លោកនាយករដ្ឋមន្ត្រី ហ៊ុន សែន បានចេញមុខសូមទោសជាសាធារណៈភ្លាមៗតាមទំព័រហ្វេសប៊ុករបស់លោក បន្ទាប់ពីការដាច់ចរន្តអគ្គិសនីអស់រយៈពេលជិតមួយម៉ោងស្ទើរទូទាំងប្រទេសកម្ពុជា កាលពីរាត្រីថ្ងៃព្រហស្បតិ៍ម្សិលមិញនេះ។
នៅក្នុងការថ្លែងសូមទោសរបស់លោក លោកនាយករដ្ឋមន្ត្រីដ៏មានឥទ្ធិពលបានថ្លែងថា ការដាច់ចរន្តអគ្គិសនីនេះមិនជាប់ពាក់ព័ន្ធនឹងការប៉ុនប៉ងធ្វើសកម្មភាពភេរវកម្មណាមួយនោះទេ តែវាបណ្តាលមកពីបញ្ហាបច្ចេកទេសនៃការបញ្ជូនអគ្គិសនីពីប្រទេសវៀតណាម។
«ខ្ញុំព្រះករុណាខ្ញុំ សូមអភ័យទោស និងសូមបញ្ជាក់ជូនប្រជាពលរដ្ឋថា ការដាច់ចរន្តអគ្គិសនីនេះមិនមែនជាសញ្ញានៃវាយប្រហារភេរវកម្ម ឬឧប្បត្តិហេតុណាផ្សេង ក្រៅពីការដាច់ចរន្តនោះទេ។ យោងទៅលើការឲ្យដឹងពីក្រុមហ៊ុនអគ្គិសនី ដែលមានអគ្គនាយកនៃក្រុមហ៊ុនអគ្គិសនីនៅទីនេះស្រាប់ ការចាប់ផ្តើមដាច់ គឺចាប់ផ្តើមដាច់នៅក្នុងប្រទេសវៀតណាម ដែលយើងបានទិញភ្លើងពីប្រទេសវៀតណាម ក្នុងកម្រិតនៅក្នុងកុងត្រា២០០មេហ្គាវ៉ាត់»។
ការដាច់ភ្លើងនៅឧទ្យានអង្គរ៖
អ្នកកាសែតចាប់អារម្មណ៍ភ្លាមៗអំពីការថ្លែងរបស់លោក ហ៊ុន សែន៖
ភ្លាមៗបន្ទាប់ពីការពន្យល់របស់លោកនាយករដ្ឋមន្ត្រី ហ៊ុន សែន ដែលស្ថិតក្នុងអំណាចជាងបីទសវត្សរ៍មកនេះ លោក កែវ រតនៈ អគ្គនាយកអគ្គិសនីកម្ពុជា បានប្រើប្រាស់បណ្តាញសង្គមហ្វេសប៊ុកដើម្បីធ្វើការសុំអភ័យទោសពីសាធារណជន ហើយលោកក៏បានពន្យល់បន្ថែមអំពីការដាច់ចរន្តអគ្គិសនីនេះផងដែរ។
«មូលហេតុដាច់ភ្លើងដូចនេះ គឺបណ្តាលមកពីការដាច់ភ្លើងនៅក្នុងទឹកដីប្រទេសវៀតណាម គឺពីអនុស្ថានីយខេត្ត នៅក្នុងតំបន់ផូកណូត ដែលផ្គត់ផ្គង់តំបន់ចូដុក ហើយខ្សែតុងស្យុងខ្ពស់២៣០គីឡូវ៉ូល ដែលជាចំណែកមួយសំខាន់របស់បណ្តាញជាតិរបស់យើង ភ្ជាប់ទៅនឹងតំបន់ចូដុកនោះ ដែលនៅក្នុងពេលយប់មិញនេះ យើងកំពុងតែយកភ្លើងជិត១៥០មេហ្គាវ៉ាត់ពីប្រភពពីវៀតណាមដើម្បីផ្គត់ផ្គង់បន្ថែម ផ្គុំជាមួយប្រភពក្នុងស្រុក ក្នុងចន្លោះ៥០០មេហ្គាវ៉ាត់ជាង ដើម្បីផ្គត់ផ្គង់ទូទាំងប្រទេស»។
លោកថ្លែងថា ការដាច់ចរន្តអគ្គិសនីនេះគឺស្រដៀងគ្នាទៅនឹងការដាច់ចរន្តអគ្គិសនីនៅក្នុងទឹកដីសហរដ្ឋអាមេរិក និងប្រទេសកាណាដា ដែលបានកើតឡើងនៅឆ្នាំ២០០៣។ ក្នុងពេលនោះ ប្រទេសកាណាដា គឺជាអ្នកផ្គត់ផ្គង់អគ្គិសនីបន្ថែមដល់សហរដ្ឋអាមេរិក។ លោកថា ការដាច់ភ្លើងនៅកាណាដា បានធ្វើឲ្យដាច់ចរន្តអគ្គិសនីជាង១០លានផ្ទះនៅក្នុងទឹកដីកាណាដា និងប៉ះពាល់ដល់ផ្ទះចំនួន៤៥លានផ្ទះនៅស.រ.អា.។
ទស្សនាវីដេអូទាំងស្រុងនៃការថ្លែងរបស់លោក ហ៊ុន សែន៖
ប្រទេសកម្ពុជា ដែលជាប្រទេសកំពុងអភិវឌ្ឍន៍ បានពឹងផ្អែកខ្លាំងទៅលើការផ្គត់ផ្គង់អគ្គិសនីពីប្រទេសក្បែរខាង។ ដោយសារកង្វះនៃការផ្គត់ផ្គង់អគ្គិសនីក្នុងស្រុកនេះ រដ្ឋាភិបាលកម្ពុជាបានអនុញ្ញាតឲ្យមានការសាងសង់ទំនប់វារីអគ្គិសនី និងរោងចក្រផលិតអគ្គិសនីដើរដោយធ្យូងថ្មនៅតាមខេត្តនានាក្នុងប្រទេសកម្ពុជា រួមមានខេត្តកំពត កោះកុង ស្ទឹងត្រែង ហើយនិងខេត្តព្រះសីហនុ។
ទោះជាមានការសុំទោសពីលោកនាយករដ្ឋមន្ត្រី និងអគ្គនាយកអគ្គិសនីកម្ពុជាក៏ដោយ អ្នកសកម្មក្នុងការប្រើប្រាស់បណ្តាញសង្គមហ្វេសប៊ុកបានរិះគន់យ៉ាងខ្លាំងចំពោះការលើកឡើងអំពីការដាច់ខ្សែតុងត្យុងនៅក្នុងប្រទេសវៀតណាម។ ពួកគេបានលើកជាសំណួរជាច្រើនទាក់ទិនដំណើរនៃការកសាងទំនប់វារីអគ្គិសនីដែលបានធ្វើឡើងជាបន្តបន្ទាប់នៅក្នុងប្រទេសកម្ពុជា។
លោកសន ជ័យ តំណាងសម្ព័ន្ធគណនេយ្យភាពសង្គមអាស៊ីបូព៌ានិងប៉ាស៊ីហ្វិក ប្រចាំនៅកម្ពុជា មានប្រសាសន៍ប្រាប់ VOA អំពីក្តីមន្ទិលលើការពឹងផ្អែកខ្លាំងរបស់កម្ពុជាទៅលើការផ្គត់ផ្គង់ភ្លើងពីប្រទេសវៀតណាម ដោយសារតែរដ្ឋាភិបាលបានកសាងទំនប់វារីអគ្គិសនីជាច្រើនកន្លែងកាលពីកន្លងមក។ លោកថា ការដាច់ចរន្តអគ្គិសនីស្ទើរទូទាំងប្រទេសកាលពីយប់ព្រហស្បតិ៍ គឺជារឿងមួយគួរឲ្យភ្ញាក់ផ្អើល ហើយលោកបានជំរុញឲ្យរដ្ឋាភិបាលបង្ហាញពីតម្លាភាពក្នុងការអភិវឌ្ឍវិស័យថាមពល ដែលជាកត្តាដ៏សំខាន់ក្នុងការទ្រទ្រង់កំណើនសេដ្ឋកិច្ច។
«ការអភិវឌ្ឍមួយ ជាពិសេសវារីអគ្គិសនីនេះ វាចាំបាច់ណាស់ត្រូវមានតម្លាភាព។ តម្លាភាពគឺរដ្ឋាភិបាលត្រូវតែបង្ហាញឲ្យសាធារណជនដឹងអំពីសូចនាកររបស់ខ្លួន។ សូចនាករមួយដែលនិយាយអំពីអ្វីដែលបានវិនិយោគទៅ ហើយនឹងដែលផ្តល់ការវិនិយោគដល់ក្រុមហ៊ុនឯកជន ហើយអ្វីដែលជាលទ្ធផលបានមក។ តើវាមានបានឈានទៅដល់សូចនាករមួយណាទេ អញ្ចឹងហើយ ពេលនោះវានឹងមានការពិនិត្យមើល ឬក៏ការផ្តល់យោបល់បន្ថែមថា តើយើងត្រូវបំពេញ អ្វីដែលជាចំណុចដែលខ្វះខាត។ ប៉ុន្តែកន្លងមក យើងហាក់ដូចជាបានឮតិចតួច។ យើងដឹងតែពីគម្រោងវិនិយោគវារីអគ្គិសនីរបស់ក្រុមហ៊ុនចិន។ ក៏ប៉ុន្តែលទ្ធផលដែលបានមក គឺស្ថិតនៅក្នុងការមន្ទិល។ ការមន្ទិលហ្នឹងហើយដែលធ្វើឲ្យយើងសង្ស័យទៅលើផលប៉ះពាល់ ជាជាងលទ្ធផលនៃការវិនិយោគវិស័យវារីអគ្គិសនីហ្នឹង»។
លោកមានប្រសាសន៍បន្ថែមថា រដ្ឋាភិបាលកម្ពុជាត្រូវបញ្ជាក់ឲ្យច្បាស់ប្រាប់ប្រជាពលរដ្ឋខ្មែរនូវទំហំតម្រូវការថាមពលដែលបានពីវារីអគ្គិសនី និងការផ្គត់ផ្គង់ពីប្រទេសក្បែរខាង ដើម្បីបញ្ចៀសនូវវិបត្តិដែលបានកើតឡើងនៅថ្ងៃព្រហស្បតិ៍ម្សិលមិញនេះ។
ប្រទេសកម្ពុជាត្រូវគេមើលឃើញថា បានកសាងទំនប់វារីអគ្គិសនីជាច្រើនកន្លែងដើម្បីទាញយកថាមពលសម្រាប់បម្រើដល់ការរស់នៅរបស់ប្រជាពលរដ្ឋខ្មែរប្រចាំថ្ងៃ និងការធ្វើអាជីវកម្មតូចធំនៅក្នុងប្រទេស។ អ្នកតាមដានការអភិវឌ្ឍនៅក្នុងប្រទេសនេះនិយាយថា ការដាច់ចរន្តអគ្គិសនីពាសពេញផ្ទៃប្រទេសកាលពីរាត្រីថ្ងៃព្រហស្បតិ៍កន្លងទៅ គឺជាមេរៀនមួយដែលរដ្ឋាភិបាលត្រូវប្រុងប្រយ័ត្ន ព្រោះវាអាចបង្កឲ្យមានអសន្តិសុខសង្គម ហើយថា រដ្ឋាភិបាលត្រូវរៀបចំប្រព័ន្ធផ្គត់ផ្គង់អគ្គិសនីបម្រុងមួយ ដោយមិនត្រូវពឹងផ្អែកតែលើប្រភពផ្គត់ផ្គង់អគ្គិសនីតែមួយពីវៀតណាមនោះឡើយ៕
