ប្រទេសភូមាបានផ្អាកគម្រោងសាកល្បងមួយក្នុងការពិនិត្យមើលដើម្បីផ្តល់សញ្ជាតិដល់ពលរដ្ឋជនជាតិភាគតិចកាន់សាសនាអ៊ីស្លាមក្នុងរដ្ឋ Rakhine ផ្នែកខាងលិច។
លោក Maung Maung Ohn អភិបាលរដ្ឋ Rakhine បានប្រាប់វីអូអេផ្សាយជាភាសាភូមាកាលពីថ្ងៃព្រហស្បត៍ថា ចាប់តាំងពីកម្មវិធីនោះបានចាប់ផ្តើមកាលពីឆ្នាំទៅមក អ្នកកាន់សាសនាអ៊ីស្លាមតែ៤០នាក់គត់បានត្រូវផ្តល់សញ្ជាតិហើយជាង២រយនាក់ទៀតបានត្រូវផ្តល់សញ្ជាតិបណ្តោះអាសន្ន ពីព្រោះពួកគេផ្តល់សញ្ជាតិឲ្យអ្នកដែលថាខ្លួនជាសញ្ជាតិ Bengali។
លោកនិយាយថា «ស្ថានភាពនៅក្នុងរដ្ឋ Rakhine មានភាពស្មុគស្មាញណាស់។ ដំណើរការផ្ទៀងផ្ទាត់មានការលំបាកពីព្រោះតែអ្នកដាក់ពាក្យសុំមានអត្តសញ្ញាណមួយដែលភូមាមិនទទួលស្គាល់»។
អ្នកកាន់សាសនាអ៊ីស្លាមភាគច្រើននៅក្នុងរដ្ឋនោះចាត់ទុកខ្លួនឯងថាជាជនជាតិ Rohingya ជាពាក្យដែលត្រូវបានច្រានចោលដោយរដ្ឋាភិបាលដែលយល់ថា Rohingya ជាជនចំណាកស្រុកខុសច្បាប់មកពីប្រទេសបង់ក្លាដែសហើយ បានចាត់ទុកពួកគេថាជាជនជាតិ Bengalis។ ក្រុមមន្រ្តីបាននិយាយថា ដំណើរការពិនិត្យផ្ទៀងផ្ទាត់នេះបានត្រូវធ្វើឡើងនៅក្រោមច្បាប់ឆ្នាំ១៩៨២ដែលហាមឃាត់ការចុះបញ្ជីឈ្មោះពលរដ្ឋដោយប្រើពាក្យ Rohingya៕
