ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្រ្តី​ការបរទេស​ជប៉ុន​គ្រោង​ទៅ​ធ្វើទស្សនកិច្ចនៅ​កម្ពុជានៅថ្ងៃអាទិត្យនេះ


រូបឯកសារ៖ លោក Taro Kono រដ្ឋ​មន្ត្រី​ការ​បរទេស​ជប៉ុន​ ថ្លែង​ក្នុង​កិច្ច​សម្ភាស​ជាមួយ​ទីភ្នាក់ងារ​ Reuters នៅ​ក្រសួង​ការបរទេស​ជប៉ុន ក្នុង​ទីក្រុង​តូក្យូ កាល​ពី​ថ្ងៃ​ទី​២៧ មីនា ២០១៨។

សេចក្តីថ្លែង​ការណ៍​ក្រសួង​បរទេស​កម្ពុជា​ដែល​ចេញ​ផ្សាយ​ជាសាធារណៈ​កាល​ពីថ្ងៃ​សុក្រ​បាន​ឲ្យ​ដឹង​ថា​ លោកTaro Kono (តារ៉ូ កូណូ)​ រដ្ឋមន្រ្តីការ​បរទេស​ជប៉ុន​គ្រោង​នឹង​ចុះ​ហត្ថ​លេខា​ផ្តល់​ហិរញ្ញប្បទាន​ឥត​សំណង​ដល់​កម្ពុជា​ប្រមាណ​ជាង​៩០​លាន​ដុល្លារ​ ក្នុង​អំឡុង​ទស្សនកិច្ច​ដែល​ចាប់​ផ្តើម​នៅ​ថ្ងៃ​អាទិត្យ​នេះ។

តាម​ផែនការ លោក ​Taro Kono ​ក៏​គ្រោង​នឹង​ជួប​ជាមួយ​លោក​នាយក​រដ្ឋមន្ត្រី​ ហ៊ុន សែន ផង​ដែរ។​

កាល​ពី​ខែ​មីនា​រដ្ឋាភិបាល​ជប៉ុន​ធ្លាប់​បាន​បរាជ័យ​ម្តង​រួច​ទៅ​ហើយ​ក្នុង​ការ​ជួយ​សម្រប​សម្រួល​វិបត្តិ​នយោបាយ​រវាង​គណបក្ស​កាន់​អំណាច ​និង​គណបក្ស​ប្រឆាំង។ ​លោក ហ៊ុន សែន​ បាន​ប្រកាស​ដាច់​អហង្ការ​ថា ​លោកនឹង​មិន​ចរចា ឬ​សម្រប​សម្រួល​នយោបាយ​ជា​មួយ​ក្រុម​មេដឹកនាំ​គណបក្ស​សង្គ្រោះ​ជាតិជា​ដាច់​ខាត។​

សមាជិក​ព្រឹទ្ធ​សភា​ជប៉ុន​កាល​ពី​ខែមីនា​បាន​សម្តែង​ការព្រួយ​បារម្ភ​ចំពោះ​ការ​រំលាយ​គណបក្ស​សង្គ្រោះ​ជាតិ ​ការ​ឃុំខ្លួន​លោក​ កឹម សុខា​ ប្រធាន​គណបក្ស​សង្គ្រោះ​ជាតិ​ ការហាម​មិនឲ្យ​មន្រ្តី​គណបក្ស​ប្រឆាំង​ចំនួន​១១៨​រូប​ធ្វើ​នយោបាយ​រយៈ​ពេល​ប្រាំឆ្នាំ ​ការ​ធ្វើទុក្ខ​បុកម្នេញ​សង្គម​ស៊ីវិល ​និង​បណ្តាញ​សារព័ត៌មាន​ឯករាជ្យ​នៅ​កម្ពុជា។ ​សមាជិក​ព្រឹទ្ធ​សភា​បន្ត​ថា​ ប្រសិន​បើ​ជម្លោះ​នយោបាយ​របស់​កម្ពុជា​នៅ​តែ​បន្ត ​នោះ​ការបោះ​ឆ្នោត​នៅ​ខែ​កក្កដា​ខាង​មុខ​នឹង​រង​ការ​ប៉ះទង្គិច​ធ្ងន់ធ្ងរ។ ​

លោក ​Taro Kono​ រដ្ឋមន្ត្រីការ​បរទេស​ជប៉ុន ធ្លាប់​មាន​ប្រសាសន៍​ថា​ ជប៉ុន​នៅ​តែ​បន្ត​ជំរុញ​ឲ្យ​មាន​ការ​បោះឆ្នោត​ដោយ​សេរី ត្រឹមត្រូវ ​និង​យុត្តិធម៌ ​ហើយ​ប្រទេស​ជប៉ុន​ថែម​ទាំង​បាន​ផ្តល់​ជំនួយ​ជាប្រអប់​ឆ្នោត​ចំនួន​មួយ​ម៉ឺន​ គិត​ជា​ទឹកប្រាក់​តម្លៃ​៧​លាន​៥​សែន​ដុល្លារ។ បើ​ធ្វើការ​បែង​ចែក​ ប្រអប់​ឆ្នោត​នីមួយៗ​មាន​តម្លៃ​ខ្ពស់​ដល់​ទៅ​៧៥០​ដុល្លារ៕

XS
SM
MD
LG