ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេ​គ.ជ.ប.​ស្នើ​ឲ្យ​មន្ត្រី​រក្សា​សាមគ្គីភាព​និង​ជំហរ​ឯករាជ្យ


រូប​ឯកសារ​៖ លោក ស៊ិក ប៊ុនហ៊ុក ប្រធាន​គណៈ​កម្មការ​រៀបចំ​ការ​បោះឆ្នោត គ.ជ.ប នៅ​ក្នុង​កិច្ច​ពិភាក្សា​មួយ​ទាក់ទង​នឹង​ការ​ចុះឈ្មោះ​បោះឆ្នោត ក្នុង​រាជធានី​ភ្នំពេញ​ កាល​ពី​ថ្ងៃ​ទី​៥​ ខែ​សីហា​ ឆ្នាំ​២០១៦។ (ហ៊ាន សុជាតា/VOA)

លោក​ប្រធាន​គ.ជ.ប​ ​ស៊ិក ប៊ុនហុក​ ​ដែល​គេដឹង​ថា​ជាមន្ត្រី​ស្នូល​មួយ​រូប​របស់​បក្ស​កាន់​អំណាច​បាន​ស្នើ​​ឲ្យ​ក្រុមមន្ត្រី​ក្រោម​ឱវាទ​លោក​ ត្រូវ​មាន​សាមគ្គី​ផ្ទៃក្នុង​ល្អ​ក្នុង​រាជធានី​ ខេត្តនីមួយៗ​ ព្រោះ​កត្តា​ផ្ទៃ​ក្នុងនេះ​ហើយ​ជា​ ​កត្តា​កំណត់​ជ័យ​ជំនះ​​ ឬ​បរាជ័យ។

ស្ថាប័ន​ជាតិ​រៀបចំ​ការ​បោះឆ្នោត​ ​បាន​ប្តេជ្ញា​ខិតខំ​បន្ត​ដំណើរ​រៀបចំ​ការ​បោះឆ្នោត​ទៅតាមច្បាប់​កំណត់ និង​បាន​ជំរុញ​ឲ្យ​មន្ត្រី​របស់​ខ្លួន​រក្សា​ឲ្យ​បាន​នូវ​ជំហរ​អព្យាក្រឹត​ទោះបី​ប្រឈម​នឹង​ការរិះគន់​ពី​មន្ត្រី​អង្គការ​សហ​ប្រជាជាតិ​ថា​ ការ​បោះឆ្នោត​ខែកក្កដា​ខាង​មុខមិនមែន​ជា​ការ​បោះឆ្នោត​ពិតប្រាកដ​នោះ​ឡើយ​ ​ដោយ​សារ​អវត្តមាន​គណបក្សប្រឆាំង​ដែល​ត្រូវ​តុលាការ​រំលាយ​ចោល។

យោង​តាម​សេចក្តី​ប្រកាស​ព័ត៌មាន​របស់​គណៈកម្មាធិការ​ជាតិ​រៀបចំ​ការ​បោះឆ្នោត ហៅ​កាត់​ថា​ គ.ជ.ប​ចុះថ្ងៃទី​៣១​ ខែ​ឧសភា​ ឆ្នាំ​២០១៨​ បាន​បញ្ជាក់​ឲ្យដឹង​ថា​លោក​ប្រធាន​គ.ជ.ប​ ​ស៊ិក ប៊ុនហុក​ ​ដែល​គេដឹង​ថា​ជាមន្ត្រី​ស្នូល​មួយ​រូប​របស់​បក្ស​កាន់​អំណាច​បាន​ស្នើឲ្យ​ក្រុមមន្ត្រី​ក្រោម​ឱវាទ​លោក​ ត្រូវ​មាន​សាមគ្គី​ផ្ទៃក្នុង​ល្អ​ក្នុង​រាជធានី​ ខេត្តនីមួយៗ​ ព្រោះ​កត្តា​ផ្ទៃ​ក្នុងនេះ​ហើយ​ជា​ ​កត្តា​កំណត់​ជ័យ​ជំនះ ឬ​បរាជ័យ។

លោក​ ​ស៊ិក ប៊ុនហុក​ ​ត្រូវបាន​ស្រង់​ប្រសាសន៍​ក្នុង​សេចក្តី​ប្រកាស​នោះ​ថា៖

«ខ្ញុំ​ត្រូវការ​របៀប​ធ្វើ​ការ​មួយ​ប្រៀប​ដូច​ជា​ឃ្មុំ​ ខ្ញុំ​មិនត្រូវការ​របៀប​ធ្វើការ​ដង្កូវទេ»​។

លោក​ ស៊ិក ប៊ុនហុក​ ​បាន​បញ្ជាក់​ផងដែរ​ថា​ គ.ជ.ប​ និង​ក្រសួង​មហាផ្ទៃ​ នឹង​ចេញ​សេចក្តីណែនាំ​រួម​មួយ​ក្នុង​រយៈពេល​ដ៏ខ្លី​ខាងមុខនេះ​ ស្តីពីកិច្ច​សហប្រតិបត្តិការ​រវាង​អាជ្ញាធររដ្ឋបាល​ថ្នាក់​ក្រោម​ជាតិ​ និង​ ​គ.ជ.ប​ ​គ្រប់​លំដាប់​ថ្នាក់​ ក្នុងកិច្ច​ដំណើរការ​បោះឆ្នោត​ជ្រើសតាំង​តំណាង​រាស្ត្រ​ នីតិកាល​ទី​៦​ ឆ្នាំ​២០១៨​។

តាម​កិច្ច​សហប្រតិបត្តិការ​នោះ​ អភិបាល​ខេត្ត​ អាជ្ញាធរ​គ្រប់​លំដាប់​ថ្នាក់​ ត្រូវ​ផ្តល់​កិច្ចសហការ​ គ.ជ.ប​ គ្រប់​លំដាប់​ថ្នាក់​ ដើម្បី​ពិភាក្សា​ និង​ឯកភាព​គ្នា​កំណត់​ទីតាំង​ រៀបចំ​កាល​វិភាគ​ប្រចាំ​សប្តាហ៍​ ការប្រើ​ប្រាស់​ទីតាំង​ ​លំដាប់​មុន​ក្រោយ​ ​សហការ​សម្រប​សម្រួល​ និង​រៀបចំ​ជាមួយ​គណបក្ស​នយោបាយ​ «ចាត់​វិធានការ​ទប់​ស្កាត់​ និង​ដោះស្រាយ​ចំពោះ​ការ​ឃោសនា​ដែល​ផ្ទុយ​ពីច្បាប់​ ​សហការ​រក្សា​សន្តិ​សុខ​ ​សណ្តាប់​ធ្នាប់​ របៀប​រៀប​រយ​ឲ្យបាន​ល្អ​»។

ក្នុងកិច្ចសហប្រតិការ​រវាង​ ​គ.ជ.ប​ ​និង​ក្រសួង​មហាផ្ទៃ​ដដែល​នោះ​ ​ក៏​តម្រូវ​ឲ្យមន្ត្រី​រាជការ​ស៊ីវិល​គ្រប់​លំដាប់​ថ្នាក់​ ​ត្រូវ​មាន​អព្យាក្រឹត​ភាព​ក្នុង​សកម្មភាព​ការងារ​ ​និង​ត្រូវ​ប្រកាន់​ជំហរ​អព្យាក្រឹត​ឥត​លម្អៀង​ក្នុង​ការ​បោះឆ្នោត។​ ​ក្នុង​នោះ​ ក្រុមប្រឹក្សា​ឃុំ​ សង្កាត់​ ​មេភូមិ​ ​អនុប្រធានភូមិ​ ​និង​សមាជិក​ភូមិ​ ដែល​មិន​ស្ថិត​ក្នុង​ក្របខ័ណ្ឌ​មុខងារ​សាធារណៈ​ ​ក៏​ត្រូវ​ប្រកាន់​ជំហរ​អព្យាក្រឹត​ឥត​លម្អៀង​ក្នុងការ​អនុវត្ត​មុខ​ងារ​របស់​ខ្លួន​ក្នុង​ដំណើរ​ការ​បោះឆ្នោត​ផងដែរ​។

គ.ជ.ប​ ​ក៏​បាន​ឲ្យដឹងថា​ ​យុទ្ធនាការ​ឃោសនា​បោះឆ្នោត​នឹង​ប្រព្រឹត្ត​ទៅពីថ្ងៃ​ទី​៧ ដល់​ថ្ងៃទី​២៧​ ខែកក្កដា​ ​ឆ្នាំ​២០១៨​។

ទោះ​ណា​ជា​ ​គ.ជ.ប​ ​បាន​បង្ហាញ​ពី​ការ​វិវត្តន៍​វិជ្ជមានក្នុងដំណើរ​រៀបចំ​ការ​បោះឆ្នោត​ដោយ​មាន​ការ​គ្រោង​ទុក និង​ផែនការ​ត្រឹមត្រូវ​ក្តី​ ក៏ដំណើរ​ការ​បោះឆ្នោត​នេះ​ ​នៅ​ស្ថិត​ក្រោម​ការ​រិះគន់​របស់​អ្នក​ឃ្លាំមើល​ស្ថានការណ៍​នយោបាយ​កម្ពុជា​។

ថ្លែង​ក្នុង​វេទិកា​ពិភាក្សា​ស្តីពី​ការ​ទទួល​ស្គាល់​លទ្ធផល​បោះឆ្នោត​ពីអន្តរជាតិ​ បើអវត្តមាន​គណបក្ស​ប្រឆាំង​ធំ​ របស់​សំឡេង​សង្គម​ស៊ីវិល​រៀបចំ​ដោយ​អង្គការ​ឃ្លំាមើល​ការបោះឆ្នោត​ Comfrel ​កាលពីថ្ងៃ​៣០​ឧសភា​ ​លោក​ ​ឡៅ ម៉ុងហៃ​ ​អ្នកវិភាគ​ឯករាជ្យ​មានប្រសាសន៍ថា​ ​ក្នុងស្ថានការណ៍នយោបាយ​បច្ចុប្បន្ន​ ​ដែលគ្មាន​វ​ត្តមាន​គណបក្ស​សង្គ្រោះជាតិ​នោះ​ ​ការបោះឆ្នោតដែល​កំពុងខិត​ចូលមក​ដល់​នោះ​ ​នឹង​ក្លាយ​ជា​ការ​បោះឆ្នោត​ ​«អត់មានន័យ​»។

លោក​បាន​បញ្ជាក់​ថា៖

«ការ​បោះឆ្នោត​នេះ​គឺ​បើនិយាយ​ទៅ​បាទ​ វាអត់មាន​ន័យ អត់មានន័យ​ទាល់​តែ​សោះ​បាទ​ ព្រោះ​ការ​រៀបចំ​ក្នុងកាលៈ​ទេសៈ​បែប​អីចឹង​ ក្រោយដែល​បាទ​ មានការ​រំលាយ​បាទ​ គណបក្ស​មួយ​ និង​ចែក​អាសនៈ​បាទ​ ទៅ​បុគ្គល​ដែល​ ប្រជាពលរដ្ឋ​មិនបាន​បោះឆ្នោត​ឲ្យនោះ​ គឺវាអធម្មនុញ្ញ​ភាព​ និង​អយុត្តិ​ធម៌​ខ្លាំង​ណាស់។​ ម្ល៉ោះ​ហើយ​គឺដែល ការរៀបចំ​ ការ​បោះឆ្នោត​នេះ​ ចំពោះ​ខ្ញុំ ហើយការ​បោះឆ្នោត​នេះ ខុសពី​ការ​បោះឆ្នោត​មុន​ៗ​ គឺវាអត់​មានន័យ​អីទៅ​បាទ​ ព្រោះគ្រាន់​ជា​ការ​បង្គ្រប់ ធ្វើ​ឲ្យ​បង្គ្រប់​កិច្ច​បាទ»។

លោក ឡៅ ម៉ុងហៃ​ ​បាន​បន្តថា​ ប្រជារាស្ត្រខ្មែរ​ ​បាន​កំពុង​បាត់​សិទ្ធិខ្លួន​ ​ទៅ​ក្នុង​ការ​ក្តោបក្តាប់​របស់​គណបក្ស​នយោ​បាយមួយ៖

«ដោយសារ​អីគឺ​កាលណា​គេ​និយាយ​ពីការ​បោះឆ្នោត​ គេនិយាយ​ពីអំណាច​របស់​ប្រជាពលរដ្ឋ​ ហើយ​នៅក្នុង​រដ្ឋ​ធម្មនុញ្ញ​គឺ​ អំណាច​ហ្នឹង​គឺ​ ជារបស់​ប្រជាពលរដ្ឋ​ ប្រជាពលរដ្ឋ​នៅការ​ ក្រោមការ​គាបសង្កត់​ អត់ៗ​មានសិទ្ធិ​សេរីភាព​ក្នុងការ​ប​ញ្ចេញមតិ​ បញ្ចេញ​អីហ្នឹងគឺ​ វាបាត់​អាណែ​ អំណាច​នេះទៅ​បាទ។ អំណាច​វាអាស្រ័យនឹង​សិទ្ធិសេរីភាព​បាទ។​ ​ចុះបើសិន​ជា​ មានការ​គាបសង្កត់​ ជា​បណ្តើរ​ៗ​ ហូរហែ​មក​ចេះ​។ អាហ្នឹង​គឺ ​វាអស់​អំណាច​ទៅ​ ​ហើយ​គឺការពិត​ជាក់​ស្តែង​ អំណាច​ហ្នឹង​វា​នៅក្នុងកណ្តាប់​ដៃ​នៃគណ​បក្ស​មួយ​ស្រេច​ទៅហើយបាទ​»។

ការ​បោះឆ្នោត​នៅ​ថ្ងៃ​ទី​២៩ ​ខែ​កក្កដា​នេះ​ត្រូវ​បាន​ក្រុម​មន្ត្រី​កម្ពុជា​ ក្រុម​អង្គការ​សិទ្ធិ​មនុស្ស​ និង​ម្ចាស់​សន្លឹក​ឆ្នោត​ផ្តល់​ទស្សនៈ​ខុសៗ​គ្នា ​បង្កឲ្យ​មាន​ភាព​ចម្រូង​ចម្រាស។

ក្រុម​មន្ត្រី​គណបក្ស​កាន់​អំណាច​អះអាង​ថា ​ការ​បោះឆ្នោត​លើក​នេះ​បានធ្វើឡើង​ក្នុង​បរិការ​សេរី​ ​ព្រោះ​មាន​គណ​បក្ស​ជា​ច្រើន​ចូល​រួម​ ​ទោះបី​គ្មាន​គណបក្ស​សង្គ្រោះ​ជាតិ​ ដែល​ត្រូវ​បានរដ្ឋាភិបាល​លោក ​ហ៊ុន សែន ​ប្តឹង​រំលាយ​ចោល​ក៏ដោយ។​ ​តែក្រុមមន្ត្រី​ និងមេដឹកនាំ​បក្ស​សង្គ្រោះ​ជាតិបាន​បន្ទរ​តាម​មន្ត្រី​អង្គការ​សហ​ប្រជាជាតិ​គឺ​អ្នក​ស្រីរ៉ូណា ស្មីត​ (Rhona Smith) ប្រេសិត​ពិសេស​របស់ អ.ស.ប.​ថា​ ការ​បោះឆ្នោត​ខាង​មុខ​ជា​ការ​បោះ​ឆ្នោត​ក្លែង​ក្លាយ​ នៅ​គ្រា​ដែល​គណបក្ស​សង្គ្រោះ​ជាតិ​មិន​ត្រូវ​បាន​គេ​អនុញ្ញាត​ឲ្យ​ចូល​រួម​ក្នុង​ការ​បោះឆ្នោត។ អ្នកស្រី​ស្មីតក៏​អំពាវនាវ​ដល់​រដ្ឋាភិបាល​ទី​ក្រុង​ភ្នំពេញ​ ទម្លាក់​ចោល​បម្រាម​ដែល​ហាម​ក្រុម​មន្ត្រី​របស់​គណ​បក្ស​ប្រឆាំង​ចំនួន​១១៨រូប មិន​ឲ្យ​ធ្វើ​នយោបាយ​ផង​ដែរ​។

រី​ឯ​អ្នក​ផ្តល់​ការ​គាំទ្រ​គណបក្ស​សង្គ្រោះ​ជាតិ​ បាន​និយាយ​កាលពី​ពេល​កន្លង​មក​ថា​ ពួក​គេ​មិន​ទៅ​បោះ​ឆ្នោតនោះ​ទេ​ បើគ្មាន​គណបក្ស​សង្គ្រោះ​ជាតិ។ ​ពួក​គេសម្តែង​មតិព្រមៗគ្នា​ថាតើ​ត្រូវ​បោះ​ឲ្យ​អ្នកណា​ បើ​មាន​តែ​គណបក្ស​កាន់​អំណាច​ចូល​ប្រកួត​ ដោយ​គ្មាន​គណបក្ស​ប្រឆាំង​ដែល​មាន​ការ​គាំទ្រ​ពី​ប្រជា​ពលរដ្ឋ​ប្រហាក់​ប្រហែល​គ្នា​នោះ​។

រដ្ឋាភិបាល​លោកប្រធានាធិបតី​ ដូណាល់ ត្រាំ​ ក៏​បាន​បង្ហាញ​ការ​«សោកស្ដាយ​យ៉ាង​ខ្លាំង» ចំពោះ​ការ​សម្រេច​របស់​រដ្ឋាភិបាល​កម្ពុជា​ដែល​មិន​អនុញ្ញា​ត​ឲ្យ​គណ​បក្ស​សង្គ្រោះ​ជាតិ ចូល​រួម​នៅ​ក្នុង​ការ​បោះ​ឆ្នោត​នៅ​ខែ​កក្កដា ឆ្នាំ២០១៨​ ខាង​មុខ​នេះ​។

លោក​ស្រី​ ​Heather Nauert​ ​អ្នក​នាំ​ពាក្យ​ក្រសួង​ការ​បរទេសសហរដ្ឋ​អាមេរិក ​បានថ្លែងក្នុង​សេចក្ដី​ប្រ​កាស​ព័ត៌មាន​ដែល​បាន​ចេញ​ផ្សាយ​កាលពី​ទី១៧ ខែ​ឧសភា​កន្លងទៅថា៖​ ​«ការ​សម្រេច​របស់​រដ្ឋាភិបាល​កម្ពុជា​នេះ បាន​រារាំង​សិទ្ធិ​ប្រជាធិបតេយ្យ​របស់​ប្រជា​ពលរដ្ឋខ្មែរ​ដែល​មាន​សិទ្ធិ​បោះ​ឆ្នោត​រាប់លាន​នាក់ មិន​ឲ្យ​មាន​លទ្ធភាព​បោះ​ឆ្នោត​ឲ្យ​បេក្ខជន​ដែល​ខ្លួន​ពេញ​ចិត្ត និង​ធ្វើ​ឲ្យ​មាន​មន្ទិល​សង្ស័យ​ចំពោះ​សុចរិត​ភាព​នៃ​ដំណើរ​ការ​បោះ​ឆ្នោត​»។

លោក​ ហង្ស ពុទ្ធា​ អ្នកនាំពាក្យ​គ.ជ.ប​ មានប្រសាសន៍ប្រាប់​VOA ​នៅថ្ងៃ​សុក្រ​នេះ​ថា​ សេចក្តី​អធិ​ប្បាយទាំងឡាយដែល​ថា​ ការបោះឆ្នោត​ខែកក្កដា​ អត់ន័យនោះ​ គឺ​មិន​អាច​បង្អាក់​ដំណើរនៃការ​ធ្វើ​តាម​ច្បាប់​របស់​គ.ជ.ប​ ដើម្បី​ធានា​ឲ្យមានការ​បោះឆ្នោត​រយៈពេល​ប្រាំឆ្នាំ​ម្តងនោះឡើយ​។

«​អត់​ន័យ​ ​ឬ​មិនអត់​ន័យ​ មិនមែន​ផ្អែក​ទៅលើ​ ប៉ុន្មាននាក់ដែល​គាត់​និយាយ​នោះទេ បាទ​ ​ហើយ​ក្នុង​នាម​ ​ស្ថាប័ន​អី​ក៏​ដោយ​ គឺ​ផ្អែក​ទៅ​លើ​ច្បាប់​ជាគោល។​ ​អីចឹង​ ​បើ​យើង​ចោទ​ប្រកាន់​ថា​ច្បាប់​ហ្នឹង​ អត់​ន័យ​ អាហ្នឹង​ យើងមិនដឹង​ជា​រស់​នៅ​ក្នុង​ ​ប្រទេស​ណា​ទេ​បាទ»។

​ក្នុង​វេទិកា​ពិភាក្សានៃ​កម្មវិធី​សំឡេង​សង្គម​ស៊ីវិល​រៀបចំដោយ​ Comfrel កាលពីថ្ងៃទី​៣០​ខែឧសភា​ដដែលនោះ​ លោក​ឡៅ ម៉ុងហៃ បាន​ថ្លែង​ថា​ តួលេខ​នៃ​ចំនួន​អ្នកចេញបោះឆ្នោត​ អាច​បង្ក​ផលវិបាក​នៃការ​ទទួល​បាន​ការទទួល​ស្គាល់​ពី​សហគមន៍​អន្តរជាតិ​ដូច​អ្វី​ដែល​បាន​កើត​ឡើង​ថ្មីៗ​នេះ​ នៅ​ឯ​ប្រទេស​វេណេ​ហ្ស៊ុយអេឡា​ដែល​គណបក្ស​កាន់​អំណាច​បាន​រារាំង​បេក្ខជន​ប្រធានាធិបតី​បក្ស​ប្រឆាំង​ដ៏​មាន​សក្តានុពល​ចំនួន​ពីរ​មិន​ឱ្យ​ចូលរួម​បោះឆ្នោត​ហើយ​គណបក្ស​ប្រឆាំង​បាន​ស្នើ​សុំ​ឱ្យ​ពលរដ្ឋ​ធ្វើ​ពហិការ​មិន​ទៅបោះឆ្នោត។

លោក​បាន​បន្ថែម​ថា៖​«ពេលបោះឆ្នោត​ឈ្នះ​មែន នែ៎ៗ​គណបក្ស​កាន់​អំណាច​ហ្នឹង​បាទ។ ក៏ប៉ុន្តែ​អ្នកចូលរួម​បោះឆ្នោត​តិច​ជាង​មុន​ពាក់​កណ្តាល​ ប្រៀប​ធៀប​នឹង​បោះឆ្នោត​មុន​? បាទ។ ម្ល៉ោះ​ហើយ​ គេថា​ គឺ​អាដែល គេ​ជា​ ជា​ដែល​ខ្ញុំ​ថា​ ជា​សួចនាករមួយ​បាទ ដែល​ធ្វើ​ឲ្យ​ប្រទេស​ខ្លះ​ គេអត់ទទួល​ស្គាល់​លទ្ធផល​នៃការ​បោះឆ្នោត​ ហើយមិនត្រឹម​តែ​មិន​ទទួល​ស្គាល់​ទេ​ គេដាក់​ជា​ទណ្ឌកម្ម​ គេដក​អគ្គ​រដ្ឋទូត​គេចេញ​ ពីប្រទេស​ហ្នឹង​ទៅទៀត‍»។

ប៉ុន្តែ​លោក​ ហង្ស ពុទ្ធា​ ថ្លែង​ថា​ មានតែប្រជាពលរដ្ឋខ្មែរ​ប៉ុណ្ណោះ​ ជា​ម្ចាស់​វាសនា​នៃ​ប្រទេស​ខ្លួន។

«បរិបទ​របស់​ប្រទេស​កម្ពុជា​ ​គឺ​ជា​ការ​ទទួល​ខុសត្រូវ​រួម​របស់​ ប្រជាពលរដ្ឋ​កម្ពុជា​នែ៎​! ច្បាប់​តម្រូវ​ឲ្យ​ប្រជាពលរដ្ឋ​ លោក​អញ្ជើញ​ទៅបោះឆ្នោត​ហើយ​ អីចឹង​បើសិន​ជា​ យើងមិន​គោរព​តាមច្បាប់​ទេ​នោះ​ មិនមាន​អីអត្ថាធិប្បាយ​ហួសពីហ្នឹង​ទៀត​ទេណ៎ា​បាទ។ ពីព្រោះថា​ច្បាប់​បានផ្តល់​ ច្បាប់​បាន​ផ្តល់​ឱកាស​សម្រាប់​ការ​បោះឆ្នោត​ហើយនែ៎។ ប៉ុន្តែ​ការ​លើកឡើង​ ឬការ​ទទួល​ស្គាល់​ ឬការមិនទទួល​ស្គាល់​ ដោយ​ទិដ្ឋ​ភាពខាង​ក្រៅ​បាទ នោះ​គឺគ្រាន់តែ​ជាការ​បញ្ចេញមតិ​ខាង​ក្រៅ​នែ៎ វាមិនមែន​ជា​ជីវិត​ និង​ការ​ស្លាប់រស់​របស់​ ប្រជាពលរដ្ឋ​កម្ពុជា​ដែល​ខ្លួននឹង​ដើរ​ដោយ​ខ្លួន​ឯង​មិន​ មិន​ មិន​ព្រោះតែ​ការ​ស្រែក​ពីខាង​ក្រៅ​មក​ធ្វើ​ឲ្យ​កម្ពុជា​ហ្នឹង​អសកម្ម​ទាំងអស់នោះ​ទេណ៎ា។ កម្ពុជា​ត្រូវការ​ធ្វើ​ការ​ និង​រួមរស់​ដោយ​ខ្លួន​ឯង​បាទ»៕

XS
SM
MD
LG