ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

រដ្ឋាភិបាល​ស្រមោល​មីយ៉ាន់ម៉ា ទម្លាក់​ចោល​ការជំទាស់​នឹង​​រឿងក្តី​ប្រល័យ​ពូជសាសន៍​លើ​ជនជាតិ​រ៉ូហ៊ីងយ៉ា​នៅ​តុលាការ​ព្រហ្មទណ្ឌ​អន្តរជាតិ


រូបឯកសារ៖ ប៉ូលិស​ការពារ​ព្រំដែន​មីយ៉ាន់ម៉ា​ម្នាក់ ឈរ​ក្បែរ​ក្រុម​ពលរដ្ឋ​រ៉ូហ៊ីងយ៉ា​កាន់សាសនា​អ៊ិស្លាម នៅ​មុខ​ផ្ទះ​របស់​ពួកគេ​ក្នុង​ភូមិ​មួយ​ដែល​ត្រូវ​បាន​គេ​ឃើញ​ក្នុង​ដំណើរ​ទស្សនកិច្ច​ដែល​រៀបចំ​ដោយ​រដ្ឋាភិបាល​សម្រាប់​អ្នកកាសែត​នៅក្នុង​រដ្ឋ Rakhine កាលពី​ថ្ងៃទី២៥ ខែមករា ឆ្នាំ២០១៩។

រដ្ឋាភិបាល​ស្រមោល​មីយ៉ាន់ម៉ា ដែល​ត្រូវបានបង្កើត​ឡើង​ ​បន្ទាប់​ពី​រដ្ឋប្រហារ​យោធា​កាលពី​ឆ្នាំ​ទៅ បាន​និយាយ​ថា ខ្លួន​សុខចិត្ត​ទទួល​យក​យុត្តាធិការ​របស់​តុលាការ​ព្រហ្មទណ្ឌអន្តរជាតិ (ICJ) ដើម្បី​ស្តាប់​ការចោទប្រកាន់​ថា ប្រទេស​មីយ៉ាន់ម៉ា​ បាន​ប្រព្រឹត្ត​អំពើ​ប្រល័យ​ពូជសាសន៍​ប្រឆាំង​នឹង​ជនជាតិ​ភាគ​តិច​រ៉ូហ៊ីងយ៉ា (Rohingya)។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។

មុនពេល​ពួក​យោធា​ដណ្តើម​យក​អំណាច​កាលពី​ឆ្នាំ​ទៅ រដ្ឋាភិបាល​មីយ៉ាន់ម៉ា​ដែល​ដឹកនាំ​ដោយ​លោក​ស្រី Aung San Suu Kyi ដែល​ត្រូវ​បាន​បណ្តេញ​ចេញ​ពី​អំណាច​នៅ​ពេល​ឥឡូវ​នេះ បាន​ដាក់​បណ្ដឹង​ជំទាស់​បឋម​នៅ​តុលាការ​ព្រហ្មទណ្ឌអន្តរជាតិ (ICJ) អំពី​រឿងក្តី​ដែល​បានប្តឹង​ដោយ​ប្រទេស​ហ្គំប៊ី​នៅ​ក្នុង​ចំណាត់ការ​មួយ​ដែល​ត្រូវ​បាន​គេ​មើលឃើញ​ថា ទំនង​ជា​នឹងអូសបន្លាយ​ដំណើរការ​កាត់ក្តី​នោះ។

រដ្ឋាភិបាល​ឯកភាព​ជាតិ (NUG) ដែល​រួមមាន​សមាជិក​សភា​មីយ៉ានម៉ា ​ដែល​ត្រូវ​បាន​គេ​ទម្លាក់​ចេញ​ពី​តំណែង​និង​រស់នៅ​និរទេស​ខ្លួន បាន​និយាយ​នៅ​ក្នុង​សេចក្តីថ្លែងការណ៍​ដែល​បាន​ចេញ​ផ្សាយ​កាលពី​ថ្ងៃ​អង្គារ​ថា ខ្លួន​បាន​ដក​ការជំទាស់​ប្រឆាំង​បឋម​ទាំង​អស់ដល់​រឿងក្តី​នេះ។

ទោះ​ជាយ៉ាង​នោះ​ក៏ដោយ គេ​មិន​ទាន់​ដឹង​ច្បាស់​នៅឡើយ​ថា​ តើការណ៍​នេះ​ នឹង​ប៉ះពាល់ដល់​ដំណើរការ​ផ្លូវ​ច្បាប់​ដែរ​ឬ​ទេ ដោយសារ​តែ​រដ្ឋាភិបាល​ឯកភាព​ជាតិ (NUG) បាន​និយាយ​ថា តុលាការ​ព្រហ្មទណ្ឌ​អន្តរជាតិ បាន​ទាក់ទង​ជាមួយ​ពួក​អ្នក​ការទូត​មីយ៉ាន់ម៉ា​ដែល​ស្ថិត​នៅ​ក្រោម​ការត្រួតត្រា​របស់​ពួក​យោធា។

តុលាការ​ព្រហ្មទណ្ឌអន្តរជាតិ (ICJ) មិន​បាន​ឆ្លើយតប​ភ្លាមៗ​ដល់​សំណើ​សុំ​ធ្វើ​អត្ថាធិប្បាយ​ ហើយ​អ្នក​នាំពាក្យ​របស់​ពួក​យោធា​មីយ៉ាន់ម៉ា មិន​ឆ្លើយ​ការហៅ​ទូរស័ព្ទ​ដែល​ស្វះស្វែង​សុំ​ធ្វើ​អត្ថាធិប្បាយ​នោះ​ទេ។

ជនជាតិ​ភាគ​តិច​រ៉ូហ៊ីងយ៉ា​កាន់​សាសនា​អ៊ីស្លាម​ជាង៧សែន ​៣ម៉ឺន​នាក់ បាន​រត់គេចខ្លួន ​ពី​រដ្ឋ Rakhine នៃ​ប្រទេស​មីយ៉ាន់ម៉ា​នៅ​ឆ្នាំ២០១៧ បន្ទាប់​ពី​ការបង្ក្រាប​ខាង​យោធា៕

XS
SM
MD
LG