អង្គការមូលនិធិកុមាររបស់អ.ស.ប (UNICEF)បានព្រមានថា មនុស្សអាចដល់ទៅ ១,៣លាននាក់នៅតំបន់វាយប្រយុទ្ធគ្នាក្នុងភាគខាងកើតនៃប្រទេសអ៊ុយក្រែន កំពុងតែប្រឈមមុខនឹងបញ្ហាទឹក។ អង្គការ UNICEF រាយការណ៍ថាការវាយប្រយុទ្ធគ្នារវាងកងកម្លាំងរដ្ឋាភិបាល និងក្រុមបំបែករដ្ឋលំអៀងទៅរុស្ស៊ី កំពុងបំផ្លាញបំពង់ទឹក ដែលជាការនាំឲ្យកុមារ និងមនុស្សធំពេញវ័យដល់ទៅ ១,៣លាននាក់ខ្វះទឹកស្អាតប្រើប្រាស់។
អង្គការ UNICEF និយាយថា មនុស្សជាង៤៧០.០០០នាក់នៅតំបន់ Luhansk ដែលក្រុមឧទ្ទាមកាន់កាប់នោះ ក៏ខ្វះទឹកស្អាតប្រើប្រាស់ផងដែរ ហើយថា ពួកគេត្រូវធ្វើដំណើរទៅភូមិជិតខាង ដើម្បីទៅយកទឹកពីអណ្តូងដែលមានទឹក។
អង្គការ UNICEF បានរាយការណ៍ថា មនុស្សជិត ១,៤លាននាក់ ដែលក្នុងនោះរួមមានកុមារជិត ១៧៤.០០០នាក់បានព្រាត់ចាកពីទីលំនៅចាប់តាំងពីមានការវាយប្រយុទ្ធគ្នានៅភាគខាងកើតនៃប្រទេសអ៊ុយក្រែន កាលពីខែមេសាឆ្នាំ២០១៤មក។ អង្គការនេះបានបន្តថា វិបត្តិមនុស្សធម៌ក្នុងប្រទេសនេះកំពុងប៉ះពាល់ដល់មនុស្សជាង ៥លាននាក់ ដែលក្នុងនោះរួមមានកុមារចំនួន ១,៧នាក់៕
