មីយ៉ាន់ម៉ាបានចាប់ផ្តើមបង្ក្រាបក្នុងប៉ុន្មានសប្តាហ៍ថ្មីៗនេះលើពួកអ្នករិះគន់យោធានិងរដ្ឋាភិបាលដោយការចាប់ខ្លួនពួកអ្នកសម្តែងសិល្បៈចំអក សកម្មជន អ្នកកាសែតម្នាក់និងអ្នកផលិតខ្សែភាពយន្តដែលមានជំងឺមហារីកថ្លើម។
ការកើនឡើងនៅក្នុងការចាប់ខ្លួន កើតមានឡើងនៅពេលដែលពួកមន្រ្តីសន្យាដោះលែងពួកអ្នកទោសនយោបាយ ដែលទាក់ទិននឹងនយោបាយនិងពលរដ្ឋដែលមានការទាក់ទិននឹងក្រុមឧទ្ទាមប្រដាប់អាវុធ បន្ទាប់ពីការលើកលែងទោសពួកអ្នកទោសដ៏ធំមួយ កាលពីខែមុន ដែលភាគច្រើនជាប់គុកដោយសារបញ្ហាថ្នាំញៀន។
ចំពោះពួកសកម្មជនជាច្រើន ការលើកលែងទោសនេះ មិនមែនជាក្តីសង្ឃឹមទេ ហើយបានបង្ហាញថា ពួកមេដឹកនាំស៊ីវិលលើកដំបូងរបស់មីយ៉ាន់ម៉ាដែលដឹកនាំដោយយោធាអស់រាប់ទសវត្សរ៍ នៅតែតាំងធ្វើទៅតាមរបៀបដដែលដូចតែមេដឹកនាំមុនៗ ដែលគាំទ្រដោយពួកយោធាដែរ។
បណ្តាញសិទ្ធិមនុស្សភូមាបាននិយាយនៅក្នុងសេចក្តីថ្លែងការណ៍ កាលពីចុងខែមុនថា ដើម្បីទទួលបានសេរីភាព៖ «អ្នកដែលត្រូវកាត់ទោសដោយរដ្ឋបានត្រូវបង្ខំឲ្យពឹងផ្អែកលើការសុំលើកលែងទោសដោយរដ្ឋដដែល»។
អ្នកដែលត្រូវបានចាប់ខ្លួនកាលពីពេលថ្មីៗនេះ គឺលោក Min Htin Ko Ko Gyi ជាអ្នកផលិតខ្សែភាពយន្ត និងអ្នកគាំទ្រសិទ្ធិមនុស្ស បានត្រូវគេបដិសេធមិនឲ្យបង់ប្រាក់ធានានៅក្រៅឃុំឃាំងម្តងហើយម្តងទៀត ថ្វីបើមានការភ័យខ្លាចថា លោកអាចស្លាប់នៅក្នុងការឃុំឃាំងនៅពេលដែលលោកមានជំងឺមហារីកថ្លើមក៏ដោយ។
លោកបានរងការចោទប្រកាន់កាលពីដើមខែមេសា នៅក្រោមមាត្រទី ៦៦ នៃច្បាប់ប្រឆាំងការបង្ខូចកេរ្តិ៍ឈ្មោះដែលអ្នករិះគន់និយាយថា ត្រូវបានគេប្រើដើម្បីបំបិទមាត់អ្នកប្រឆាំង បន្ទាប់ពីលោកចុះផ្សាយលើបណ្តាញសង្គមហ្វេសប៊ុក ដែលរិះគន់តួនាទីក្នុងនយោបាយដ៏ខ្លាំងរបស់ពួកយោធា៕
