សាច់ញាតិនិងក្រុមអ្នកគាំទ្រអតីតមេបក្សប្រឆាំងរុស្ស៊ីលោក Alexei Navalny គោរពលាសពលោកនៅក្នុងពិធីបុណ្យសពមួយនៅភាគអាគ្នេយ៍ទីក្រុងមូស្គូ នៅថ្ងៃសុក្រនេះ ក្រោយតវ៉ាជាមួយក្រុមអាជ្ញាធរ ដើម្បីយកសពលោកមកធ្វើបុណ្យ បន្ទាប់ពីមរណភាពរបស់លោកដោយគ្មានការពន្យល់នៅក្នុងពន្ធនាគារក្នុងតំបន់អាកទិករួចមក។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ក្រុមអ្នកគាំទ្រមេដឹកនាំបក្សប្រឆាំងរូបនេះនិយាយថា ព្រះវិហាសាសនាគ្រឹស្ទមួយចំនួនក្នុងរដ្ឋធានីមូស្គូ បានបដិសេធមិនទទួលសាកសពដើម្បីធ្វើពិធីបុណ្យឡើយ មុនពេលដែលក្រុមរបស់លោកបានទទួលការអនុញ្ញាតពីព្រះវិហារមួយក្នុងសង្កាត់ Maryino នៃទីក្រុងមូស្គូ ដែលលោក Alexei Navalny ធ្លាប់រស់នៅទីនោះម្តងមុនត្រូវថ្នាំបំពុលកាលពីឆ្នាំ ២០២០ និងមុនទៅព្យាបាលក្នុងប្រទេសអាល្លឺម៉ង់ ហើយត្រូវបានចាប់ខ្លួន បន្ទាប់ពីត្រឡប់មកកាន់រុស្ស៊ីវិញ។
ព្រះវិហារសាសនាគ្រឹស្ទ Mother of God Soothe My Sorrows ដែលបានយល់ព្រមធ្វើពិធីបុណ្យសពលោក Navalny មិនធ្វើអត្ថាធិប្បាយអ្វីឡើយលើបណ្តាញសង្គមរបស់ខ្លួន។ ក្រុមអាជ្ញាធររុស្ស៊ីបានឈរនៅតាមដងផ្លូវមួយកន្លែងនៅជិតស្ថានីយរថភ្លើងក្រោមដី ដែលស្ថិតនៅជិតព្រះវិហារនោះ និងមានដាក់រនាំងបាំងផ្លូវ និងមានក្រុមប៉ូលិសបង្ក្រាបកុប្បកម្មជាច្រើននាក់ត្រូវបានដាក់ពង្រាយនៅទីនោះផងដែរ នៅព្រលឹមថ្ងៃសុក្រនេះ។
ពិធីបញ្ចុះសពមេបក្សប្រឆាំងរុស្ស៊ីរូបនេះក៏ត្រូវបានធ្វើឡើងផងដែរនៅកន្លែងបញ្ចុះសព Borisovskoye ដែលគេឃើញមានក្រុមប៉ូលិសស្ថិតនៅទីនោះផងដែរ។
ម្តាយលោក Navalny អ្នកស្រី Lyudmila Navalnaya បានចំណាយពេល ៨ ថ្ងៃ ដើម្បីសុំអាជ្ញាធរឱ្យផ្តល់សាកសពកូនប្រុសអ្នកស្រីមកធ្វើបុណ្យ ក្រោយពីលោក Navalny បានស្លាប់ក្នុងពន្ធនាគារក្នុងទីក្រុង Kharp ដែលមានចម្ងាយប្រមាណ១៩០០គីឡូម៉ែត្រនៅភាគឦសានក្រុងមូស្គូ។
ក្រុមអាជ្ញាធរមុនដំបូងឡើយថា គេមិនអាចផ្តល់សាកសពលោក Navalny ឱ្យក្រុមគ្រួសារឡើយ ពីព្រោះគេត្រូវការធ្វើតេស្តត្រួតពិនិត្យសាកសព ប៉ុន្តែម្តាយរបស់លោកដែលមានវ័យ ៦៩ ឆ្នាំ បានអង្វរសុំតាមរយៈវីដេអូមួយទៅលោកប្រធានាធិបតីរុស្ស៊ី Vladimir Putin ដើម្បីសុំយកសាកសពកូនប្រុសមកធ្វើបុណ្យនិងបញ្ចុះសពដោយសេចក្តីថ្លៃថ្នូរ។
មេដឹកនាំប្រទេសលោកខាងលិចជាច្រើនបានបន្ទោសមេដឹកនាំរុស្ស៊ី លើការស្លាប់របស់មេដឹកនាំបក្សប្រឆាំងរូបនេះ ប៉ុន្តែវិមានក្រឹមឡាំងបានបដិសេធដោយក្តីខឹងសម្បារ៕
វេទិកាបញ្ចេញមតិ