សម្ព័ន្ធភាពគណបក្សដែលដឹកនាំដោយនាយករដ្ឋមន្ត្រីឥណ្ឌាលោក Narendra Modi បានឈ្នះ សំឡេងភាគច្រើនតែបន្តិចបន្តួចប៉ុណ្ណោះក្នុងរដ្ឋសភាបន្ទាប់ពីការបោះឆ្នោតបានបញ្ចប់ទៅកាលពីថ្ងៃទី ១ ខែមិថុនា។ ប៉ុន្តែ ការប្រជែងដ៏ខ្លាំងក្លាពីបក្សប្រឆាំងបានបន្ថយចំនួនអ្នកគាំទ្រគណបក្សរបស់លោក Modi យ៉ាងច្រើន ដែលនេះឆ្លុះបញ្ចាំងឱ្យឃើញពីការធ្លាក់ចុះប្រជាប្រិយភាពរបស់លោកក្រោយពីលោកបានកាន់តំណែងបាន ១០ ឆ្នាំមក។
គណបក្សជាតិនិយមហិណ្ឌូ Bharatiya Janata Party (BJP) របស់លោក Modi រួមជាមួយនឹងសម្ព័ន្ធភាពប្រជាធិបតេយ្យជាតិ (NDA) ដែលជាបក្សសម្ព័ន្ធរបស់ខ្លួន បានទទួលអាសនៈ ២៩៤ ក្នុងចំណោមអាសនៈសរុប ៥៤៣ ក្នុងរដ្ឋសភាឥណ្ឌា។
ក្នុងសារមួយបង្ហោះតាមប្រព័ន្ធផ្សព្វផ្សាយអនឡាញ X លោក Modiថា៖ «ប្រជាជនបានដាក់ការទុកចិត្តរបស់ពួកគេលើសម្ព័ន្ធភាព NDA សម្រាប់អាណត្តិទី ៣ ទៀត! នេះជាជោគជ័យជាប្រវត្តិសាស្ត្រក្នុងប្រទេសឥណ្ឌា»។
លោកបានធានាចំពោះប្រជាជនថា៖ «យើងនឹងបន្តការងារដ៏ល្អដែលយើងបានធ្វើក្នុងពេលមួយទសវត្សរ៍មកនេះដើម្បីបន្តបំពេញតាមក្តីប្រាថ្នារបស់ប្រជាជន»។ លោក Modi បានលើកសញ្ញាជ័យជម្នះនៅទីស្នាក់ការគណបក្ស BJP កាលពីល្ងាចថ្ងៃទី ៤ ខែមិថុនា។
ប៉ុន្តែ ជាលទ្ធផលធ្លាក់ចុះសម្រាប់មេដឹកនាំឥណ្ឌាដែលបានគ្រប់គ្រងប្រទេសនេះដោយអាណត្តិឈ្នះដាច់ក្នុងពេល ១០ ឆ្នាំចុងក្រោយនេះ គណបក្ស BJP ទំនងជាមិនអាចទទួលបានសំឡេងភាគច្រើនដាច់ខាតតែឯកឯងទេ។
បន្ទាប់ពីការរាប់សន្លឹកឆ្នោតគិតត្រឹមល្ងាចថ្ងៃទី ៤ ខែមិថុនា គណបក្សនេះឈ្នះបានអាសនៈ ២៤០ ដែលចំនួននេះតិចជាងចំនួន ២៧២ អាសនៈ ដែលត្រូវការសម្រាប់សំឡេងភាគច្រើនដាច់ខាត។ នេះជាលទ្ធផលធ្លាក់ចុះខ្លាំងពីចំនួនអាសនៈ ៣០៣ ដែលគណបក្សនេះបានឈ្នះនៅឆ្នាំ ២០១៩។
អ្នកវិភាគថា លទ្ធផលខ្សោយជាងការរំពឹងទុករបស់គណបក្ស BJP នេះបង្ហាញថា ប្រជាប្រិយភាពរបស់លោក Modi ស្រុតចុះ។ មេដឹកនាំឥណ្ឌារូបនេះ ដែលក្រុមអ្នករិះគន់ចាត់ទុកថាបានធ្វើឱ្យមានការបែកបាក់នៅក្នុងប្រទេស បានដឹកនាំយុទ្ធនាការឃោសនារកសំឡេងឆ្នោតតាមរបៀបប្រធានាធិបតីនិយម ដោយឱ្យគណបក្សពឹងផ្អែកទាំងស្រុងលើរូបលោកដើម្បីទាក់ទាញសន្លឹកឆ្នោត។ តែឥឡូវ លោកនឹងត្រូវពឹងលើសម្ព័ន្ធភាពរបស់លោកដើម្បីបង្កើតរដ្ឋាភិបាលថ្មី។
អ្នកវិភាគនយោបាយលោក Nilanjan Mukhopadhyay ថា៖ «លោក Modi មិនដែលធ្វើការជាមួយដៃគូក្នុងសម្ព័ន្ធភាពគណបក្សរបស់លោកទេកាលពីអតីតកាល។ លោកតែងតែធ្វើជាមេដឹកនាំសម្រេចអ្វីដោយខ្លួនឯង។ តែដោយបក្សរបស់លោកគ្មានសំឡេងភាគច្រើនដាច់ខាតនោះ លោកនឹងត្រូវធ្វើជានាយករដ្ឋមន្ត្រីដាក់ខ្លួនជាងមុនឆ្ងាយដើម្បីធ្វើការជាមួយសម្ព័ន្ធមិត្តរបស់លោក»។
ទោះបីជាលោក Modi មិនបានឈ្នះឆ្នោតភ្លូកទឹកភ្លូកដីដូចដែលបក្សរបស់លោកបានរំពឹងទុកនិងការស្ទង់មតិបានព្យាករក៏ដោយ ក៏លោកនឹងក្លាយជានាយករដ្ឋមន្ត្រីទីពីរក្នុងប្រទេសឥណ្ឌាដែលឈ្នះឆ្នោតកាន់តំណែងនៅអាណត្តិទី ៣ ជាបន្តទៀត។ នាយករដ្ឋមន្ត្រីឥណ្ឌាទីមួយដែលបានកាន់តំណែង ៣ អាណត្តិគឺលោក Jawaharlal Nehru។
លោក Modi ដែលគេមើលឃើញថាជាមេដឹកនាំខ្លាំង បានកសាងប្រជាប្រិយភាពរបស់លោកដោយប្រើកម្មវិធីគាំពារសង្គមជាច្រើន និងសម្ញែងមុខជាអ្នកជាតិនិយមហិណ្ឌូក្នុងប្រទេសដែលមានអ្នកកាន់សាសនាហិណ្ឌូភាគច្រើននេះ។ ប៉ុន្តែ អ្នកវិភាគថា អត្រាអត់ការងារធ្វើកើនឡើង ជាពិសេសក្នុងចំណោមយុវជនក្មេងៗ និងអតិផរណាខ្ពស់នៅក្នុងប្រទេសបានធ្វើឱ្យប្រជាប្រិយភាពរបស់លោកធ្លាក់ចុះ។
អ្នកវិភាគនយោបាយអ្នកស្រី Neerja Chowdhury ថា៖ «ខ្ញុំមិនឃើញមានការគាំទ្រភ្លូកទឹកភ្លូកដីលើរូប Modi នោះទេ។ បក្សប្រឆាំងក៏តស៊ូស្វិតស្វាញដែរ។ លើកនេះ ពួកគេមិនបោះបង់ការតស៊ូទេ។ មានស្មារតីតស៊ូក្នុងយុទ្ធនាការឃោសនារកសំឡេងឆ្នោតរបស់ពួកគេ»។
សម្ព័ន្ធបក្សប្រឆាំងដែលមានគណបក្សជាង ២០ រួមគ្នា ដឹកនាំដោយគណបក្ស Congress Party ដើម្បីប្រជែងជាមួយបក្ស BJPទទួលបានការគាំទ្រច្រើនជាងមុនឆ្ងាយ។ សម្ព័ន្ធគណបក្សប្រឆាំងនេះ ដែលឃោសនាដោយប្រើកម្មវិធីនយោបាយកាត់បន្ថយវិសមភាពទ្រព្យសម្បត្តិនិងលើកតម្កើងស្ថាប័នប្រជាធិបតេយ្យ ទទួលបានអាសនៈរដ្ឋសភាចំនួន ២៣២ គឺកើនឡើងជិតទ្វេដងពីចំនួន ១១៩។
បក្សប្រឆាំងសង្កត់ធ្ងន់លើភាពអត់ការងារធ្វើ ហើយចោទលោក Modi ថាធ្វើឱ្យធ្លាក់ចុះប្រព័ន្ធគ្រប់គ្រងប្រទេសដែលមិនពាក់ព័ន្ធនឹងសាសនា ដោយដៅលើគូប្រជែងនយោបាយរបស់លោកនិងមិនអត់ឱនឱ្យអ្នកប្រឆាំង។
អ្នកវិភាគនយោបាយលោក Mukhopadhyay ថា៖ «លទ្ធផលនេះបង្ហាញថាឥណ្ឌាបានក្លាយជាប្រទេសប្រជាធិបតេយ្យដែលមានលក្ខណៈប្រកួតប្រជែងកាន់តែខ្លាំងជាងមុនឆ្ងាយ។ វាក៏បង្ហាញថាប្រជាជនបញ្ចេញប្រតិកម្មប្រឆាំងនឹងការរអិលចូលទៅក្នុងរបបអាជ្ញាធិបតេយ្យផងដែរ»៕
ប្រែសម្រួលដោយលោក សាយ មុន្នី
វេទិកាបញ្ចេញមតិ