អ្នកសារព័ត៌មាន Reuters ពីរនាក់ ដែលត្រូវបានអាជ្ញាធរមីយ៉ាន់ម៉ាចាប់ដាក់ឃុំកាលពីឆ្នាំមុន ត្រូវបានកាត់ទោសថាបានរំលោភលើច្បាប់រក្សាការសម្ងាត់របស់ប្រទេសមីយ៉ាន់ម៉ា និងផ្ដន្ទាទោសឲ្យជាប់ពន្ធនាគារ ៧ ឆ្នាំ។
លោក Wa Lone និងលោក Kyaw Soe Oo ត្រូវបានចាប់ខ្លួនកាលពីខែធ្នូឆ្នាំមុន បន្ទាប់ពីអ្នកទាំងពីរបានជួបជាមួយនឹងមន្ត្រីប៉ូលិសមីយ៉ាន់ម៉ាពីរនាក់ក្នុងភោជនីយដ្ឋានមួយកន្លែងក្នុងទីក្រុងរ៉ង់ហ្គូន និងទទួលបានកញ្ចប់ឯកសារពីមន្ត្រីប៉ូលិសទាំងពីរនាក់នោះ។
អ្នកទាំងពីរត្រូវបានចោទប្រកាន់ថាបានរំលោភលើច្បាប់រក្សាការសម្ងាត់ផ្លូវការរបស់មីយ៉ាន់ម៉ា ដែលជាច្បាប់មួយអនុម័តដំបូងកាលពីឆ្នាំ ១៩២៣ នៅពេលដែលមីយ៉ាន់ម៉ា ដែលនៅពេលនោះហៅថាមីយ៉ាន់ម៉ាស្ថិតក្រោមអាណានិគមរបស់ចក្រភពអង់គ្លេស។ បុរសទាំងពីរបានបដិសេធថា ពួកគេមិនបានសុំឯកសារទាំងនោះពីប៉ូលិសនោះទេ។
មុនពេលចាប់ខ្លួននោះ បុរសទាំងពីរនាក់នេះបានយកព័ត៌មានអំពីយុទ្ធនាការឃោរឃៅរបស់យោធាមីយ៉ាន់ម៉ានៅក្នុងការបង្ក្រាបជាតិសាសន៍ Rohingya ក្នុងរដ្ឋ Rakhine។ ពួកគេផ្ដោតលើការរាយការណ៍អំពីករណីដែលប៉ូលិស និងទាហានមីយ៉ាន់ម៉ាសម្លាប់រង្គាលជាតិសាសន៍ Rohingya ១០ នាក់ នៅក្នុងភូមិ Inn Din។
និពន្ធនាយកទីភ្នាក់ងារព័ត៌មាន Reuters លោក Stephen J. Adler បានបដិសេធនូវការផ្ដន្ទាទោសនេះនៅក្នុងសេចក្ដីប្រកាសមួយ ដោយបានហៅការផ្ដន្ទាទោសនេះថាជា «ថ្ងៃដ៏ក្រៀមក្រំសម្រាប់ប្រទេសមីយ៉ាន់ម៉ា អ្នកកាសែតទាំងពីរនាក់ និងសារព័ត៌មាននៅគ្រប់កន្លែងទាំងអស់»។
លោក Adler បានបន្ថែមថា ការសម្រេចរបស់ចៅក្រមនេះគឺជា «ដំណើរត្រឡប់ថយក្រោយដ៏ខ្លាំងមួយនៃការផ្លាស់ប្ដូររបស់ប្រទេសមីយ៉ាន់ម៉ាទៅរកលទ្ធិប្រជាធិបតេយ្យ»៕
