សិស្សានុសិស្សរាប់លាននាក់ក្នុងប្រទេសប៉ាគីស្ថានបានវិលត្រឡប់ទៅកាន់សាលារៀន និងសាកលវិទ្យាល័យរបស់ពួកគេវិញហើយកាលពីថ្ងៃអង្គារ បន្ទាប់ពីសាលារៀនត្រូវបិទអស់រយៈពេល៦ខែកន្លងមក ដោយសារការរាតត្បាតឆ្លងនៃជំងឺកូវីដ១៩។
ការវិលត្រឡប់របស់សិស្សក្នុងចំនួនដ៏ច្រើនបំផុតក្នុងពិភពលោករបស់ប្រទេសប៉ាគីស្ថាននេះ កើតមានឡើងបន្ទាប់ពីការឆ្លងប្រចាំថ្ងៃ និងការស្លាប់ដោយសារជំងឺកូវីដ១៩ ក្នុងប្រទេសដែលមានពលរដ្ឋ២២០លាននាក់នេះ មានការថយចុះជាបន្តបន្ទាប់។
មន្ត្រីរបស់ប្រទេសប៉ាគីស្ថានរាយការណ៍ឲ្យដឹងថា មានអ្នកឆ្លងថ្មីៗចំនួនតែ៤០០ករណី និងអ្នកស្លាប់ចំនួន៦នាក់ប៉ុណ្ណោះក្នុងរយៈពេល២៤ម៉ោងកន្លងទៅ។
រដ្ឋាភិបាលរបស់នាយករដ្ឋមន្រ្តីប៉ាគីស្ថានលោក Imran Khan បានបិទគ្រឹះស្ថានសិក្សាក្នុងប្រទេសចំនួនជាង៣០០.០០០កន្លែងកាលពីពាក់កណ្តាលខែមិនា ដែលជាផ្នែកមួយនៃការបិទប្រទេសទាំងមូល ដើម្បីទប់ទល់នឹងការរីករាលដាលឆ្លងនៃវីរុសកូរ៉ណា ដែលបង្កើតជាជំងឺកូវីដ១៩នោះ៕
