំ​២០១៧​ តាមសំណើ​របស់​រដ្ឋាភិបាល។​ ការ​សម្រេច​នេះក៏​បាន​ហាមប្រាម​អ្នក​តំណាងរាស្ត្រ​ និង​មន្ត្រី​គណបក្ស​ប្រឆាំង​ជាង​១០០នាក់​មិន​ឲ្យធ្វើ​នយោបាយ​ដែរ។​

បំរាម​នេះ​បាន​នាំ​ឲ្យ​សហភាព​អឺរ៉ុប​និង​ស.រ.អា.​ដកការ​គាំទ្រ​សម្រាប់​ការ​បោះឆ្នោត​ឆ្នាំ​២០១៨។ កម្ពុជា​នឹង​ធ្វើការ​បោះឆ្នោត​ជ្រើស​រើស​តំណាង​រាស្ត្រ​នៅថ្ងៃ​ទី២៨ ខែកក្កដា​ឆ្នាំ​២០១៨។ ​លោក​ហ៊ុន សែន​ដែល​បាន​កាន់​អំណាច​ជាង៣០​ឆ្នាំមកនេះ ​បាន​ប្រកាស​ថា លោក​នឹង​បន្ត​កាន់អំណាច​យ៉ាងតិច​មួយ​ទសវត្សរ៍​ទៀត។​ លោកកឹម សុខា​និយាយ​ថា ការបោះ​ឆ្នោត​ឆ្នាំ​២០១៧មាន​វិបត្តិ​នយោបាយ​ធំៗ​ ដែល​នាំ​ឲ្យមាន​ការ​ដើរ​ថយ​ក្រោយ​នៃ​លទ្ធិប្រជា​ធិបតេយ្យ។​

លោក​សុខ ឥសាន​ អ្នកនាំ​ពាក្យ​គណបក្ស​កាន់អំណាច​របស់​លោក​ហ៊ុន សែន​និយាយ​ថា ​សារ​ចូល​ឆ្នាំថ្មី​របស់​លោកកឹម សុខា​មាន​ចំណាប់​អារម្មណ៍​តិចតួច។​ លោក​បន្ថែម​ថា អ្នក​នយោបាយ​ប្រឆាំង​អាច​បង្កើត​គណបក្ស​ថ្មី​បាន។ ​លោក​និយាយ​ថា ក្នុងនាម​ជា​ពលរដ្ឋ ​ពួកគេ​មាន​សិទ្ធិ​ធ្វើ​នយោបាយ​ បង្កើត​គណបក្សថ្មី​ដើម្បី​ប្រកួត​ប្រជែង៕

XS
SM
MD
LG