នៅពេលដែលពួកអាជ្ញាធររកឃើញវត្ថុដែលគេសង្ស័យជាគ្រាប់បែកកាន់តែច្រើនឡើងដែលត្រូវបានគេបញ្ជូនទៅពួកគណបក្សប្រជាធិបតេយ្យល្បីៗ លោកប្រធានាធិបតីសហរដ្ឋអាមេរិក ដូណាល់ ត្រាំ ភាគច្រើនបានស្តីបន្ទោសបណ្តាញព័ត៌មានចំពោះការធ្វើឲ្យមានបរិយាកាសខឹងសម្បាខាងនយោបាយនៅក្នុងសហរដ្ឋអាមេរិក។
លោកប្រធានាធិបតីត្រាំបាននិយាយនៅក្នុងសារតាមប្រព័ន្ធ Twitterកាលពីព្រឹកថ្ងៃព្រហស្បតិ៍ថា ខ្ញុំចង់និយាយសំដៅលើព័ត៌មានក្លែងក្លាយថា «មួយផ្នែកធំនៃការខឹងសម្បាដែលយើងឃើញនៅពេលសព្វថ្ងៃនេះនៅក្នុងសង្គមរបស់យើង គឺបណ្តាលមកពីសេចក្តីរាយការណ៍ក្លែងក្លាយនិងមិនត្រឹមត្រូវរបស់បណ្តាញព័ត៌មានដែលខ្ញុំចាត់ទុកថា ព័ត៌មានក្លែងក្លាយ។ភាពស្អប់ខ្ពើមនេះមានហួសពីការពណ៌នា។ បណ្តាញព័ត៌មានត្រូវតែបោសសម្អាតសកម្មភាពរបស់ខ្លួនឲ្យបានឆាប់រហ័ស»។
សារតាមប្រព័ន្ធTwitter របស់ប្រធានាធិបតីត្រាំបានកើតមានឡើងនៅពេលដែលវត្ថុដែលត្រូវបានគេសង្ស័យជាគ្រឿងផ្ទុះបានផ្ញើរទៅកាន់អាស័យដ្ឋានរបស់លោកRobert De Niro តួឯកកុននិងលោកJoe Biden អតីតអនុប្រធានាធិបតី បានត្រូវគេរកឃើញកាលពីថ្ងៃព្រហស្បតិ៍ ដោយធ្វើឲ្យមានកញ្ចប់បែបនេះយ៉ាងតិចក៏ចំនួន១០ដែរបានត្រូវគេរកឃើញនៅទីកន្លែងនានាទូទាំងសហរដ្ឋអាមេរិកចាប់តាំងពីថ្ងៃចន្ទមក។
កាលពីថ្ងៃព្រហស្បតិ៍ ប៉ូលិសក្នុងក្រុងញូវយ៉កបាននិយាយថា កញ្ចប់មួយបានត្រូវគេផ្ញើរទៅឲ្យក្រុមហ៊ុនផលិតរបស់របរមួយដែលកាន់កាប់ដោយលោក De Niro ហើយកញ្ចប់ស្រដៀងគ្នាទៀតបានត្រូវផ្ញើរទៅឲ្យពួកគណបក្សប្រជាធិបតេយ្យល្បីៗ រួមមានលោក បារ៉ាក់ អូបាម៉ា អតីតប្រធានាធិបតីសហរដ្ឋអាមេរិក និងលោកស្រី Hillary Clinton អតីតរដ្ឋមន្រ្តីការបរទេស៕
