អគារទំនើបមានហាងលក់ទំនិញឈ្មោះ Westgate បានបើកជាថ្មីកាលពីថ្ងៃសៅរ៍ ទី១៨ ខែកក្កដា ជិតពីរឆ្នាំក្រោយពីក្រុមជនប្រដាប់អាវុធ អាល់សាបាប់ (al-Shabab) បានវាយប្រហារមជ្ឈមណ្ឌលនេះដែលបាននាំឱ្យមានការឡោមព័ទ្ធបីថ្ងៃ។
នៅក្រោយការជួសជុលជាច្រើនខែមក ចំនួនពាក់កណ្តាលនៃអ្នកជួលហាងលក់ទំនិញក្នុងអគារនោះកាលពីពេលដំបូង បានប្រុងប្រៀបនឹងធ្វើជំនួញជាថ្មីទៀត។ អ្នកទិញទំនិញបានទៅកាន់អគារ Westgate ដែលជាផ្សារទំនើបកម្រិតខ្ពស់ដោយសារភាពឆើតឆាយរបស់ផ្សារទំនើបនេះ និងទំនិញដែលគេអាចទិញបានដោយស្រួលនៅទីនោះ។
កាលពីថ្ងៃទី២១ ខែកញ្ញា ឆ្នាំ២០១៣ ក្រុមជនប្រដាប់អាវុធ អាល់សាបាប់ (al-Shabab) បានវាយប្រហារក្នុងអគារមានហាងលក់ទំនិញច្រើននេះដោយធ្វើឱ្យកងកម្លាំងសន្តិសុខស្រឡាំងកាំង បណ្តាលឱ្យមនុស្ស៦៧ស្លាប់ និងធ្វើឱ្យមនុស្សរាប់រយនាក់ទៀតត្រូវរបួស។
ចាប់តាំងពីការវាយលុកនៅ Westgate មក ពួកអាល់សាបាប់ (al-Shabab) បានបើកធ្វើការវាយប្រហារឯទៀតៗនៅទូទាំងប្រទេសកេនយ៉ា។ នៅថ្ងៃនោះ អ្នកទិញទំនិញ និងអ្នកជំនួញហាក់ដូចជាបំភ្លេចចោលអតីតកាលដ៏ខ្មៅងងឹតនេះហើយ។ មនុស្សវ័យក្មេង និងមនុស្សចាស់ៗបានទៅមើលដោយផ្ទាល់នូវការរស់ឡើងវិញនៃមជ្ឈមណ្ឌលនេះ។ មានការបង្កើនកិច្ចការពារសន្តិសុខ ហើយគ្មានអ្វីបន្សល់ទុកជាការប្រថុយប្រថានទេ។
ថ្លែងទៅកាន់ក្រុមអ្នកកាសែត លោក Evans Kidero អភិបាលក្រុងណៃរ៉ូប៊ី (Nairobi) មានការរំភើបចិត្តខ្លាំងអំពីអនាគត។
«យើងមកវិញហើយ។ ខ្ញុំដឹងថា នឹងមានការថប់ក្នុងចិត្ត ក៏ប៉ុន្តែក្នុងឋានៈជាប្រទេសមួយ យើងមានសុវត្ថិភាពជាងពេលមុន»។
លោក Fred Ogundo បានរួចជីវិតពីការវាយប្រហារនៅ Westgate។ លោកបានរត់គេចខ្លួនរួចពីអគារមានហាងលក់ទំនិញនេះ នៅពេលដែលសហសេវិកលោកបីនាក់បានស្លាប់។
ជាមួយការបើកអគារនេះជាថ្មីឡើងវិញ លោក Ogundo ឃើញមានឱកាសច្រើនជាងមុន។
«សូមរំឭកថា កន្លែងនេះជាកន្លែងដែលយើងធ្លាប់ធ្វើការ ហើយនៅពេលវាបានបិទទ្វារ វាដូចជាមិនមានម្ហូបអាហារនៅលើតុយើងអញ្ចឹងដែរ។ ដូច្នេះ ការបើកហាងឡើងវិញនេះនាំឲ្យយើងសប្បាយរីករាយណាស់»។
ប្រទេសកេនយ៉ាមានការប្រុងប្រយ័ត្នខ្លាំងនៅពេលខួបពីរឆ្នាំនៃការវាយប្រហារនោះជិតមកដល់។
ក្រសួងការបរទេសស.រ.អា.ក៏បានចេញផ្សាយការណែនាំខាងការធ្វើដំណើរមួយដែលបានព្រមានអំពីការគំរាមកំហែងខ្លាំងមួយនៅក្នុងក្រុងណៃរ៉ូប៊ី នៅមុនសន្និសីទកំពូលនៃភាពជាសហគ្រិនដែលគេរំពឹងថា លោកប្រធានាធិបតី បារ៉ាក់អូបាម៉ា នឹងអញ្ជើញទៅចូលរួមនៅពេលបន្ទាប់មកទៀតក្នុងខែនេះ៕
ប្រែសម្រួលដោយ ឈឹម សុមេធ
