អគ្គលេខាធិការអង្គការអូតង់ (NATO) លោក Jens Stoltenberg បានសង្កត់ធ្ងន់អំពីភាពចាំបាច់នៅក្នុងការផ្ដល់ដល់ប្រទេសអ៊ុយក្រែននូវគ្រាប់រំសេវបន្ថែមទៀត និងបំពេញឱ្យបានរួចរាល់នូវការបញ្ជូនរថក្រោះនិងសព្វាវុធធុនធ្ងន់ផ្សេងទៀតដល់អ៊ុយក្រែន។ ការលើកឡើងរបស់លោក Stoltenberg នេះបានធ្វើឡើង នៅពេលដែលបណ្ដារដ្ឋមន្ត្រីការពារជាតិនៃប្រទេសជាសមាជិកអង្គការអូតង់និងមន្ត្រីការពារជាតិមកពីក្រុមសម្ព័ន្ធមិត្តអ៊ុយក្រែនដែលដឹកនាំដោយសហរដ្ឋអាមេរិកជួបប្រជុំគ្នានៅថ្ងៃអង្គារនេះក្នុងទីក្រុងព្រុចសែល ប្រទេសបែលហ្ស៊ិក។
លោក Stoltenberg បានប្រាប់អ្នកកាសែតថា ការពិភាក្សានេះធ្វើឡើងនៅចំដំណាក់កាលសំខាន់ និងថា នៅថ្ងៃអង្គារនេះសម្ព័ន្ធមិត្តនឹង«ដោះស្រាយតម្រូវការបន្ទាន់សម្រាប់ការបង្កើនការគាំទ្រចំពោះអ៊ុយក្រែន»។
លោក Stoltenberg បាននិយាយថា៖ «នៅសប្ដាហ៍ក្រោយ សង្គ្រាមដ៏អាក្រក់នៅអ៊ុយក្រែនដែលជាការឈ្លានពានពេញទំហឹងរបស់រុស្ស៊ីលើអ៊ុយក្រែននឹងមានរយៈពេលមួយឆ្នាំហើយ។ យើងមិនឃើញមានសញ្ញាណាមួយដែលបង្ហាញថាប្រធានាធិបតី[រុស្ស៊ីលោក Vladimir] Putin ត្រៀមលក្ខណៈសម្រាប់សន្តិភាពនោះទេ។ អ្វីដែលយើងឃើញគឺផ្ទុយពីនេះ ដែលនោះគឺលោកត្រៀមលក្ខណៈសម្រាប់សង្គ្រាមបន្ថែមទៀត សម្រាប់ការលុកលុយថ្មីនិងការវាយប្រហារថ្មី»។
លោក Stoltenberg បានបញ្ជាក់ថា ក្ដីរំពឹងដែលចង់ឱ្យសម្ព័ន្ធមិត្តផ្ដល់យន្តហោះចម្បាំងដល់អ៊ុយក្រែន «គឺមិនមែនជាបញ្ហាបន្ទាន់បំផុតនៅពេលឥឡូវនេះទេ ប៉ុន្តែជាការពិភាក្សាកំពុងបន្ត»។
លោកក៏បានលើកឡើងផងដែរថា ការពិភាក្សាអំពីជំនួយយោធាគឺមិនត្រឹមតែអំពីការផ្ដល់ដល់អ៊ុយក្រែននូវប្រព័ន្ធដែលអ៊ុយក្រែនមិនទាន់មានប៉ុណ្ណោះទេ ប៉ុន្តែថែមទាំងអំពីការធានាថា ប្រព័ន្ធដែលអ៊ុយក្រែនមានរួចហើយគឺមានដំណើរការល្អ។
នៅពេលចាប់ផ្ដើមកិច្ចប្រជុំនៅថ្ងៃអង្គារនេះរបស់ក្រុមទំនាក់ទំនងផ្នែកការពារអ៊ុយក្រែនដែលដឹកនាំដោយសហរដ្ឋអាមេរិក រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយថា អ៊ុយក្រែនមាន «តម្រូវការបន្ទាន់ដើម្បីជួយឱ្យប្រទេសនេះឆ្លងផុតដំណាក់កាលដ៏សំខាន់នេះនៅក្នុងរយៈពេលនៃសង្គ្រាម» និងបានអំពាវនាវឱ្យក្រុមទំនាក់ទំនងនេះបង្កើនការផ្ដោតរបស់ខ្លួនលើរឿងនេះ៕
ប្រមុខអង្គការអូតង់ថា អ៊ុយក្រែនត្រូវការគ្រាប់រំសេវបន្ថែមនៅចំពេលនៃ«សង្គ្រាមពង្រេចពង្រឹល»
