បន្ទាប់ពីលោក Jeff Sessions រដ្ឋមន្រ្តីក្រសួងយុត្តិធម៌អាមេរិកបានសារភាពថា លោកបានជួបជាមួយលោក Sergei Kislyak ឯកអគ្គរដ្ឋទូតរុស្ស៊ីចំនួន២ដងក្នុងអំឡុងពេលនៃយុទ្ធនាការឃោសនាបោះឆ្នោតប្រធានាធិបតីកាលពីឆ្នាំទៅ ហើយលោកខកខានមិនបានបញ្ចេញឲ្យគេដឹងពីជំនួបទាំងនោះក្នុងអំឡុងនៃសវនាការទទួលការតែងតាំងនៅព្រឹទ្ធសភា រដ្ឋបាលថ្មីរបស់ប្រធានាធិបតីនៅបន្តដោះស្រាយការបែកធ្លាយជំនួបដែលមិនបានប្រាប់ឲ្យដឹងកាលពីពេលមុនៗជាមួយលោក Kislyak។
លោករដ្ឋមន្រ្តី Sessions បានដកខ្លួនរបស់លោកចេញពីការស៊ើបអង្កេតសហព័ន្ធដែលចោទប្រកាន់ថា រុស្ស៊ីបានជ្រៀតជ្រែកក្នុងការបោះឆ្នោតប្រធានាធិបតីនៅឆ្នាំ ២០១៦។ទោះជាយ៉ាងណាក៏ដោយ លោកប្រធានាធិបតីត្រាំ និងពួកមន្រ្តីសេតវិមានត្រូវតែប្រ ឈមផលវិបាកកើតចេញពីជំនួបកាលពីខែធ្នូនៅឯអាគារ Trump Towerនៅក្នុងទីក្រុងញូវយ៉ក រវាងឯកអគ្គរដ្ឋទូតរុស្ស៊ី និងលោក Jared Kushner កូនប្រសារប្រុសរបស់ប្រធានាធិបតី ត្រាំ ហើយនឹងលោក Michael Flynn ទីប្រឹក្សាសន្តិសុខជាតិដែលត្រូវបានបណ្តេញចេញពីដំណែង។
លោកប្រធានាធិបតី ត្រាំ បានបណ្តេញលោក Flynn ចេញពីដំណែងបន្ទាប់ពីកាន់កាប់ការងារចំនួន ២៤ ថ្ងៃ នៅពេលដែលព័ត៌មានបានលេចចេញថា លោក Flynn បានកុហកពួកមន្រ្តីកំពូលអំពីការសន្ទនារបស់លោកជាមួយលោកឯកអគ្គរដ្ឋទូតរុស្ស៊ី។
លោកស្រី Hope Hicks អ្នកនាំពាក្យសេតវិមានបាននិយាយកាលពីថ្ងៃព្រហស្បត៍ថា គោលបំណងនៃជំនួបនៅអាគារ Trump Tower គឺបង្កើតខ្សែទាក់ទង។ លោកស្រីអ្នក នាំពាក្យបាននិយាយទៀតថា លោក Kushner ក៏បានជួបជាមួយពួកតំណាងរបស់ប្រទេសមួយចំនួនធំដែលជាការធម្មតាសម្រាប់រដ្ឋបាលចូលកាន់ដំណែង ហើយថាមិនមានអ្វីជាការមិនត្រឹមត្រូវអំពីពួកមន្រ្តីរដ្ឋបាលចូលកាន់ដំណែងថ្មីជួបជាមួយអ្នកតំណាងរដ្ឋាភិបាលបរទេសនោះទេ។
ទោះយ៉ាងណាក៏ដោយ រដ្ឋបាលរបស់លោកត្រាំ បានប្រកែកអស់រយៈពេលជាច្រើនខែមកហើយថា មិនមានការទាក់ទងរវាងមន្រ្តីណាម្នាក់ក្នុងយុទ្ធនាការឃោសនាបោះឆ្នោតនិងពួកមន្រ្តីរុស្ស៊ីទេ៕
