ប្រជាពលរដ្ឋជាង៣០នាក់ រស់នៅភូមិដំណាក់សង្កែ សង្កាត់ព្រែកកំពឹស ខណ្ឌដង្កោ បានតវ៉ានៅមុខសាលារាជធានីភ្នំពេញ នាព្រឹកថ្ងៃពុធនេះ ស្នើឱ្យអន្តរាគមន៍ករណីក្រុមហ៊ុនមួយបានប្តឹងទប់ស្កាត់មិនឱ្យមន្ត្រីផ្តល់ប្លង់រឹងឱ្យពលរដ្ឋ។
លោក សម សីលា អាយុ៣៦ឆ្នាំ ជាពលរដ្ឋដែលបានទិញដីឡូត៍ក្នុងភូមិដំណាក់សង្កែ សង្កាត់ព្រែកកំពឹស ខណ្ឌដង្កោ និងបានមកសាលារាជធានីភ្នំពេញនៅថ្ងៃពុធនេះ ប្រាប់អ្នកសារព័ត៌មានថា លោក និងពលរដ្ឋផ្សេងទៀតស្នើឱ្យអាជ្ញាធរជួយពន្លឿនការដោះស្រាយបញ្ហាបណ្ណកម្មសិទ្ធិដីធ្លី ឬហៅថាប្លង់រឹងដល់ពលរដ្ឋ ដើម្បីងាយប្រើប្រាស់ក្នុងការសម្រួលដល់ជីវភាព។
លោកនិយាយថា៖ «ការរស់នៅលើដី លើផ្ទះ គឺពឹងលើប្លង់នេះហើយ។ ហើយបើសិនជាប្លង់ដែលទទួលស្គាល់ដោយអាជ្ញាធរគ្រប់ស្ថាប័នហើយនៅតែមិនអាចប្រើប្រាស់បាន នៅតែអាចឱ្យគេប្តឹងយកបាន តើប្រជាជនខ្ញុំទាំងអស់គ្នានេះ អាចពឹងពាក់លើអ្វី មានអ្វីជាជំហរ។ ផ្ទះរបស់យើងរស់នៅសុខៗ គេប្តឹងថាជារបស់គេ ទាំងដែលយើងមានប្លង់ហើយ ក៏នៅតែគេយកបាន តើប្រជាជនរស់នៅពឹងអ្វីទៀត»។
បើតាមលោក សម សីលា ប្រជាពលរដ្ឋបានស៊ើបសួរពីខាងខណ្ឌ និងសុរិយោដីអំពីប្រវត្តិដី មុនសម្រេចចិត្តថាទិញ។
លោកបន្ថែមថា៖ «ពេលដែលយើងទិញដី ត្រូវស៊ើបសួរពីសង្កាត់ ពីខណ្ឌ ពីខាងសុរិយោដីរួចរាល់ហើយ បានយើងហ៊ានទិញ។ ក៏ប៉ុន្តែបើយើងស៊ើបសួរពួកគាត់អស់ហើយ គាត់រត់ឯកសារថាត្រឹមត្រូវអស់ហើយ បោះត្រា ប្រថាប់ត្រាត្រឹមត្រូវអស់ហើយ តែបែរជាមានបញ្ហា បងប្អូនអាចពិចារណាបាន នេះជាកំហុសរបស់អ្នកណា?»។
ពលរដ្ឋម្នាក់ទៀត អ្នកស្រី ស្រ៊ី ចន្ថា អាយុ៣៥ឆ្នាំ ដែលបានយកប្លង់ចេញដោយខណ្ឌ យកទៅខ្ចីលុយធនាគារជាង៣ម៉ឺនដុល្លារអាមេរិក កាលពីអំឡុងឆ្នាំ២០១៩ ក៏ស្នើឱ្យអាជ្ញាធរផ្តល់បណ្ណកម្មសិទ្ធិស្របច្បាប់ដល់អ្នកស្រីផងដែរ។
អ្នកស្រីថ្លែងថា៖ «ខ្ញុំទិញ២០១៦ ហើយខ្ញុំធ្វើផ្ទះនៅ២០១៨ ខ្ញុំចូលរស់នៅឆ្នាំ២០១៩ ហើយឥឡូវគេមានប្លង់មួយទៀតគ្របពីលើប្លង់ពួកខ្ញុំ។ ខ្លាចអត់បានប្លង់កម្មសិទ្ធិ ហើយដី និងផ្ទះ គឺជាអាយុជីវិតរបស់ពួកខ្ញុំ បើសិនជាពួកគេដករបស់ពួកខ្ញុំគឺ ស្មើនឹងដកអាយុជីវិតរបស់ពួកខ្ញុំ»។
បើតាមប្រជាពលរដ្ឋដែលតវ៉ាប្រាប់ថា មន្រ្តីបានចុះវាស់វែងដើម្បីធ្វើប្លង់ជាប្រព័ន្ធតាំងពីខែសីហា ឆ្នាំ២០២៣មក ហើយពួកគេត្រូវបានប្រាប់ថា នឹងទទួលបានប្លង់នៅថ្ងៃទី២២ ខែមិនា ប៉ុន្តែពួកគេអះអាងថា អ្នកស្រី លឹម លីណា តំណាងក្រុមហ៊ុនអេកូមេហ្គាប៉ូលីសឌីវើឡុបមេនខបភើរេសិន បានប្តឹងទប់ស្កាត់មិនឱ្យចៅសង្កាត់ និងមន្រ្តីពាក់ព័ន្ធ ចេញបណ្ណកម្មសិទ្ធិដល់ពលរដ្ឋចំនួន៥២ក្បាលដី ក្នុងភូមិដំណាក់សង្កែ សង្កាត់ព្រែកកំពឹស ខណ្ឌដង្កោ តាំងពីខែមករា ឆ្នាំ២០២៤។
ពលរដ្ឋបានអះអាងថា ម្ចាស់ក្រុមហ៊ុនអេកូមេហ្គាប៉ូលីសឌីវើឡុបមេនខបភើរេសិន (Eco Magapolis Development Corporation Co.Ltd) រួមមានឈ្មោះ ចៅ សុផាន ឈ្មោះ ឃុន សៀ ឈ្មោះ លឹម លីណា និងឈ្មោះ លឹម ណារី។
វីអូអេមិនទាន់អាចសុំការអត្ថាធិប្បាយពីអ្នកស្រី គឹម ញឹប អភិបាលបាលខណ្ឌដង្កោ លោក ម៉េត មាសភក្តី អ្នកនាំពាក្យសាលារាជធានីភ្នំពេញ និងលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បាននៅឡើយទេ នៅថ្ងៃពុធនេះ។
លោកឧកញ្ញ៉ា ឃុន សៀ ប្រាប់វីអូអេថា លោកមិនដឹងលម្អិតអំពីករណីប្តឹងទាស់នេះទេ ដោយលោកបង្វែសំនួរទៅសួរអ្នកស្រី លឹម លីណា វិញ។
លោកថ្លែងថា៖ «បាទ យើងអត់សូវច្បាស់ដែរ ព្រោះការងារហ្នឹង ខ្ញុំអត់បានកាន់។ លោកស្រី លឹម លីណា បានដឹងរឿង»។
វីអូអេមិនអាចសុំការឆ្លើយតបពីអ្នកស្រី លឹម លីណា តំណាងក្រុមហ៊ុនអេកូមេហ្គាប៉ូលីសឌីវើឡុបមេនខបភើរេសិន បាននៅឡើយទេ។
ក្រោយការតវ៉ា និងចូលជជែកជាមួយមន្រ្តីនៅសាលារាជធានីភ្នំពេញជាងមួយម៉ោង ពលរដ្ឋទាំងនោះ ប្រាប់ថា មន្ត្រីសាលារាជធានីភ្នំពេញប្រាប់ពួកគេថា នឹងផ្តល់ដំណឹងជូនពលរដ្ឋ ក្រោយពិធីបុណ្យចូលឆ្នាំប្រពៃណីជាតិខ្មែរ៕
វេទិកាបញ្ចេញមតិ