ពួកយោធាមីយ៉ាន់ម៉ា បានទទួលបរាជ័យខាងការទូតនៅថ្ងៃព្រហស្បតិ៍នេះនៅពេលដែលសមាគមអាស៊ាន បានរារាំងអ្នកការទូតកំពូលរបស់ខ្លួនមិនឲ្យចូលរួមសន្និសីទរបស់រដ្ឋមន្ត្រីការបរទេសនៅពេលខាងមុខនេះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។
ប្រទេសកម្ពុជាដែលនៅពេលបច្ចុប្បន្ននេះ ធ្វើជាប្រធានផ្លាស់វេនរបស់សមាគមអាស៊ាន បាននិយាយថា មានការជឿនលឿនបន្តិចបន្តួចលើ «កិច្ចព្រមព្រៀងជាឯកច្ឆ័ន្ទ៥ចំណុច» ដែលបានព្រមព្រៀងគ្នាដោយពួកមេដឹកនាំអាស៊ានកាលពីឆ្នាំទៅដើម្បីព្យាយាមបន្ធូរបន្ថយវិបត្តិនៅក្នុងប្រទេសមីយ៉ាន់ម៉ា។
មីយ៉ាន់ម៉ាបានស្ថិតនៅក្នុងភាពចលាចល ចាប់តាំងពីពួកយោធា បានបណ្តេញរដ្ឋាភិបាលស៊ីវិលរបស់លោកស្រី Aung San Suu Kyi កាលពី១ឆ្នាំមុន ដោយមានជនស៊ីវិលជាង១.៥០០នាក់បានត្រូវសម្លាប់នៅក្នុងការបង្ក្រាបលើការតវ៉ាប្រឆាំងនឹងពួកយោធា។ នេះបើតាមក្រុមឃ្លាំមើលនៅក្នុងស្រុក។
អ្នកនាំពាក្យក្រសួងការបរទេសកម្ពុជាលោក ជុំ សុន្ទរី បានប្រាប់ទីភ្នាក់ងារព័ត៌មាន AFP ថា៖ «ដោយសារតែមានការជឿនលឿនបន្តិចបន្តួចនៅក្នុងការអនុវត្តកិច្ចព្រមព្រៀងជាឯកច្ឆ័ន្ទ៥ ចំណុចរបស់អាស៊ាន រដ្ឋទាំងអស់ដែលជាសមាជិករបស់អាស៊ាន មិនបានមូលមតិគ្នាដើម្បីអញ្ជើញរដ្ឋមន្ត្រីការបរទេសក្រុមប្រឹក្សារដ្ឋបាលរដ្ឋលោក Wunna Maung Lwin ឲ្យចូលរួមសន្និសីទរបស់រដ្ឋមន្ត្រីការបរទេសនៅពេលខាងមុខនេះទេ»។
រដ្ឋាភិបាលយោធាមីយ៉ាន់ម៉ា បានហៅខ្លួនឯងថា ក្រុមប្រឹក្សារដ្ឋបាលរដ្ឋឬ SAC។
លោកជុំ សុន្ទរី បាននិយាយទៀតថា៖ «យើងបានសុំឲ្យមីយ៉ាន់ម៉ាបញ្ជូនអ្នកតំណាងមិនមែននយោបាយមកជំនួសវិញ»។
ការហាមឃាត់នេះកើតមានឡើងបន្ទាប់ពីសមាគមអាស៊ាន បានចាត់វិធានការដែលមិនធ្លាប់មានកាលពីពេលមុនរារាំងមិនឲ្យមេដឹកនាំយោធាលោក Min Aung Hlaing ចូលរួមសន្និសីទកំពូលកាលពីខែតុលាឆ្នាំមុន។
មីយ៉ាន់ម៉ាបានឯកោកាន់តែខ្លាំងឡើងនៅលើឆាកអន្តរជាតិ ដោយមានដំណើរបំពេញទស្សនកិច្ចរបស់បុរសខ្លាំងនៃប្រទេសកម្ពុជាលោកហ៊ុន សែន ជាដំណើរទស្សនកិច្ចរបស់មេដឹកនាំបរទេសលើកទី១ មកកាន់មីយ៉ាន់ម៉ាចាប់តាំងពីពួកឧត្តមសេនីយ៍បានរឹបអូសអំណាចមក។
ក៏ប៉ុន្តែ អំពើហិង្សាបានបន្ត ដោយក្រុមប្រឆាំងពួកយោធា បានប៉ះទង្គិចជាប្រចាំជាមួយពួកយោធា ហើយធនាគារពិភពលោក បានព្រមានថា សេដ្ឋកិច្ចមីយ៉ាន់ម៉ាទំនងជាធ្លាក់ចុះ១ភាគ ៥ កាលពីឆ្នាំទៅ។
ក្នុងសេចក្តីថ្លែងការណ៍កាលពីថ្ងៃពុធម្សិលមិញ អាស៊ាន បានអំពាវនាវឲ្យបញ្ចប់អំពើហិង្សាជាបន្ទាន់ហើយនឹងអនុញ្ញាតឲ្យបេសកជនពិសេសរបស់ខ្លួនទៅបំពេញទស្សនកិច្ចប្រទេសនោះជាបន្ទាន់៕
ភ្នំពេញ —
