ខណៈដែលសកម្មភាពពាណិជ្ជកម្មនៅសហរដ្ឋអាមេរិកបានចាប់ផ្តើមបើកខ្លះវិញហើយ ក្រសួងការងារអាមេរិករាយការណ៍កាលពីថ្ងៃព្រហស្បតិ៍ថា មានពលរដ្ឋអាមេរិក២,៤លាននាក់បន្ថែមទៀតបានដាក់ពាក្យសុំជំនួយរដ្ឋពេលអត់ការងារធ្វើកាលពីសប្តាហ៍មុន។
តួលេខថ្មីនេះបានធ្វើឲ្យចំនួនអ្នកបាត់បង់ការងារសរុបតាំងពីវិបត្តិកូវីដ១៩នៅសហរដ្ឋអាមេរិកមក បានកើនដល់ជាង៣៨,៦លាននាក់ ឬស្មើនឹង១ភាគមួយនៃពលរដ្ឋអាមេរិកពេញវ័យធ្វើការសរុប១៦៤លាននាក់។
ប៉ុន្តែចំនួនអ្នកអត់ការងារថ្មីកាលពីសប្តាហ៍មុននេះជាចំនួនធ្លាក់ចុះវិញ បើប្រៀបធៀបនឹងសប្តាហ៍មុនៗ ដែលមានចំនួនច្រើនជាងហើយកើតឡើងភ្លាមៗក្រោយពីអាជ្ញាធររដ្ឋនានាបានចេញវិធានការបិទអាជីកម្មនានានិងឲ្យពលរដ្ឋនៅផ្ទះកាលពីពាក់កណ្តាលខែមីនា។
ឥឡូវនេះអាជ្ញាធររដ្ឋទាំង៥០របស់អាមេរិកបានចាប់ផ្តើមបន្ធូរបន្ថយការរឹតត្បិតដោយអនុញ្ញាតឲ្យអាជីវកម្មខ្លះអាចបើកឡើងវិញ ដោយមានបញ្ជារក្សាវិធានការការពារខុសៗតាមរដ្ឋនីមួយៗ។
ថ្នាក់ដឹកនាំសេដកិច្ចអាមេរិកក្នុងសប្តាហ៍នេះព្រមានថាចំនួនអ្នកអត់ការងារធ្វើនឹងកើនបន្តទៀតដល់ខែមិថុនា តែសង្ឃឹមថាកញ្ចប់ថវិកាជំនួយរបស់រដ្ឋាភិបាលសហព័ន្ធតម្លៃសរុប ២លានលានដុល្លារនឹងជួយពលរដ្ឋនិងអាជីវកម្មអាមេរិកបានច្រើន៕
