ផ្សារភាគហ៊ុនធំៗនៅអឺរ៉ុប បានធ្លាក់ចុះយ៉ាងខ្លាំង នៅព្រឹកថ្ងៃព្រហស្បតិ៍នេះ ក្រោយពីចិនជាថ្មីម្តងទៀត បានព្យួរការជួញដូរភាគហ៊ុនរបស់ខ្លួន ដោយសារតែការលក់ភាគហ៊ុនដ៏ធំសម្បើមមួយ។
និយ័តករផ្សារភាគហ៊ុនក្នុងទីក្រុងប៉េកាំង បានកាត់ផ្តាច់ការជួញដូរ ក្នុងរយៈពេលតែ១៤នាទីប៉ុណ្ណោះ ក្រោយពីផ្សារហ៊ុន Shanghai Composite Index បានបើកនៅថ្ងៃព្រហស្បតិ៍នេះ។ ត្រឹមពេលនោះ ទីផ្សារភាគហ៊ុន បានធ្លាក់ចុះ ៧,៣ភាគរយទៅហើយ ចំណែកឯផ្សារភាគហ៊ុន Shenzhen ដែលតូចជាងផ្សារហ៊ុន Shanghai បានដាំក្បាលចុះ ដល់ទៅ៨,៣ភាគរយ។
ការធ្លាក់ចុះការជួញដូរភាគហ៊ុននេះ កើតឡើងជាលើកទី២ហើយ ក្នុងសប្តាហ៍នេះ។
ការផ្អាកការជួញដូរភាគហ៊ុនចិននេះ បានធ្វើឲ្យវិនិយោគិននានា ព្រួយបារម្ភ និងបានធ្វើឲ្យផ្សារភាគហ៊ុនផ្សេងៗទៀតនៅអាស៊ីធ្លាក់ចុះ ហើយបានទម្លាក់តម្លៃរូបិយប័ណ្ណយ័នរបស់ចិន ត្រឹម ០,៥១ ភាគរយទល់នឹងប្រាក់ដុល្លារអាមេរិក។ អត្រាធ្លាក់ចុះនេះ មានកម្រិតទាបបំផុតចាប់តាំងពីខែសីហាឆ្នាំមុនមក។
ផ្សារហ៊ុន Nikkei របស់ជប៉ុន បានធ្លាក់ចុះ ជិត២ភាគរយ ហើយផ្សារហ៊ុន Kospi របស់កូរ៉េខាងត្បូង បានធ្លាក់ចុះ ១ភាគរយ។
ចំនែកឯ ផ្សារហ៊ុននៅអឺរ៉ុប ក៏បានធ្លាក់តាមផ្សារភាគហ៊ុនអាស៊ីដែរ។
ផ្សារហ៊ុន DAX របស់អាល្លឺម៉ង់ បានធ្លាក់ចុះ ជាង៣ភាគរយ ក្រោយពីផ្សារនោះបើកទ្វារ។ រីឯ ផ្សារហ៊ុន CAC របស់បារាំងវិញ ក៏បានធ្លាក់ចុះ ២,៥ភាគរយដែរ ខណៈដែលផ្សារហ៊ុន FTSE របស់អង់គ្លេស ធ្លាក់ចុះ ២,៣ភាគរយដែរនោះ៕
