ប្រទេសស៊ុយអែតនិងហ្វាំងឡង់បានតាំងចិត្តថា នឹងធ្វើការជាមួយប្រទេសតួកគីដើម្បីដោះស្រាយពីក្តីបារម្ភរបស់តួកគីមុនពេលពួកគេក្លាយជាសមាជិករបស់អង្គការអូតង់។ នេះបើតាមការឱ្យដឹងរបស់ប្រធានអង្គការអូតង់លោក Jens Stoltenberg កាលពីថ្ងៃព្រហស្បតិ៍ដោយលោកបន្ថែមថានេះជាពេលវេលាដែលត្រូវស្វាគមន៍ប្រទេសទាំងពីរនេះចូលទៅក្នុងសម្ព័ន្ធភាពអង្គការអូតង់ហើយ។ នេះបើយោងទៅលើការចេញផ្សាយរបស់ទីភ្នាក់ងារព័ត៌មាន AFP។
រដ្ឋាភិបាលតួកគីក្នុងពេលកន្លងមកបានចោទប្រកាន់ប្រទេសហ្វាំងឡង់និងស៊ុយអែត ថាបានផ្តល់ជម្រកសុវត្ថិភាពដល់ក្រុមសកម្មប្រយុទ្ធKurdsខុសច្បាប់ដែលខ្លួនចាត់ទុកថាជាក្រុមភេរវកម្ម។
លោក Stoltenberg បានថ្លែងក្នុងសន្និសីទសារព័ត៌មានរួមមួយជាមួយរដ្ឋមន្ត្រីការបរទេសតួកគីលោក Mevlut Cavusoglu ក្នុងទីក្រុង Istanbul (អ៊ីស្តង់ប៊ុល)នៃប្រទេសតួកគីថា«ខ្ញុំយល់ពីក្តីបារម្ភរបស់តួកគី»។
លោកនិយាយថា ហ្វាំឡង់និងស៊ុយអែតមានបំណងធ្វើការយ៉ាងជិតស្និទ្ធជាមួយតួកគី ក្នុងការប្រយុទ្ធប្រឆាំងនឹង«អំពើភេរវកម្ម»ហើយវា«ក៏ជាផលប្រយោជន៍របស់ប្រទេសទាំងពីរនេះផងដែរ»។
លោកបន្ថែមថា៖ «នេះជាពេលវេលាដែលត្រូវស្វាគមន៍ប្រទេសទាំង២នេះចូលជាសមាជិកពេញលេញរបស់អង្គការអូតង់ហើយ។ ការចូលរួមរបស់គេក្នុងសម្ព័ន្ធភាពនេះ នឹងធ្វើឱ្យអង្គការនេះកាន់តែរឹងមាំជាងមុនហើយប្រជាពលរដ្ឋក៏កាន់តែមានសុវត្ថិភាពជាងមុនផងដែរ»។
ប្រទេសទាំងពីរនេះបានងាកចេញគោលនយោបាយមិនចូលបក្សសម្ព័ន្ធយោធាដែលខ្លួនប្រកាន់យកអស់រយៈពេលជាច្រើនទសវត្សមកមកហើយ ហើយចង់ក្លាយជាសមាជិកអង្គការអូតង់ជាបន្ទាន់កាលពីខែឧសភាកន្លងទៅបន្ទាប់ពីរុស្ស៊ីចូលឈ្លានពានប្រទេសអ៊ុយក្រែនមក។
ប៉ុន្តែប្រធានាធិបតីតួកគីលោក Recep Tayyip Erdogan បានគំរាមថានឹងរាំងខ្ទប់ការចូលជាសមាជិកភាពអង្គការអូតង់របស់ប្រទេសទាំង២នេះដោយចង់ឱ្យមានការធ្វើសម្បទានមួយចំនួនពីប្រទេសទាំង២នេះជាមុនសិន។
មកដល់ពេលនេះ រដ្ឋជាសមាជិករបស់អង្គការអូតង់ទាំង៣០ប្រទេសបានផ្តល់សច្ចាប័នយល់ព្រមលើការទទួលយកប្រទេសហ្វាំងឡង់និងប្រទេសស៊ុយអែតឱ្យចូលជាសមាជិករបស់អង្គការនេះរួចហើយ លើកលែងតែប្រទេសតួកគីនិងប្រទេសហុងគ្រីតែប៉ុណ្ណោះ។
ការចូលជាសមាជិកថ្មីរបស់អង្គការអូតង់នេះ តម្រូវឱ្យមានការយល់ព្រមជាឯកច្ឆន្ទពីបណ្តារដ្ឋជាសមាជិកទាំងអស់៕
ប្រធានអង្គការអូតង់ថា នេះជាពេលវេលាដែលត្រូវស្វាគមន៍ហ្វាំងឡង់និងស៊ុយអែតឱ្យចូលទៅក្នុងអង្គការនេះហើយ
ទីក្រុង Istanbul ប្រទេសតួកគី —
