កាលពីថ្ងៃចន្ទម្សិលមិញ ប្រធានាធិបតីសហរដ្ឋអាមេរិកលោក Donald Trump បាននិយាយថា ការពន្យារពេលបទបញ្ជារបស់លោកនៅក្នុងការតម្រូវឲ្យមនុស្សមានគម្លាតឆ្ងាយពីគ្នារយៈពេលមួយខែទៀត អាចជួយសង្គ្រោះជីវិតមនុស្ស ១ លាននាក់នៅក្នុងសហរដ្ឋអាមេរិក។
លោក Trump បានប្រាប់អ្នកកាសែតដូច្នេះថា៖ «ពួកយើងនឹងមានជោគជ័យដ៏អស្ចារ្យ។ ពួកយើងគ្មានជម្រើសអ្វីផ្សេងនោះទេ»។
មន្ត្រីសុខភាពសាធារណៈកំពូលៗរបស់សហរដ្ឋអាមេរិកបានព្រមានថា ទោះបីជាវិធានការទាំងនេះត្រូវបានធ្វើតាមយ៉ងហ្មត់ចត់ក៏ដោយ ក៏ចំនួនសរុបនៃអ្នកស្លាប់ដោយសារជំងឺ COVID-19 នៅក្នុងសហរដ្ឋអាមេរិក អាចនឹងមានចំនួនប្រហែលពី ១ សែន ទៅ ២ សែននាក់។
លោក Trump បានប្រាប់អ្នកកាសែតក្នុងសន្និសីទកាសែតប្រចាំថ្ងៃរបស់ក្រុមការងារពិសេសសេតវិមានទប់ទល់នឹងជំងឺ COVID-19 ថា ឥឡូវនេះមានមនុស្ស ១ លាននាក់នៅទូទាំងប្រទេសបានធ្វើតេស្តដើម្បីរកមេរោគកូរ៉ូណាថ្មីនេះ។
គិតត្រឹមព្រឹកថ្ងៃអង្គារនេះ ចំនួនអ្នកឆ្លងមេរោគនេះនៅសហរដ្ឋអាមេរិកបានកើនលើស ១ សែន ៦ ម៉ឺន ៤ ពាន់នាក់ ដែលជាចំនួនច្រើនជាងគេបំផុតនៅទូទាំងពិភពលោក និងអ្នកស្លាប់ដោយសារជំងឺនេះមានចំនួនជាង ៣ ពាន់នាក់៕
