ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទីក្រុង Nagasaki ប្រទេស​ជប៉ុន ប្រារព្ធ​ខួប​ទី ៧៥ នៃ​ហេតុការណ៍​ទម្លាក់​គ្រាប់បែក​បរមាណូ​របស់​សហរដ្ឋ​អាមេរិក


សត្វព្រាប​ហើរ​លើ​រូប​សំណាក​សន្ដិភាព​នៅ​ឧទ្យាន​សន្តិភាព​ក្នុង​ទីក្រុង Nagasaki ប្រទេស​ជប៉ុន ក្នុង​អំឡុងពេល​នៃ​ពិធី​មួយ​ដើម្បី​ប្រារព្ធ​ខួប​ទី ៧៥ នៃ​ការ​ទម្លាក់​គ្រាប់បែក​បរមាណូ​ដោយ​សហរដ្ឋអាមេរិក​លើ​ទីក្រុង​នេះ ថ្ងៃទី ៩ ខែសីហា ឆ្នាំ​២០២០។

នៅ​ថ្ងៃ​អាទិត្យ​នេះ ទីក្រុង Nagasaki ប្រទេស​ជប៉ុន បាន​ប្រារព្ធ​ខួប​ទី ៧៥ នៃ​ហេតុការណ៍​ទម្លាក់​គ្រាប់បែក​បរមាណូ​របស់​សហរដ្ឋ​អាមេរិក​លើ​ទីក្រុង​នេះ ដោយ​រៀបចំ​ពិធី​មួយ​នៅ​ឯ​រូបសំណាក​សន្តិភាព​ដ៏​ធំ​មួយ។

អភិបាល​ក្រុង និង​អ្នក​រស់រាន​មាន​ជីវិត​ពី​ការ​ទម្លាក់​គ្រាប់បែក​នេះ ដែល​បាន​ចូលរួម​នៅ​ក្នុង​ពិធី​នេះ បាន​ជំរុញ​មេដឹកនាំ​នានា​នៅ​លើ​ពិភពលោក​ឲ្យ​ធ្វើការ​លើ​ការ​ហាមឃាត់​អាវុធ​នុយក្លេអ៊ែរ។

នៅ​ម៉ោង ១១ និង ២ នាទី​ព្រឹក ម៉ោង​នៅ​ក្នុង​ទីក្រុង Nagasaki អ្នក​រស់រាន​មាន​ជីវិត និង​អ្នក​ចូលរួម​ផ្សេង​ទៀត​បាន​ឈរ​ស្មឹងស្មាធ​រយៈពេល​មួយ​នាទី ដើម្បី​គោរព​ដល់​មនុស្ស​ជាង ៧ ម៉ឺន​នាក់ ដែល​បាន​ស្លាប់ នៅ​ពេល​ដែល​យន្តហោះ​ទម្លាក់​គ្រាប់បែក B-29 ឈ្មោះ Bockscar បាន​ទម្លាក់​គ្រាប់បែក​ធ្វើ​ពី​សារធាតុ​ភ្លុយតូនីញ៉ូម ២៣៩ ទម្ងន់ ៤ តោន​កន្លះ លើ​ទីក្រុង Nagasaki នេះ។

នាយករដ្ឋមន្ត្រី​ជប៉ុន​លោក Shinzo Abe បាន​ដាក់​កម្រង​ផ្កា​នៅ​ឯ​ពិធី​រំឭក​វិញ្ញាណក្ខន្ធ​នេះ ដើម្បី​ចងចាំ​ជន​រងគ្រោះ ហើយ​លោក​បាន​ថ្លែង​សុន្ទរកថា​ដោយ​មិន​បាន​និយាយ​យោង​ដោយ​ផ្ទាល់​លើ​សន្ធិសញ្ញា​នៃ​ការ​ហាមឃាត់​អាវុធ​នុយក្លេអ៊ែរ ដែល​អ្នក​រស់រាន​មាន​ជីវិត និង​អ្នក​ចូលរួម​ដទៃ​ទៀត​នៅ​ក្នុង​ពិធី​នេះ​ស្នើ​ឲ្យ​មេដឹកនាំ​នានា​នៅ​លើ​ពិភពលោក​ចុះ​ហត្ថលេខា​នោះ។

លោក Shinzo Abe ថ្លែង​ដូច្នេះ​ថា៖ «សោកនាដកម្ម​នៅ​ក្នុង​ទីក្រុង Nagasaki និង​ទីក្រុង Hiroshima និង​ការ​ឈឺចាប់​ដែល​រងគ្រោះ​ដោយ​ប្រជាពលរដ្ឋ​នៃ​ទីក្រុង​ទាំង​ពីរ​នេះ មិន​ត្រូវ​កើត​មាន​ម្ដង​ទៀត​ជា​ដាច់ខាត។ ក្នុង​នាម​ជា​ប្រទេស​តែ​មួយ​គត់​ដែល​រង​ការ​ទម្លាក់​គ្រាប់បែក​បរមាណូ​ក្នុង​សម័យ​សង្គ្រាម ប្រទេស​ជាតិ​របស់​យើង​នៅតែ​ប្រកាន់​ខ្ជាប់​នូវ​បេសកកម្ម​ជំរុញ​កិច្ច​ប្រឹងប្រែង​របស់​សហគមន៍​អន្តរជាតិ​ដោយ​ម៉ឺងម៉ាត់​មួយ​ជំហាន​ម្ដងៗ នៅ​ក្នុង​ការ​សម្រេច​ឲ្យ​បាន​នូវ​ពិភពលោក​មួយ​ដែល​គ្មាន​អាវុធ​នុយក្លេអ៊ែរ»។

ប្រទេស​ជប៉ុន​មិន​ទាន់​បាន​ចុះ​ហត្ថលេខា​លើ​សន្ធិសញ្ញា​នេះ​នៅ​ឡើយ​ទេ។ អ្នក​រស់រាន​មាន​ជីវិត​ជា​ច្រើន​បាន​កើត​ជំងឺ​មហារីក ឬ​ជំងឺ​ផ្សេង​ទៀត ដោយសារតែ​សារធាតុ​វិទ្យុសកម្ម​នៃ​គ្រាប់បែក​បរមាណូ​នោះ៕

តួលេខនៃករណីឆ្លងជំងឺកូវីដ១៩

XS
SM
MD
LG