ហ្វូងមនុស្សដ៏ធំមួយបានខិតខំព្យាយាមរាំងខ្ទប់ការដឹកជញ្ជូនជំនួយមនុស្សធម៌ទៅកាន់ពួកអ្នកកាន់សាសនាឥស្លាមដែលជាប់គាំងនៅក្នុងផ្នែកខាងលិចនៃប្រទេសមីយ៉ាន់ម៉ានៅមុនពេលពួកប៉ូលិសបានបណ្តេញពួកជនទាំងនេះកាលពីយប់ថ្ងៃពុធ។
ការិយាល័យព័ត៌មានរបស់រដ្ឋាភិបាលមីយ៉ាន់ម៉ាបាននិយាយថា ពួកបាតុករប្រមាណ៣០០នាក់បានប្រមូលផ្តុំគ្នានៅឯផែមួយនៅក្នុងក្រុង Sittwe ដែលជាទីរួមខេត្តនៃរដ្ឋ Rakhine មានប្រជារាស្ត្រភាគច្រើនជាអ្នកកាន់ព្រះពុទ្ធសាសនា
ដែលនៅទីនោះនាវាមួយគ្រឿងកំពុងប្រុងប្រៀបដឹកជញ្ជូនគ្រឿងផ្គត់ផ្គង់៥០តោនដែលមានរួមបញ្ចូលម្ហូបអាហារ ទឹក និងមុងពីគណៈកម្មធិការកាកបាទក្រហមអន្តរជាតិទៅឱ្យពួកជនអំបូររ៉ូហ៊ីងយ៉ាគោរពសាសនាឥស្លាមដែលជាប់គាំងនៅក្នុងផ្នែកខាងជើងនៃរដ្ឋនេះ។
ដោយមិនអើពើនឹងការអង្វរកររបស់ពួកព្រះសង្ឃដែលបានសុំឱ្យមានភាពស្ងប់ស្ងៀម ហ្វូងមនុស្សនេះបានចាប់ផ្តើមគប់ដុំថ្ម និងដបដុតសាំងទៅលើពួកប៉ូលិសដែលបានតបតវិញដោយបានបាញ់កាំភ្លើងព្រមានទៅក្នុងអាកាសដើម្បីបំបែកហ្វូងមនុស្សនេះ។ មនុស្ស៨នាក់បានត្រូវចាប់ឃុំឃាំង។
រដ្ឋ Rakhine មានបញ្ហាដោយសារអំពើហិង្សា និងទុក្ខវេទនាចាប់តាំងពីចុងខែសីហាមកនៅពេលដែលពួកជនសកម្មប្រយុទ្ធរ៉ូហ៊ីងយ៉ាបានវាយប្រហារប៉ុស្តិ៍ប៉ូលិស និងទាហានមួយចំនួន។ មនុស្សរាប់រយនាក់បានត្រូវសម្លាប់ហើយភូមិពួកជនអំបូររ៉ូហ៊ីងយ៉ាបានត្រូវដុតខ្ទេចខ្ទីនៅក្នុងកិច្ចប្រតិបត្តិការយោធាដែលបានបង្ខិតបង្ខំពួករ៉ូហ៊ីងយ៉ាជាង៤សែន២ម៉ឺននាក់ឱ្យរត់គេចខ្លួនទៅកាន់ប្រទេសបង់ក្លាដែស ដែលជាប្រទេសជិតខាង៕
