លោកស្រី អង់សាន ស៊ូជី មេដឹកនាំមីយ៉ាន់ម៉ា គ្រោងនឹងធ្វើសុន្ទរកថាថ្នាក់ជាតិមួយ នៅថ្ងៃអង្គារនេះ ដែលគេរំពឹងថា នឹងលើកឡើងពីវិបត្តិនៅក្នុងរដ្ឋ Rakhine ដែលកំពុងតែកើតមានអំពើហិង្សា ដែលបានបណ្តាលឲ្យជនជាតិភាគតិចរ៉ូហ៊ីងយ៉ា ៤សែននាក់ រត់ភៀសខ្លួនទៅកាន់ប្រទេសបង់ក្លាដែសដែលជាប្រទេសជិតខាង ក្នុងរយៈពេលប៉ុន្មានសប្តាហ៍នេះ។
ជនសកម្មប្រយុទ្ធរ៉ូហ៊ីងយ៉ា បានវាយប្រហារកងកម្លាំងសន្តិសុខមីយ៉ាន់ម៉ា កាលពីចុងខែសីហា។ ចាប់តាំងពីពេលនោះមក អ្នកវិភាគនិងមន្ត្រីសិទ្ធិមនុស្សនិយាយថា យោធាមីយ៉ាន់ម៉ាបានធ្វើការបង្ក្រាបយ៉ាងសាហាវឃោរឃៅ ដែលបានដុតភូមិទាំងមូលជាច្រើន ហើយបានសម្លាប់ស្ត្រីនិងកុមារដែលរត់ភៀសខ្លួន។
លោកស្រី អង់សាន ស៊ូជី ដែលជាជ័យលាភីពានរង្វាន់ណូបែលបានរងការរិះគន់យ៉ាងខ្លាំងក្លាពីសហគមន៍អន្តរជាតិ ចំពោះការមិននិយាយអំពីស្ថានភាពនេះ។ លោកស្រីបានលុបចោលមិនមកចូលរួមប្រជុំនៅក្នុងមហាសន្និបាតអង្គការសហប្រជាជាតិក្នុងសប្តាហ៍នេះទេ ដោយអះអាងថា ត្រូវធ្វើសុន្ទរកថាពីវិបត្តិដែលកំពុងតែកើតមានឡើងនៅក្នុងប្រទេស។
លោក Louis Charbonneau ប្រធានអង្គការ Human Rights Watch ប្រចាំនៅអង្គការសហប្រជាជាតិ បានមានប្រសាសន៍ថា «កិច្ចប្រជុំកម្រិតខ្ពស់នៅក្នុងថ្ងៃនេះ គឺជាជំហានទីមួយ ប៉ុន្តែមិនមែនជាជំហានចុងក្រោយនោះទេ។ កិច្ចពិភាក្សានេះគួរតែនាំឲ្យមានសកម្មភាពដ៏ខ្លាំងក្លាពីអង្គការសហប្រជាជាតិ ដើម្បីធ្វើឲ្យកងកម្លាំងសន្តិសុខមីយ៉ាន់ម៉ា បញ្ចប់យុទ្ធនាការបោសសម្អាតជាតិសាសន៍របស់ខ្លួន»៕