ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជន​ជំនាន់​សហស្សវត្សរ៍​ធ្វើ​ឲ្យ​មាន​ការ​ផ្លាស់​ប្តូរ​ឥរិយាបថ​ក្នុង​ការ​ទិញ​ទំនិញ


អតិថិជន​ម្នាក់កាន់​ទំនិញ​ដែល​បាន​ទិញ ពី​ហាង​ម៉ាកល្បី​ Louis Vuitton ក្នុង​ផ្សារ​ទំនើប​ Rodeo Drive មុន​ពិធី​បុណ្យ​​ Christmas នៅ​រដ្ឋ​ Beverly Hills កាល​ពី​ខែ​ធ្នូ​ ទី ៩ ឆ្នាំ​​២០១៣។ REUTERS/Fred Prouser
អតិថិជន​ម្នាក់កាន់​ទំនិញ​ដែល​បាន​ទិញ ពី​ហាង​ម៉ាកល្បី​ Louis Vuitton ក្នុង​ផ្សារ​ទំនើប​ Rodeo Drive មុន​ពិធី​បុណ្យ​​ Christmas នៅ​រដ្ឋ​ Beverly Hills កាល​ពី​ខែ​ធ្នូ​ ទី ៩ ឆ្នាំ​​២០១៣។ REUTERS/Fred Prouser

អ្នក​ប្រើ​ប្រាស់​នៅ​ជំនាន់​បចេ្ចក​វិទ្យា​ថ្មី​​មាន​ឥរិយាបថ​ក្នុង​ការ​ទិញ​ទំនិញ​ខុស​ពី​អ្នក​ប្រើ​ប្រាស់​ជំនាន់​មុនៗ។​

អ្នក​វិភាគ​ការ​លក់​រាយ​សាកល​ លោក Christophe Jouan នាយក​ប្រតិបត្តិ​នៃអង្គការ​មូលនិធិ​អនាគត​ (Future Foundation) បាន​និយាយ​ថា​ «បច្ចុប្បន្ន​នេះ​ យុវជន​ដែល​កើត​ក្នុងជំនាន់​បច្ចេកវិទ្យា​ទំនើប មាន​ចំនួន​ច្រើន​ជាង​គេ​នៅ​ជុំ​វិញ​ពិភព​លោក។​ ពួក​គេ​មាន​ភាព​ខុស​គ្នា​ជា​ច្រើន។​ ពួក​គេ​ធំ​ឡើង​ជា​មួយ​នឹង​បច្ចេក​វិទ្យា​ ដូច្នេះ​ពួក​គេ​អាច​ដោះ​ស្រាយអ្វី​ម្យ៉ាងបាន​យ៉ាង​ល្អ​ ឆាប់​រហ័ស​ និង​មាន​ប្រសិទ្ធភាព»។

លោក​និយាយ​ថា​ យុវជន​សម័យសហស្សវត្សរ៍​ធ្វើការ​ទិញ​ទំនិញ​តាម​អ៊ិនធឺណិត​ និង​តាម​ហាង។​ លើ​ប្រព័ន្ធ​អ៊ិនធឺណិត​ អ្នក​ទិញ​ទំនិញ​រំពឹង​ចង់​បាន​បទ​ពិសោធន៍​ផ្ទាល់​ខ្លួន​ច្រើន។​ ពួក​គេ​ជា​រឿយ​ៗ​ប្រើ​ប្រាស់​ការ​ជជែក​តាម​បណ្តាញ​សង្គម​ និង​ទាក់​ទង​ជា​មួយ​នឹង​អ្នក​លក់។ នៅ​តាម​ហាង​ទំនិញ​មួយ​ចំនួន​ បាន​ចាប់​ផ្តើម​ប្រើ​បច្ចេកវិទ្យា​ ដូចជា​ ការដាក់​រូបភាព​ពិតៗ (AR) ដើម្បី​លើកកម្ពស់​នៅ​ក្នុង​ការ​ទិញដូរ​ទំនិញ ។

និន្នាការ​មួយ​ចំនួន​បាន​លេចឡើង​ចេញ​ពី​អ្នក​ទិញ​ទំនិញ​ជន​ជាតិ​ចិន​ ដែល​កំពុង​តែធ្វើ​ឲ្យ​អ្នក​វិភាគ​កត់​សម្គាល់។​

លោក​ Jouan​ បាន​និយាយ​ថា​ «អ្វី​ដែល​គួរ​ឲ្យ​ចាប់​អារម្មណ៍​អំពី​ប្រទេស​ចិន​នោះ​ គឺ​ល្បឿន​នៃ​ការ​ផ្លាស់​ប្តូរ​អាកប្បកិរិយា​ និង​ឥរិយាបថ​ក្នុង​ប្រទេស​នេះ​ ដែល​ហាក់​ដូច​ជា​លឿន​ជាងទីផ្សារ​ដ៏ទៃ​ទៀត​ដូចជា​ឥណ្ឌា​ រុស្សី​ ឬ​ក៏​ប្រេស៊ីល​ ដែល​កំពុងតែ​ផ្លាស់​ប្តូរដូចគ្នា​នេះ​ដែរ ប៉ុន្តែ​មិន​លឿន​ដូច្នេះ​ទេ។​»

តាម​ទម្លាប់​ អតិថិជនដែល​មាន​ទ្រព្យ​ធនមក​ពី​ចិន​ ចូល​ចិត្តប្រើ​ផលិតផល​ម៉ាក​ល្បី​ ហើយ​នឹង​ទិញផលិត​ផល​ម៉ាក​ល្បី​ជា​អន្តរជាតិ​ច្រើន​ជាង។​ ប៉ុន្តែ​ យុវជន​ជំនាន់​សហស្សវត្សរ៍​ដែល​ជ្រើសរើ​សការ​ស្លៀក​ពាក់​មិន​បញ្ចេញ​ម៉ាក​របស់​ផលិតផល​ កំពុង​តែ​កើន​ឡើង។

អ្នក​នាង Maggie Huo ជា​ភ្ញៀវ​ទេសចរ​ម្នាក់​មក​ពី​ប្រទេស​ចិន​ដែល​កំពុង​ទិញ​ទំនិញ​ក្នុង​ទីក្រុង Beverly Hills ​ដ៏​សម្បូណ៍​សប្បាយ​ ក្នុង​ផ្សារ​ទំនើប​ Rodeo Drive និយាយ​ថា «​ខ្ញុំ​មិន​ត្រូវ​ការ​ម៉ាក​ល្បី​នោះ​ទេ ខ្ញុំ​ចូល​ចិត្ត​សម្លៀក​បំពាក់​ដែល​ត្រូវ​នឹង​ចំណង់​ចំណូល​ចិត្ត​របស់​ខ្ញុំ»។

លោក Fan Yang ភ្ញៀវ​ទេសចរ​ម្នាក់​ទៀតមក​ពី​ប្រទេស​ចិន​ ដែល​កំពុង​ទិញ​ទំនិញ​ក្នុង​ផ្សារ​ទំនើប​ Rodeo Drive ដែរ​នោះ​ និយាយ​ថា​ គុណភាព​សំខាន់​ចំពោះ​លោក​ ប៉ុន្តែ​មិន​ចាំបាច់​ជា​ម៉ាក​ល្បី​នោះ​ទេ។​

លោកនិយាយថា «ម៉ាក​វា​មិន​សូវ​សំខាន់​នោះ​ទេ។ ប្រសិនបើ​ខ្ញុំ​ចូ​លចិត្ត​ម៉ូត​នោះ​ ខ្ញុំ​នឹង​ទិញ​វា។​»

សម្រាប់​សម្លៀក​បំពាក់​ដែល​ផលិត​នៅ​ប្រទេស​ចិន​ក៏​ដូច​គ្នា​ដែរ។

អ្នក​នាង​ Huo បន្ត​ថា​ «ខ្ញុំ​ទិញ​សម្លៀក​បំពាក់​ដែល​សម​នឹង​ខ្ញុំ​។ ខ្ញុំ​ប្រហែល​ជា​ចង់​ដឹង​ថា​តើ​វា​ធ្វើ​នៅ​ឯណា​ បន្ទាប់​ពី​ខ្ញុំ​បាន​ទិញ​រួច។ ប៉ុន្តែ​ សម្រាប់​ខ្ញុំ ​វា​មិន​សំខាន់​នោះ​ទេ​ ទោះបីជា​វា​ធ្វើ​នៅ​ប្រទេស​ចិន ​ឬ​ឥណ្ឌូនេស៊ី​ក៏​ដោយ»។

ស្ថាបនិក​នៃ​រមណីយដ្ឋាន​ Soneva លោក​ Sonu Shivdasani និយាយ​ថា​ ការ​ចាក​ចេញ​ពី​ម៉ាក​ឡូយឆាយ​ល្បីៗ​ ទៅ​រក​អ្វី​ដែល​សាមញ្ញ​ គឺ​ជា​សញ្ញា​បង្ហាញ​ថា ​អតិថិជន​ដែល​មក​ពី​សេដ្ឋកិច្ច​កំពុង​រីក​ចម្រើន​ដូច​ជា​ប្រទេស​ចិន​ កំពុងតែ​មាន​គំនិត​អភិវឌ្ឍ។​

«រថយន្ត​ Roll Royce លែង​តំណាង​ឲ្យ​អ្វី​ដែល​ប្រណីត​តែ​មួយ​គត់​ហើយ។​ ឥឡូវ​នេះ​ គឺ​ការបង្ហាញ​ថា​អ្នក​ចំណង់ចំណូល​ចិត្ត និង​ភាព​ខុសប្លែ​កផ្ទាល់​ខ្លូន​មួយ ដូច្នេះ​ អ្នក​ប្រហែល​ជា​ទិញ​រថយន្ត​ BMW ពណ៌​ទឹក​ប្រាក់​ ហើយ​ទៅ​ទិញ​ទំនិញ​នៅ ហាង​ម៉ាក​ល្បី​ Armani។​ ដំណាក់កាល​ទី​បី​ជា​ការ​ដើរ​កំសាន្ត​ដើម្បី​យក​បទពិសោធន៍ ដូច្នេះ​យើង​ចាប់​ផ្តើម​មើល​ឃើញ​ការ​វិវត្ត​ដូច​នេះ​ក្នុ​ង​ប្រទេស​ចិន»។​

លោក​ Jouan និយាយ​ថា ​យុវជន​ជំនាន់​សហស្សវត្សរ៍​នៅ​តែ​គិត​ពី​តម្លៃ​របស់​ទំនិញ​ មិន​ថា​ពួកគេ​មក​ពី​ប្រទេសចិន​ឬ​ក៏​មក​ពី​ប្រទេស​ផ្សេង​នោះ​ទេ។​ ជា​រឿយៗ​ ពួក​គេ​ប្រើបច្ចេក​វិទ្យា​ដើម្បី​ស្វែង​រក​តម្លៃ​ និង​ហាង​ដែល​ស័ក្តិសម​បំផុត។​ តម្លៃ​នឹង​ផ្លាស់​ប្តូរ​តាម​បុគ្គល​ម្នាក់ៗ​ ដូចជា​សំបុត្រ​យន្តហោះ​អ៊ី​ចឹង។​

«​តម្លៃ​តែ​មួយ​ដូច​គ្នា​គឺ​គ្មាន​ទៀត​ទេ។​ តម្លៃ​ទំនិញ​បាន​ផ្លាស់​ប្តូរ​ទៅ​តាម​បុគ្គល​ និង​ការ​ប្រើ​ប្រាស់​ផលិត​ផល​ម៉ាក​ល្បី​របស់​ពួកគេកាល​ពី​មុន»។​

នៅ​ថ្ងៃ​អនាគត​ ផលិត​ផល​នីមួយ​ៗ​ប្រហែល​ជា​ត្រូវ​បាន​កំណត់​តម្លៃ​រួចជា​ស្រេច​សម្រាប់​អតិថិជន​ម្នាក់ៗ​ ដោយសារ​ទិន្នន័យ​ផ្ទាល់​ខ្លួន​ដែល​ត្រូវ​បាន​ប្រមូល​នៅ​លើ​ប្រព័ន្ធ​អ៊ិនធឺណិត៕​

ប្រែ​សម្រួល​ដោយ ទុំ​ ម្លិះ

XS
SM
MD
LG