សេតវិមានប្រធានាធិបតីអាមេរិកបានបញ្ជាក់កាលពីថ្ងៃពុធថា ប្រទេសកូរ៉េខាងជើងកំពុងផ្គត់ផ្គង់ដោយសម្ងាត់នូវកាំភ្លើងធំដល់ប្រទេសរុស្ស៊ីសម្រាប់ការធ្វើសង្គ្រាមរបស់រុស្ស៊ីនៅក្នុងប្រទេសអ៊ុយក្រែន។
អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិកលោក John Kirby បានប្រាប់អ្នកកាសែតថា៖ «ព័ត៌មានរបស់យើងបានបង្ហាញថា ប្រទេសកូរ៉េខាងជើងកំពុងផ្គត់ផ្គង់ដោយសម្ងាត់នូវគ្រាប់ផ្លោងកាំភ្លើងធំក្នុងចំនួនមួយច្រើនគួរសមដល់ការធ្វើសង្គ្រាមរបស់រុស្ស៊ីនៅក្នុងប្រទេសអ៊ុយក្រែន»។
លោក Kirby បានបន្ថែមថា គ្រាប់ផ្លោងកាំភ្លើងធំដែលកូរ៉េខាងជើងកំពុងបញ្ជូនទៅឱ្យប្រទេសរុស្ស៊ីនឹង «មិនធ្វើឱ្យប្រែប្រួលដល់ដំណើរនៃសង្គ្រាមនេះនោះទេ» ហើយការគាំទ្រផ្នែកសន្តិសុខរបស់សហរដ្ឋអាមេរិកដល់អ៊ុយក្រែននឹងបន្តទៅមុខទៀតហើយនឹងសម្របតាមការប្រឈមថ្មីៗ។
លោក Kirby បានបញ្ជាក់បន្តទៀតថា ប្រទេសរុស្ស៊ីក៏បានទិញសព្វាវុធពីប្រទេសអ៊ីរ៉ង់ផងដែរ ដែលនេះគឺជាការរំលោភលើសេចក្ដីសម្រេចរបស់អង្គការសហប្រជាជាតិ។ លោកបានបន្ថែមថា សហរដ្ឋអាមេរិកនឹងអំពាវនាវឱ្យអង្គការសហប្រជាជាតិធ្វើយ៉ាងណាឱ្យរុស្ស៊ីទទួលខុសត្រូវចំពោះរឿងនេះ។
កន្លងមក ប្រទេសកូរ៉េខាងជើងបានបដិសេធថាខ្លួនមិនបានបញ្ជូនសព្វាវុធឱ្យប្រទេសរុស្ស៊ីនោះទេ។
មន្ត្រីមួយរូបនៃក្រសួងការពារជាតិកូរ៉េខាងជើងបានបញ្ជាក់នៅក្នុងសេចក្ដីថ្លែងការណ៍មួយដែលផ្សាយដោយទីភ្នាក់ងារព័ត៌មាន KCNA របស់កូរ៉េខាងជើងកាលពីថ្ងៃទី ២១ ខែកញ្ញាថា៖ «យើងមិនដែលនាំចេញសព្វាវុធឬក៏គ្រាប់រំសេវណាមួយទៅកាន់ប្រទេសរុស្ស៊ីពីមុននោះទេ ហើយយើងក៏មិនមានគម្រោងធ្វើដូច្នេះនោះដែរ»៕
